ចប់អាណត្តិ ទូតជប៉ុនផ្ញើសារលាពលរដ្ឋខ្មែរទាំងអាល័យ ដោយលោកចងចាំកម្ពុជាគ្មានថ្ងៃភ្លេច

ជាតិ

នយោបាយជាតិ

ចប់អាណត្តិ ទូតជប៉ុនផ្ញើសារលាពលរដ្ឋខ្មែរទាំងអាល័យ ដោយលោកចងចាំកម្ពុជាគ្មានថ្ងៃភ្លេច

23, Aug 2019 , 3:27 pm

រូបភាព

ដោយ: អុឹង ចំរើន (Ung Chamroeun)

លោក ហ៊ីដេហ៊ីសា ហូរីណូអ៊ុជិ ( HORINOUCHI Hidehisa) បានសរសេរសារចុងក្រោយជូនចំពោះប្រជាជនកម្ពុជាក្នុងឋានៈជាឯកអគ្គរាជទូតជប៉ុនប្រចាំកម្ពុជា នាឱកាសបញ្ចប់បេសកកម្មការទូតរបស់ខ្លួន។

«ពេលវេលាពិតជាដើរលឿន។ ប្រមាណ៣ឆ្នាំកន្លងផុតទៅ ក្រោយពេលខ្ញុំ និងភរិយាបានមកដល់រាជធានីភ្នំពេញ នាឆ្នាំ២០១៦។ ៣ឆ្នាំនេះ គឺជាពេលវេលាដ៏វិសេសវិសាលសម្រាប់យើងខ្ញុំទាំងពីរ»។ នេះជាឃ្លាដំបូងនៅក្នុងសាររបស់លោក ហ៊ីដេហ៊ីសា ជាមួយនឹងអារម្មណ៍សោកស្តាយដែលត្រូវចាកចេញពីកម្ពុជា។

ឯកអគ្គរាជទូតជប៉ុនដែលត្រូវផុតអាណត្តិរូបនេះ បានកត់សម្គាល់ពីកំណើនសេដ្ឋកិច្ចដ៏រឹងមាំរបស់កម្ពុជា ក្នុងរង្វង់៧ភាគរយជារៀងរាល់ឆ្នាំ និងសន្ទុះឈានមុខនៃទំនាក់ទំនងទ្វេភាគីកម្ពុជា-ជប៉ុន ក្នុងនោះមានទាំងពាណិជ្ជកម្ម និងការផ្លាស់ប្តូរដំណើរទស្សនកិច្ចនានាផងដែរ។

លោក ហ៊ីដេហ៊ីសា ចូលថ្វាយបង្គំលាព្រះករុណា ព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី។ រូបថត Royal du Cambodge

«ខ្ញុំក៏បានចូលរួមពិធីសម្ពោធផ្សេងៗ នៃគម្រោងជំនួយអភិវឌ្ឍន៍របស់រដ្ឋាភិបាលជប៉ុន ដែលជានិមិត្តរូបនៃមិត្តភាពរវាងប្រទេសយើងទាំងពីរ ដូចជាការជួសជុលស្ពានជ្រោយចង្វារជាដើម។ ចំណែកទំនាក់ទំនងក្នុងវិស័យនយោបាយវិញ ខ្ញុំមានភ័ព្វសំណាងដែលបានចូលរួមកិច្ចប្រជុំកំពូលជប៉ុន-កម្ពុជារវាងឯកឧត្តមនាយករដ្ឋមន្ត្រីអាបេ និងសម្តេចតេជោ នាយករដ្ឋមន្ត្រី ហ៊ុន សែន ចំនួន៣លើកក្នុងរយៈពេល៣ឆ្នាំកន្លងទៅនេះ»។

ក្រៅពីសមទ្ធិផលសង្ខេបដែលលោកបានលើកឡើងខាងលើ លោក ហ៊ីដេហ៊ីសា បានគូសបញ្ជាក់ពីការរួមចំណែករបស់ជប៉ុនក្នុងការលើកស្ទួយលទ្ធិប្រជាធិបតេយ្យនៅកម្ពុជា រួមទាំងការអញ្ជើញយុវជនកម្ពុជា ដែលមានចំណាប់អារម្មណ៍ផ្នែកនយោបាយ មកពី ស្ថាប័ននានា ទៅស្វែងយល់ពីបទពិសោធន៍នៅជប៉ុន។

លោកបានបញ្ជាក់ថា៖ «ខ្ញុំ និងភរិយា [លោកស្រី Sabine HORINOUCHI ] នឹងចាកចេញពីទីក្រុងភ្នំពេញសប្តាហ៍ក្រោយនេះ ក៏ប៉ុន្តែសម្រស់នៃប្រទេសកម្ពុជាបានផ្តល់ក្តីស្រមៃដល់យើងខ្ញុំថានឹងត្រលប់មកកាន់ទឹកដីដ៏អស្ចារ្យនេះជាថ្មីនាថ្ងៃអនាគត»។

ជាមួយគ្នានេះ លោក ហ៊ីដេហ៊ីសា ជឿជាក់ថា ភ្នំពេញ នឹងប្រែមុខមាត់ថ្មីនៅប៉ុន្មានឆ្នាំខាងមុខ ជាមួយនឹងព្រលានយន្តហោះថ្មី អាគារខ្ពស់ៗជាច្រើន ព្រមទាំងប្រព័ន្ធដឹកជញ្ជូនសាធារណៈថ្មី ហើយលោកក៏អាចនឹងមានឱកាសសាជាថ្មីដើម្បីនិយាយភាសាខ្មែរ។

លោក ហ៊ីដេហ៊ីសា ចូលថ្វាយបង្គំលា សម្តេចព្រះវររាជមាតាជាតិខ្មែរ នរោត្តម មុនិនាថ សីហនុ។ រូបថត Royal du Cambodge

មុនសារជាលាយលក្ខណ៍អក្សរ លោក ហ៊ីដេហ៊ីសា ក៏បានចេញឃ្លីបវីដេអូចំនួន៦០វិនាទី ដើម្បីថ្លែងលាពលរដ្ឋខ្មែរផងដែរ។ លោកបានអះអាងថា ក្នុងរយៈពេល៣ឆ្នាំកន្លងមក លោកបានជួបពលរដ្ឋខ្មែររាប់មិនអស់ ដោយលោកជឿជាក់លើអនាគតដ៏ត្រចះត្រចង់របស់យុវជនខ្មែរ។

លោក ហ៊ីដេហ៊ីសា បានកាន់តួនាទីជាទូតជប៉ុនប្រចាំកម្ពុជា ចាប់ពីខែតុលា ឆ្នាំ២០១៦មក។ លោកធ្លាប់ជាទីប្រឹក្សាទូតជប៉ុនប្រចាំរដ្ឋធានីវ៉ាស៊ីនតោនចន្លោះពីឆ្នាំ១៩៩៦ ដល់ឆ្នាំ១៩៩៩ ហើយជាអគ្គកុងស៊ុលជប៉ុន ប្រចាំរដ្ឋ Los Angeles សហរដ្ឋអាមេរិក ចាប់ពីខែសីហា ឆ្នាំ២០១៤ មុនពេលមកកាន់កម្ពុជា។

ក្នុងបទសម្ភាសមួយជាមួយកាសែត Tokyo Journal ពេលដែលលោកកាន់តួនាទីជាអគ្គកុងស៊ុលប្រចាំរដ្ឋ Los Angeles លោក ហ៊ីដេហ៊ីសា បានបញ្ជាក់ឲ្យដឹងថា លោកបានបញ្ចប់ការសិក្សាផ្នែកច្បាប់នៅសាកលវិទ្យាល័យក្រុងតូក្យូ ហើយបានក្លាយជាមន្ត្រីក្រសួងការបរទេសជប៉ុននៅឆ្នាំ១៩៨០។

លោកបានជ្រើសរើសភាសាចិនជាភាសាទីពីររបស់ខ្លួន ហើយត្រូវបានក្រសួងការបរទេសបញ្ជូនឲ្យទៅរៀននៅសាកលវិទ្យា Nanjing រយៈពេល២ឆ្នាំ បន្ទាប់មកបន្ត១ឆ្នាំទៀតនៅសាកលវិទ្យា Harvard សហរដ្ឋអាមេរិក។

លោក ហ៊ីដេហ៊ីសា និងសម្តេចនាយករដ្ឋមន្ត្រី ហ៊ុន សែន នាពិធីដាក់ដំណើរការស្ពានមិត្តភាពខ្មែរជប៉ុន។ រូបថត ThmeyThmey

តាមពិតទៅលោកបានរស់នៅប្រទេសចិនអស់រយៈពេល១២ឆ្នាំ មុនពេលដែលចូលរួមជាមួយក្រសួងការបរទេស ដោយសារតែលោកចង់ក្លាយជាមន្ត្រីការទូតប្រចាំប្រទេសចិន។ លោក Hidehisa មានបទពិសោធន៍ជាច្រើនក្នុងបេសកកម្មទាំងនៅចិន និងសហរដ្ឋអាមេរិក។

នាអំឡុងបំពេញបេសកកម្មនៅវ៉ាស៊ីនតោន ចុងទសវត្សរ៍៩០ លោក Hidehisa បានប្រើរហស្សនាមថា «Harry»។ លោកបានពន្យល់ប្រាប់ Tokyo Journal ថា មិត្តភក្តិអាមេរិករបស់លោកពិបាកហៅលោក ទាំងឈ្មោះ និងត្រកូលរបស់លោក។ ក្រោយមកលោកបានអានសៀវភៅ The Clifton Chronicles របស់ Jeffrey Archer ដែលបង្ហាញឲ្យឃើញពីអត្ថន័យល្អរបស់ពួក «Harry»។ លោកបានសម្រេចចិត្តឲ្យមិត្តភក្តិហៅបែបនេះ ជំនួសពាក្យថា «Hori san»។

ចំពោះការងារនៅទីស្តីការក្រសួងការបរទេស (MOFA) ក្នុងក្រុងតូក្យូ លោក Hidehisa បានកាន់ការងារជាច្រើនទាក់ទងនឹងកិច្ចការច្បាប់ សន្ធិសញ្ញា កិច្ចការតំបន់អាស៊ី និងអូសេអានី រួមទាំងការវិភាគព័ត៌មានស៊ើបការណ៍អន្តរជាតិ។

បើតាមការផ្សាយរបស់ Tokyo Journal លោក Hidehisa បានសរសេរអត្ថបទជាច្រើនទាក់ទងនឹងផ្នែកនីតិសាស្ត្រ ជាពិសេសច្បាប់អន្តរជាតិ។ លោកបាននិពន្ធសៀវភៅមួយក្បាលដែលមានចំណងជើងថា «Longevity of Japan» ដែលបានបោះពុម្ពនៅប្រទេសចិនផងដែរ៕