ជាតិ
សង្គមជាតិ
រដ្ឋាភិបាល សម្រេចឱ្យបង្កកទ្រព្យ ជនប្រព្រឹត្តបទល្មើសព្រៃឈើ រូបពីហ្វេសប៊ុកលោក អេង ហ៊ី អ្នកនាំពាក្យគណៈកម្មាធិការដើម្បីទប់ស្កាត់ និងបង្ក្រាបបទល្មើសធនធានធម្មជាតិ
× ភ្នំពេញ៖ ក្រៅពីផ្តន្ទាទោស និងផាកពិន័យនោះ ជនប្រព្រឹត្តបទល្មើសព្រៃឈើ ក៏ត្រូវរងការបង្កកទ្រព្យសម្បត្តិដែរ។ នេះជាការសម្រេចរបស់រដ្ឋាភិបាល ដែលឯកភាពតាមសំណើររបស់គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ កាលពីថ្ងៃទី១៦ ខែសីហា ឆ្នាំ២០១៩។
ទីស្តីការគណៈរដ្ឋមន្ត្រី ដែលបានឯកភាពលើវិធានការទប់ស្កាត់បទល្មើសព្រៃឈើនេះ បានសម្រេចឱ្យមោឃភាព ឬលុបចោលនូវលិខិតបើកផ្លូវដឹកជញ្ជូនផល អនុផលព្រៃឈើ ចេញពីដីសម្បទាន «LP» និង លិខិតអនុញ្ញាតដឹកជញ្ជូនផល អនុផលព្រៃឈើ «PC» ទាំងអស់ដែលចេញនាពេលកន្លងទៅដើម្បីរៀបចំចេញលិខិតអនុញ្ញាតសារជាថ្មី ងាយស្រួលគ្រប់គ្រង។ បន្ថែមពីនេះក្រសួង និងស្ថាប័នជំនាញត្រួតពិនិត្យ ត្រូវមោឃភាព និងដកហូតសិទ្ធិពីក្រុមហ៊ុន ដែលមិនគោរពច្បាប់ មិនគោរពកិច្ចសន្យា មិនគោរពកិច្ចព្រមព្រៀង។
រដ្ឋាភិបាល អនុញ្ញាតឱ្យប្រមូលវត្ថុតាង មធ្យោបាយនៃបទល្មើស ដែលបានកម្ទេចចោល យកមករក្សាទុកផ្ដុំកន្លែងមួយកំណត់ ដើម្បីទុកជាភស្តុតាងសម្រាប់បម្រើតុលាការ ។
«បង្កកទ្រព្យសម្បត្តិរបស់បុគ្គល ដែលពាក់ព័ន្ធនឹង ការប្រព្រឹត្តបទល្មើសព្រៃឈើ ក្រៅពីការផ្ដន្ទាទោស និងពិន័យជាប្រាក់»។ នេះបើតាមលិខិតរបស់ទីស្តីការគណៈរដ្ឋមន្ត្រី ដែលបានផ្ញើទៅកាន់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោក សៅ សុខា មេបញ្ជាការអាវុធហត្ថលើផ្ទៃប្រទេស និងជាប្រធានគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ។
តាមរយៈយន្តការទប់ស្កាត់ការប្រព្រឹត្តបទល្មើសព្រៃឈើនេះ រដ្ឋាភិបាល ក៏អនុញ្ញាតឱ្យអាជ្ញាធរចារឹកឈ្មោះឧក្រិដ្ឋជននៅលើផ្ទាំងសិលាដាក់តាំងនៅកន្លែងគំនររថយន្ត ដែលជាមធ្យោបាយបំផ្លាញព្រៃឈើទៀតផង។
កាលពីថ្ងៃទី១៥ សីហា ឧកញ៉ា គង់ គ្រឹង និងជនសង្ស័យម្នាក់ទៀតឈ្មោះ ម៉ាត់ ណាស៊ាត ត្រូវបានឃាត់ខ្លួនពាក់ព័ន្ធនឹងបទល្មើសព្រៃឈើ ។ ដោយឡែកឧកញ៉ា ស៊ឹង សំអុល រួមទាំងបក្សពួក៤នាក់ទៀត ក៏ត្រូវបានចាប់ខ្លួនពីបទល្មើសព្រៃឈើនេះដូចគ្នា កាលពីដើមខែកក្កដា ក្រោយពីការប្រកាសអនុវត្តវិធានការក្តៅ ពីសំណាក់លោក សៅ សុខា ប្រធានគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ។
អ្នកនាំពាក្យគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ លោក អេង ហ៊ី បានបញ្ជាក់ថា តុលាការកំពុងបន្តនីតិវិធីលើសំណុំរឿងរបស់ឧកញ៉ាទាំងពីរ និងអ្នកពាក់ព័ន្ធលើបទល្មើសព្រៃឈើ ដែលអាជ្ញាធរឃាត់ខ្លួនបាន។ ថ្លែងប្រាប់សារព័ត៌មានថ្មីៗ លោក អេង ហ៊ី បាននិយាយដូច្នេះថា៖«យើងបានបញ្ជូនសំណុំរឿងទៅតុលាការហើយ ដូច្នេះរាល់ការសម្រេចបង្កកទ្រព្យសម្បត្តិនោះ គឺអាស្រ័យលើតុលាការ»។
គិតមកដល់ពេលនេះ អាជ្ញាធរ បានដុតកម្ទេចមធ្យោបាយដឹកជញ្ជូនឈើជាង២០០គ្រឿងហើយ ដោយក្នុងនោះមានប្រភេទរថយន្តកែច្នៃដូចជា ប៉ាកុង សាំយ៉ុង និង ឡុងគ្រីស័រ ជាដើម។ ក្រៅពីរថយន្ត ក៏នៅមានម៉ូតូកែច្នៃមួយចំនួនទៀត ដែលត្រូវបានដុតកម្ទេចចោលដែរ។ អាជ្ញាធរបានរឹបអូសឈើជាង២ពាន់ម៉ែត្រគីប ហើយយកទៅរក្សាទុក នៅរដ្ឋបាលព្រៃឈើ។ នេះជាការបញ្ជាក់របស់អ្នកនាំពាក្យគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ដែលប្រាប់សារព័ត៌មានថ្មីៗកន្លងមក៕
Tag:
ព្រៃឈើ
ជលផល
អេង ហ៊ី
© រក្សាសិទ្ធិដោយ thmeythmey.com