ក្រសួងទេសចរណ៍ នឹងសុំដាក់នំបញ្ចុក សម្លប្រហើរ កកូរ ម្ជូរគ្រឿង និង ហហ្មុក ជាបេតិកភណ្ឌពិភពលោក

ជាតិ

សង្គមជាតិ

ក្រសួងទេសចរណ៍ នឹងសុំដាក់នំបញ្ចុក សម្លប្រហើរ កកូរ ម្ជូរគ្រឿង និង ហហ្មុក ជាបេតិកភណ្ឌពិភពលោក

24, Aug 2019 , 10:39 pm

រូបភាព

ដោយ: អ៊ូ សុខមាន (OU Sokmean)

ភ្នំពេញ៖ ក្រសួងទេសចរណ៍ត្រៀមរៀបចំម្ហូបអាហារខ្មែរ៥មុខ ដាក់ចូលជាបេតិភណ្ឌអរូបិយពិភពលោកនៃអង្គការ UNESCO។ ម្ហូបអាហារខ្មែរទាំង៥មុខនោះ មាន នំបញ្ចុក សម្លកកូរ សម្លប្រហើរ សម្លម្ជូរគ្រឿង និង ហហ្មុក។ នេះជាការលើកឡើងរបស់លោក ថោង ខុន រដ្ឋមន្រី្តក្រសួងទេសចរណ៍ក្នុងសន្និសីទអន្តរជាតិលើកទី១ ស្ដីពីទេសចរណ៍ម្ហូបអាហារកម្ពុជា កាលពីថ្ងៃទី២១ សីហា នៅសណ្ឋាគារសុខាភ្នំពេញ។

បើតាមរដ្ឋមន្ត្រីទេសចរណ៍រូបនេះ ក្រៅពីម្ហូបខ្មែរទាំង៥មុខខាងលើ មានបង្អែម៥មុខទៀត រួមមាននំអន្សម នំផ្លែអាយ នំស្លឹកស្រស់ នំច័ក្កច័ន និង បាយដំណើបសង់ខ្យា ក៏បានស្នើអង្គការUNESCO ដើម្បីដាក់ចូលជាបេតិភណ្ឌអរូបិយពិភពលោកផងដែរ។

ជាមួយគ្នានេះ លោក ថោង ខុន បានណែនាំមន្ត្រីរបស់ខ្លួន ឲ្យសហការជាមួយភាគីពាក់ព័ន្ធ ដោយជ្រើសរើសម្ហូបអាហារនិងបង្អែមណាដែលជាអត្តសញ្ញាណជាតិ ហើយបុព្វបុរសខ្មែរបានកត់ត្រាទុកពីបុរាណមក គឺត្រូវប្រមូលយកមករៀបចំ ដើម្បីស្នើសុំចុះបញ្ជីជាសម្បត្តិបេតិកភណ្ឌពិភពលោកទាំងអស់។ លោក អះអាងថា ការធ្វើបែបនេះ គឺសំដៅដល់ការពង្រីក ផ្សព្វផ្សាយ និង ទាក់ទាញភ្ញៀវទេសចរឱ្យមកទស្សនានៅកម្ពុជា កាន់តែច្រើន តាមរយៈអាហារ និងបង្អែមទាំងនេះ។

លោក ថោង ខុន បាននិយាយដូច្នេះ៖«ទន្ទឹមនឹងការអនុវត្តកិច្ចការនេះ យើងត្រូវធ្វើឱ្យមានស្ដង់ដាអនាម័យ គុណភាព និងរំលេចនូវភាពទាក់ទាញបន្ថែមទៀត ដើម្បីទាក់ទាញចិត្តភ្ញៀវទេសចរឱ្យចាប់អារម្មណ៍ចង់ភ្លក្ស មិនថានៅក្នុងប្រទេសកម្ពុជា ឬនៅបរទេសនោះឡើយ សំដៅធ្វើយ៉ាងណាឱ្យពួកគេទទួលទានហើយចងចាំពីកម្ពុជាយើង នោះកម្ពុជានឹងកាន់តែក្លាយជាគោលដៅទេសចរណ៍ដ៏ទាក់ទាញ តាមរយៈម្ហូបអាហារនេះ។ នេះហើយដែលគេហៅថា ទេសចរណ៍ម្ហូបអាហារ»។

លោករដ្ឋមន្ត្រី បញ្ជាក់ទៀតថា ម្ហូបអាហារគឺជាផ្នែកមួយដ៏សំខាន់នៃវប្បធម៌ និងជាកម្លាំងចលករដ៏សំខាន់ ក្នុងការទាក់ទាញភ្ញៀវទេសចរ ឱ្យមកទស្សនានៅកម្ពុជាកាន់តែច្រើន៕