ជាតិ
សង្គមជាតិ
អាជ្ញាធរខេត្តសៀមរាបប្ដេជ្ញាផ្លាស់ប្ដូរមុខមាត់ថ្មី លើប្រព័ន្ធផ្លូវថ្នល់
×![]()
សៀមរាប៖ ជាខេត្តទេសចរណ៍ដ៏ល្បីល្បាញនៅកម្ពុជា ខេត្តសៀមរាបតែងទទួលរងនូវការរិះគន់ជារឿយៗទៅលើបញ្ហាផ្លូវថ្នល់។ អាជ្ញាធរក្នុងខេត្តនេះ បានបេ្ដជ្ញាចិត្តថានឹងផ្លាស់ប្ដូរមុខមាត់ថ្មីលើប្រព័ន្ធផ្លូវថ្នល់នៅក្រោយឆ្នាំ២០១៩ បន្ទាប់ពីគម្រោងអភិវឌ្ឍន៍ហេដ្ឋារចនាសម្ព័ន្ធក្នុងខេត្ត មានការគាំទ្រពីរាជរដ្ឋាភិបាលដោយកំណត់ខេត្តសៀមរាបជាគោលដៅទេសចរណ៍ដ៏ទាក់ទាញ និងមានភាពបៃតង។
អភិបាលរងខេត្តសៀមរាប លោក លី សំរិទ្ធ បានបង្ហាញការប្ដេជ្ញាលើការកែប្រែប្រព័ន្ធផ្លូវថ្នល់ក្នុងក្រុងសៀមរាប ឱ្យបានល្អប្រសើរនៅក្រោយឆ្នាំ២០១៩ ដើម្បីឱ្យស័ក្ដិសមជាខេត្តទេសចរណ៍របស់កម្ពុជា។ ថ្លែងក្នុងអំឡុងពេលចុះពិនិត្យផ្លូវ ប្រឡាយ និងបរិស្ថានក្នុងក្រុងសៀមរាបនៅព្រឹកថ្ងៃទី២៤ សីហា លោក លី សំរិទ្ធ បានលើកឡើងថា អាជ្ញាធរនិងថ្នាក់ដឹកនាំខេត្តបាននឹងកំពុងបន្តគិតគូរយកចិត្តទុកដាក់ជាប្រចាំលើកិច្ចការងារជួសជុល និងពង្រីកហេដ្ឋារចនាសម្ពន្ឋ័នានា ធ្វើយ៉ាងណាបញ្ចៀសពីការកកស្ទះចរាចរណ៍ និងដើម្បីរក្សាបាននូវធ្វើ សន្តិសុខ សណ្តាប់ធ្នាប់ សុវត្ថិភាព សាធារណៈជូនភ្ញៀវជាតិនិងអន្តរជាតិក៍ដូចជាប្រជាពលរដ្ឋក្នុងទូទាំងខេត្ត ព្រមទាំងបានគិតគូរពីអនាម័យ បរិស្ថាន ក្នុងក្រុងផងដែរ ។
ជាមួយគ្នានោះ លោកអភិបាលរងស្ដីទីរូបនេះ បានទទួលស្គាល់ពីការខូចខាតផ្លូវថ្នល់ជាច្រើនក្នុងក្រុងសៀមរាប ដែលអាចនឹងប៉ះពាល់ដល់វិស័យទេសចរណ៍ក្នុងខេត្តនេះ ដូច្នេះរដ្ឋបាលខេត្តមិនអាចបណ្ដោយឱ្យរងផលប៉ះពាល់ជាបន្តទៀតឡើយ គឺចាំបាច់ត្រូវស្ដារមុខមាត់ខេត្តឡើងវិញ។ «ផ្លូវមួយចំនួនរងនូវភាពទ្រុឌទ្រោម និងខូចខាតបណ្តាលមកពីកត្តាច្រើនយ៉ាង ជាពិសេសគឺដល់អាយុកាលរបស់វាដែលត្រូវខូច ដូច្នេះខេត្តបានកំណត់ផ្លូវសំខាន់ៗជាអាទិភាព និងធ្វើឱ្យល្អ តែក៏មិនអាចធ្វើហួសពីលទ្ធភាពរបស់យើងដែរ យើងនឹងធ្វើឱ្យហេដ្ឋារចនាសម្ព័ន្ធក្រោយឆ្នាំ ២០១៩នេះ នឹងផ្លាស់ប្ដូរមុខមាត់ថ្មី...»។ នេះជាការបញ្ជាក់របស់លោក លី សំរិទ្ធ។
ក្នុងនាមអាជ្ញាធរខេត្តនិងថ្នាក់ដឹកនាំខេត្ត លោក លី សំរិទ្ធ អភិបាលរងខេត្ត បានជំរុញដល់មន្ត្រី អង្គភាព មន្ទីរស្ថាប័នពាក់ព័ន្ឋ និងអាជ្ញាធរមូលដ្ឋានគ្រប់លំដាប់ថ្នាក់ សហការចូលរួមរៀបចំសណ្តាប់ធ្នាប់សាធារណៈ តាមដងផ្លូវសំខាន់ៗ ណែនាំដល់ប្រជាពលរដ្ឋឱ្យសម្អាត បរិស្ថាន អនាម័យ នៅតាមមុខផ្ទះរបស់ខ្លួនឱ្យបានជាប្រចាំ ត្រូវគិតគូរវិចខ្ចប់សំរាម និងកាកសំណល់ផ្សេងៗឱ្យបានត្រឹមត្រូវផងដែរ៕
Tag:
ផ្លូវថ្នល់
លី សំរិទ្ធ
© រក្សាសិទ្ធិដោយ thmeythmey.com
