ក្រុមស៊ើបអង្កេតអង្គការសហប្រជាជាតិ បានចេញផ្សាយរបាយការណ៍មួថ្ងៃទី២២ ខែសីហា ពាក់ព័ន្ធសកម្មភាពរបស់រំលោភបំពានផ្លូវភេទដោយយោធាមីយ៉ាន់ម៉ា។ ក្រុមស៊ើបអង្កេតបានសន្និដ្ឋានថា ការរំលោភបំពានផ្លូវភេទរបស់កងទ័ពមីយ៉ានម៉ាទៅលើស្ត្រី និងក្មេងស្រីក្នុងឆ្នាំ២០១៧ គឺជាចេតនាប្រព្រឹត្តអំពើប្រល័យពូជសាសន៍លើជនជាតិភាគតិចរ៉ូហ៊ីងយ៉ា។
អ្នកស៊ើបអង្កេតឯករាជ្យមួយក្រុម ដែលត្រូវបានបង្កើតឡើងដោយក្រុមប្រឹក្សាសិទ្ធិមនុស្សអង្គការសហប្រជាតិនៅក្នុងឆ្នាំ២០១៧ បានចោទរដ្ឋាភិបាលទីក្រុងណៃពិដោថា គ្មានទំនួលខុសត្រូវចំពោះប្រជាជនម្នាក់ៗ។ លើសពីនេះទៅទៀត សកម្មភាពព្រងើយកន្តើយរបស់រដ្ឋាភិបាលមីយ៉ាន់ម៉ា ត្រូវតែប្រឈមមុខនឹងអនុសញ្ញាស្តីពីអំពើប្រល័យពូជសាសន៍ ដោយមិនអើពើក្នុងការស៊ើបអង្កេត និងពិន័យចំពោះសកម្មភាពប្រល័យពូជសាសន៍។
របាយការណ៍របស់អ្នកស៊ើបអង្កេតអង្គការសហប្រជាជាតិបាននិយាយថា ស្ត្រី និងក្មេងស្រីជនជាតិរ៉ូហ៊ីងយ៉ាជាច្រើន ត្រូវរងការរំលោភបំពានផ្លូវភេទ ហើយ៨០ភាគរយនៃអំពើនេះ គឺធ្វើឡើងដោយមានលក្ខណៈជាក្រុម ពោលគឺមនុស្សម្នាក់ត្រូវរងការបំពានដោយមនុស្សមួយក្រុម។ ជាពិសេសសកម្មភាពរំលោភបំពានផ្លូវភេទជាក្រុមបែបនេះ ប្រមាណជា៨២ភាគរយប្រព្រឹត្តដោយកងទ័ពរបស់មីយ៉ាន់ម៉ា។
បន្ថែមពីលើនេះទៀត ការសន្និដ្ឋានគឺមានមូលដ្ឋានលើនៃការកើនឡើងការសម្លាប់ស្ត្រី និងកូនក្មេងជាប្រព័ន្ធ ការរើសជាប្រព័ន្ធនូវស្ត្រី និងក្មេងស្រីពេញវ័យសម្រាប់រំលោភបំពានផ្លូវភេទ ការវាយប្រហារលើស្ត្រីមានទម្ងន់ និងទារក ការធ្វើអោយមានរបួសប្រដាប់ភេទ និងការខាំលើរូបរាងកាយផ្សេងៗទៀត។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
ក្នុងរបាយការណ៍ខែសីហា ឆ្នាំ២០១៨ ក្រុមស៊ើបអង្កេតរបស់ UN ចង្អុលបង្ហាញ ៥ចំណុចដែលចេតនាប្រព្រឹត្តអំពើប្រល័យពូជសាសន៍របស់កងទ័ពមីយ៉ាន់ម៉ា។ ក្នុងនោះមានដូចជា ការប្រើភាសាមិនសមរម្យ, ភស្តុតាងនៃគម្រោងការបំផ្លិចបំផ្លាញ, ការកកើតនៃគំរោង និងគោលនយោបាយប្រកាន់ពូជសាសន៍, ភាពសាហាវយង់ឃ្នងនៃយុទ្ធនាការយោធា និងការអធិប្បាយជាក់លាក់របស់មន្ត្រីរដ្ឋាភិបាល អ្នកនយោបាយ អាជ្ញាធរសាសនា មេបញ្ជាការយោធានៅក្នុងអំឡុងពេល និងក្រោយពេលប្រើអំពើហិង្សាលើជនជាតិភាគតិចមូស្លីមរ៉ូហ៊ីងយ៉ា។
«បេសកកម្មស៊ើបអង្កេតឯករាជ្យ អាចសន្និដ្ឋានដោយផ្អែកលើភស្តុតាងថា អំពើហិង្សាផ្លូវភេទស្ត្រី និងកុមារដែលចាប់ផ្ដើមចាប់ពីខែសីហា ឆ្នាំ២០១៦ គឺជាកត្តាទី៦ ដែលបង្ហាញពីចេតនាប្រព្រឹត្តអំពើប្រល័យពូជសាសន៍របស់យោធាមីយ៉ាន់ម៉ា។» នេះបើតាមការផ្សាយរបស់ Reuters ។
ដោយសារការបដិសេដមិនឲ្យចូលក្នុងរដ្ឋរ៉ាឃីនពីសំណាក់រដ្ឋាភិបាលមីយ៉ាន់ម៉ា, ក្រុមអ្នកស៊ើបអង្កេត ត្រូវធ្វើដំណើរទៅជំរុំជនភៀសខ្លួននៅក្នុងថៃ បង់ក្លាដែស និងម៉ាឡេស៊ី ដើម្បីទទួលបាននូវទិន្នន័យទាំងនេះ។
សូមបញ្ជាក់ថា ការបង្ក្រាបយ៉ាងសាហាវព្រៃផ្សៃរបស់យោធាមីយ៉ាន់ម៉ាលើជនជាតិភាគតិចរ៉ូហ៊ីងយ៉ា ធ្វើឲ្យមានការចំណាកស្រុកប្រមាណជា ៧៣ម៉ឺននាក់។ ប៉ុន្តែរដ្ឋាភិបាលមីយ៉ាន់ម៉ា បានច្រានចោលលើការចោទប្រកាន់នេះ ដោយអះអាងថា ទីក្រុងណៃពិដោធ្វើការទប់ស្កាត់ការប៉ះបោររបស់ជនជាតិរ៉ូហ៊ីងយ៉ាតែប៉ុណ្ណោះ៕