ជាតិ
សង្គមជាតិ
អាជ្ញាធរដាំកូនឈើ២៥០០០ដើមស្ដារគម្របព្រៃឈើលើភ្នំគូលែន
× សៀមរាប៖ កូនឈើប្រមាណ២៥,០០០ដើម ត្រូវបានអាជ្ញាធរធ្វើការដាំនៅលើភ្នំគូលែន ក្នុងយុទ្ធនាការស្ដារគម្របព្រៃឈើដែលបាត់បង់ក្នុងឧទ្យានជាតិមួយនេះ។ មន្ត្រីក្រសួងបរិស្ថានបានឱ្យដឹងថា យុទ្ធនាការនេះបន្តធ្វើរហូតទាល់តែអាចស្ដារព្រៃឈើនៅទីនេះបានឡើងវិញ ពិសេសរិតបន្ដឹងសកម្មភាពកាប់ទន្ទ្រានព្រៃនិងការកាន់កាប់ដីខុសច្បាប់ពីជនខិលខូច។
យុទ្ធនាការស្ដារគម្របព្រៃឈើលើភ្នំគូលែន ត្រូវបានរៀបចំធ្វើជាបន្តបន្ទាប់ ដែលរៀបចំឡើងដោយមន្ទីរបរិស្ថាន សហការជាមួយអាជ្ញាធរមូលហេតុ។ ពិធីដាំកូនឈើប្រមាណ២៥,០០០ដើម ត្រូវបានរៀបចំធ្វើនៅព្រឹកថ្ងៃទី២៣ សីហា ក្នុងភូមិសាស្ដ្រភូមិអន្លង់ធំ ឃុំខ្នងភ្នំ ស្រុកស្វាយលើ នៅលើដីទំនេរដែលត្រូវបានកាប់ទន្ទ្រានព្រៃកន្លងមក។
មានវត្តមានក្នុងពិធីនោះ លោក នាក់ ណេរ៉ុន អភិបាលរងខេត្តសៀមរាប បានចាត់ទុកការដាំកូនឈើនៅពេលនោះថា ជាកិច្ចការសំខាន់ ពិសេសមានការចូលរួមនិងការភ្ញាក់រឮកពីប្រជាពលរដ្ឋក្នុងសហគមន៍។ លោកបន្តថា សកម្មភាពនេះឆ្លុះបញ្ចាំងពីការយល់ដឹងពីតម្លៃរបស់ព្រៃឈើ បរិស្ថាន និងដឹងពីអត្ថប្រយោជន៍ទៅអនាគត។ ជាមួយគ្នានេះ លោកអភិបាលរងខេត្ត ស្នើឱ្យប្រជាពលរដ្ឋក្នុងសហគមន៍លើភ្នំគូលែនទាំងអស់ បន្តចូលរួមដាំកូនឈើ និងថែរក្សាព្រៃឈើទាំងអស់លើភ្នំនេះ ដ្បិតថា ភ្នំគូលែនជាឧទ្យានជាតិមួយល្បីល្បាញរបស់កម្ពុជា ហើយពួកគេនឹងទទួលបានប្រយោជន៍ច្រើនពីវិស័យទេសចរណ៍នៅទីនេះ។
នៅចំពោះមុខប្រជាពលរដ្ឋប្រមាណ២០០នាក់ដែលចូលរួមដាំកូនឈើនៅពេលនោះ រដ្ឋលេខាធិការក្រសួងបរិស្ថាន លោក សៅ សុភាព បានរំលឹកពីប្រវត្តិនៃការបង្កើតឧទ្យានជាតិព្រះជ័យវរ្ម័ន-នរោត្ដម ភ្នំគូលែននេះ ដែលត្រូវបានបង្កើតនៅឆ្នាំ១៩៩៣។ លោករដ្ឋលេខាធិការទទួលស្គាល់ថា រយៈពេលជាង២៦មកនេះ មានសកម្មភាពកាប់ទន្ទ្រានព្រៃឈើ ឬបទល្មើសព្រៃឈើនៅទីនេះមានសភាពខ្លាំងក្លា ហើយកន្លងមកអាជ្ញាធរប្រើឥរិយាបថទន់ភ្លន់ អប់រំជាជាងប្រើផ្លូវច្បាប់។ លោក សៅ សុភាព បញ្ជាក់ថា ក្រសួងបរិស្ថានបានពិភាក្សាជាមួយអាជ្ញាធរពាក់ព័ន្ធរួហើយ ដោយក្នុងនោះនឹងធ្វើការរិតបន្ដឹងផ្នែកច្បាប់ ដោយមិនត្រូវឱ្យករណីបែបនោះទៀតទេ។
ជាមួយគ្នានោះ លោក សៅ សុភាព លើកឡើងថា ការស្ដារគម្របព្រៃឈើលើភ្នំគូលែន ជារឿងសំខាន់ណាស់ ដ្បិតថា ភ្នំគូលែនជាប្រភពទឹកដ៏សំខាន់សម្រាប់ប្រព័ន្ធទឹកក្នុងខេត្តសៀមរាបទាំងមូល។ ដូច្នេះ បើគ្មានគម្របព្រៃឈើពេញលេញទេ នោះក៏គ្មានអ្វីសម្រាប់ទាក់ទាញភ្លៀងដែរ៕
Tag:
ដាំកូនឈើ
ភ្នំគូលែន
សៅ សុភាព
បរិស្ថាន
© រក្សាសិទ្ធិដោយ thmeythmey.com