លោក កែវ រ៉េមី ដឹកនាំជម្រើសជាតិតេក្វាន់ដូ ITF ទៅប្រជែងមេដាយពិភពលោកនៅប៊ុលហ្គារី

កីឡាជាតិ

ជាតិ

លោក កែវ រ៉េមី ដឹកនាំជម្រើសជាតិតេក្វាន់ដូ ITF ទៅប្រជែងមេដាយពិភពលោកនៅប៊ុលហ្គារី

22, Aug 2019 , 4:59 pm

រូបភាព

ដោយ:

អត្តពលិកតេក្វាន់ដូ ITF ជម្រើសជាតិចំនួន១៧នាក់ (ស្រី២នាក់) នាល្ងាចថ្ងៃព្រហស្បតិ៍ ទី២២ ខែសីហា នេះ នាំចេញដំណើរទៅកាន់ទីក្រុង Plovdiv ប្រទេសប៊ុលហ្គារី ដើម្បីចូលរួមក្នុងព្រឹត្តិការណ៍ពិភពលោក World ITF Taekwon-do Championship ពីថ្ងៃទី២៤ ដល់ថ្ងៃទី៣០ ខែសីហា ឆ្នាំ២០១៩។ លោក កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជា ជាប្រធានប្រតិភូដឹកនាំផ្ទាល់។

ក្នុងបទសម្ភាសជាមួយសារព័ត៌មាន ThmeyThmey នៅអាកាសយានដ្ឋានអន្តរជាតិភ្នំពេញ លោក កែវ រ៉េមី បានអះអាងថា អត្តពលិកកម្ពុជា និងក្រុមគ្រូបង្វឹក បានត្រៀមខ្លួនរួចរាល់សម្រាប់ព្រឹត្តិការណ៍ពិភពលោកនេះ ជាពិសេសទាំងផ្នែកបច្ចេកទេស និងបញ្ញាស្មារតីនៅពេលប្រកួត។

កីឡាករ ប៉ាល់ ជីវ័ន ដែលត្រូវប្រកួតពីរវិញ្ញាសា អះអាងថា នឹងខំប្រឹងប្រែងអស់ពីលទ្ធភាពដើម្បីប្រជែងយកមេដាយ ខណៈគេធ្លាប់ដណ្តើមបានមេដាយប្រាក់រួចម្តងហើយនៅកូរ៉េខាងជើង។ នេះជាការបង្ហាញវត្តមានលើកទីបីរបស់ ជីវ័ននៅប៊ុលហ្គារី ដោយគេត្រូវប្រឈមជាកីឡាករខ្លាំងកម្រិតជើងឯកអឺរ៉ុប។ ទោះបីជាយ៉ាងណា កីឡាករ ជីវ័ន មានជំនឿមុតមាំថា គេអាចធ្វើបានល្អលើវិញ្ញាសាមេគុណកម្រិត៥ដាន់។

រីឯកីឡាករ សុភ័ក្ក្រ ចន្ទឧត្តម ទទួលស្គាល់ថា ព្រឹត្តិការណ៍ពិភពលោកនៅប៊ុលហ្គារី គឺជាជំហានដ៏ពិបាកមួយ ប៉ុន្តែគេមិនស្គាល់ថា ជាឧបសគ្គនោះឡើយ។ ឧត្តម នឹងចូលរួមប្រកួត៥វិញ្ញាសា ដោយរំពឹងធ្វើបានល្អលើវិញ្ញាសាសំដែង។

ការចូលរួមនេះ ដោយទទួលបានការឧបត្ថម្ភពីក្រុមហ៊ុនខ្មែរ ប៊ែវើរីជីស (Khmer Beverages) ក្រសួងអប់រំ យុវជន និងកីឡា និងគណៈកម្មាធិការជាតិរៀបចំការប្រកួតកីឡាស៊ីហ្គេមឆ្នាំ២០២៣(CAMSOC)៕