ភ្លើងឆេះព្រៃ នៅក្នុងតំបន់ទាក់ទាញទឹកភ្លៀងអាម៉ាហ្សូន នៅភាគខាងត្បូងប្រទេសប្រេស៊ីល បង្កអោយមានការផ្ទុះកំហឹងលើប្រព័ន្ធបណ្តាញសង្គម ខណៈពេលលោកប្រធានាធិបតី Jair Bolsonaro នៅពីថ្ងៃទី២១ ខែសីហា បានចោទអ្នកការពារបរិស្ថានថា ជាអ្នកនាំឲ្យមានភ្លើងឆេះនេះ។
រូបភាពនៃភ្លើងឆេះព្រៃ ដែលបំផ្លាញទាំងស្រុងនៅលើតំបន់មួយនៃព្រៃអាម៉ាហ្សូន បានក្លាយជាប្រធានបទនៃការផុសនៅលើបណ្តាញសង្គម Twitters ថា #PrayForAmazonas ដែលមានអ្នកសរសេររហូតដល់ ២៤៩ ០០០ដង។
អ្នកលេង Twitter ម្នាក់បានសរសេរថា៖ «មិនថាអ្នកជោគជ័យប៉ុនណាទេ បើផែនដីស្លាប់ យើងនឹងស្លាប់ទាំងអស់គ្នា»។ ដោយឡែកអ្នកលេងម្នាក់ទៀតបានសរសេរថា ផ្ញើការបួងសួងរបស់អ្នកទៅព្រៃអាម៉ាហ្សូន និងពិភពលោកទៅ ពួកយើងត្រូវការវា។
ប៉ុន្តែអ្វីគួរឲ្យចាប់អារម្មណ៍នោះ តាមរយៈសេវាកម្មផ្ទៀងផ្ទាត់ការពិតរបស់ទីភ្នាក់ងារសារព័ត៌មាន AFP រូបឆេះព្រៃខ្លះត្រូវថតតាំងពីឆ្នាំ១៩៨៩ ហើយរូបភាពភ្លើងឆេះព្រៃខ្លះទៀត រកឃើញនៅក្នុងអាមេរិក ឥណ្ឌាជាដើម។ ការណ៍នេះ នាំឲ្យប្រធានាធិបតីប្រេស៊ីល ជែ ប៊ុលសូណារ៉ូ (Jair Bolsonaro) រិះគន់ក្រុមការពារបរិស្ថាន។
លោកប្រធានាធិបតី ប៊ុលសូណារ៉ូ និយាយថា សកម្មភាពឧក្រិដ្ឋរបស់អង្គការក្រៅរដ្ឋាភិបាលដែលប្រឹងទាញចំណាប់អារម្មណ៍ឲ្យប្រឆាំងនឹងរូបលោក និងរដ្ឋាភិបាលរបស់ប្រេស៊ីលក្រោយពេលលោកកាត់លុយពីមូលនិធិពួកគេ អាចជាមូលហេតុនៃភ្លើងឆេះព្រៃនេះ។ លោកបញ្ជាក់ថា៖« នេះគឺជាសង្គ្រាម ដែលយើងត្រូវប្រឈមមុខ»។
កាន់តែធ្ងន់ធ្ងរ មេដឹកនាំប្រេស៊ីលរូបនេះបន្តចោទក្រុមការពារព្រៃឈើទៀតថា ភ្លើងឆេះនៅតំបន់យុទ្ធសាស្ត្រ ហើយទឡ្ហីករណ៍នានាបង្ហាញថា សកម្មជនទាំងនោះ បានទៅដុតភ្លើង ហើយថតតែម្ដង។
សូមបញ្ជាក់ថា ការស្រាវជ្រាវរបស់វិទ្យាស្ថានជាតិស្រាវជាវផ្នែកអាវកាសរកឃើញ ការដុតព្រៃមាន៧៣០០០ករណី ចន្លោះពីខែមករា ដល់ខែសីហា ដែលតួលេខនេះខ្ពស់ជាងឆ្នាំណាៗទាំងអស់ចាប់ពីឆ្នាំ២០១៣ ខណៈពេលឆ្នាំ២០១៨ មានត្រឹមតែ ៣៩៧៥៩ករណីប៉ុណ្ណោះ។ ដោយសារតែមិនអាចវាស់ពីទំហំនៃភ្លើងឆេះព្រៃ ទីក្រុងខ្លះ ដូចជា Sao Pauloត្រូវគ្របដណ្តប់ដោយផ្សែងយ៉ាងក្រាស់ឃ្មឹក។ ចំណែកជើងយន្តហោះត្រូវបានប្តូរជើងហោះហើរ ឬពន្យារពេល។
យ៉ាងណាមិញការឆេះព្រៃនេះ ធ្វើអោយសកម្មជនបរិស្ថានរិះគន់លោកប្រធានាធិបតីយ៉ាងខ្លាំង នៅក្រោមហេតុផលថាលោក Jair Bolsonaro លើកទឹកចិត្តឲ្យមានការកាប់ព្រៃខុសច្បាប់ ជីកយករ៉ែ និងដុតព្រៃយកដីចិញ្ជឹមសត្វជាដើម។
តាមពិតទៅ ប្រេស៊ីលក៏ត្រៀមធ្វើជាម្ចាស់ផ្ទះសន្និសីទអង្គការសហប្រជាជាតិលើបម្រែបម្រួលអាកាសធាតុលើកទី២៥ ផងដែរ តែប្រទេសនេះបានដកខ្លួនចេញ។ បញ្ហាបរិស្ថានដ៏ចម្រូងចម្រាសនេះ ជាមូលហេតុនៃការដកខ្លួនតែម្ដង៕