កីឡាជាតិ
ជាតិ
កីឡាហាប់គីដូ៖ កីឡាករមានបច្ចេកទេសកើនឡើង តែនៅខ្សោយកម្លាំង និងភាពក្លាហាន Front សកម្មភាពកីឡាការិនីថ្នាលហាប់គីដូ បង្ហាញស្នៀតកាច់ការពារខ្លួន, រូបភាពទាំងអស់ពីសហព័ន្ធខ្មែរកីឡាហាប់គីដូ
×
សហព័ន្ធខ្មែរកីឡាហាប់គីដូ បានរៀបចំការប្រកួតផ្លូវការលើកដំបូង ដើម្បីលើកទឹកចិត្ត និងវាស់ស្ទង់សមត្ថភាពកីឡាករ។ ស្នៀតកាច់ការពារខ្លួន ជាវិញ្ញាសា ដែលសហព័ន្ធដាក់ឲ្យកីឡាករកីឡាការិនីប្រកួតប្រជែងលើកនេះ។ សម្រាប់សហព័ន្ធ នេះជាជំហានទី១ មុនឈានទៅរៀបចំ និងចូលរួមប្រកួតទ្រង់ទ្រាយធំនៅថ្ងៃអនាគត។ កត្តាសមត្ថភាព និងបច្ចេកទេសមិនចោទជាបញ្ហានោះទេ សម្រាប់កីឡាករ អ្វីដែលចោទ គឺកត្តាកម្លាំងកាយ ភាពស្វាហាប់ និងភាពក្លាហាន។
អគ្គលេខាធិការសហព័ន្ធខ្មែរកីឡាហាប់គីដូលោក គង់ ចាន់ធីណា ក្រោយបានទស្សនាការប្រកួតកីឡាហាប់គីដូជ្រើសរើសជើងឯកលើវិញ្ញាសាបង្ហាញស្នៀតកាច់ការពារខ្លួនបានវាយតម្លៃថា កម្រិតសមត្ថភាព និងបច្ចេកទេសរបស់កីឡាករមានភាពរីកចម្រើនគួរឲ្យកត់សម្គាល់។ តែអ្វីដែលលោកនៅទាស់ចិត្តនោះ គឺកត្តាកម្លាំងកាយ ភាពស្វាហាប់ និងភាពក្លាហានក្នុងការបង្ហាញស្នៀត។
«បើយើងវាយតម្លៃពីកម្រិតបច្ចេកទេសរបស់កីឡាករកីឡាការិនី ក្រុមឈុតធំមានការកើនឡើងប្រមាណ៦០ភាគរយ តែក្រុមឈុតតូចប្រមាណ៥៥ភាគរយ ព្រោះពួកគាត់នៅនៅខ្សោយកម្លាំងកាយ ខ្វះភាពស្វាហាប់ និងភាពក្លាហានក្នុងការសម្តែង។ តែខ្ញុំសុំសរសើរពួកគាត់ ដោយសារមានអ្នកខ្លះហាត់បានតែថ្ងៃសៅរ៍-អាទិត្យ ហើយអ្នកខ្លះហាត់ពីចន្ទ-សុក្រ តែធ្វើបានល្អក្នុងការប្រកួតរៀបចំបែបប្រថុចញ៉ុចមួយនេះ»។ ការវាយតម្លៃបែបនេះរបស់លោក គង់ ចាន់ធីណា ធ្វើឡើងក្រោយការប្រកួតកាលពីថ្ងៃទី១៨ សីហា នៅពហុកីឡដ្ឋានជាតិ។
នេះជាលើកទី១ហើយ ដែលសហព័ន្ធរៀបចំឲ្យមានការប្រកួតផ្លូវការ តាំងពីបង្កើតឲ្យមានជាសហព័ន្ធអស់រយៈពេលជាច្រើនឆ្នាំកន្លងមកនេះ។ ក្រៅពីវាស់ស្ទង់កម្រិតសមត្ថភាព និងបច្ចេកទេសរបស់កីឡាករកីឡាការិនី ការផ្តល់ឱកាសឲ្យកីឡាករបានបញ្ចេញសមត្ថភាពបន្ទាប់ពីហ្វឹកហាត់អស់រយៈពេលជាច្រើនឆ្នាំ ក៏ជាគោលបំណងនៃព្រឹត្តិការណ៍នេះផងដែរ។
លើសពីនេះ វាគឺជាជំហានមួយមុនឈានទៅរៀបចំការប្រកួតធំៗនាពេលអនាគត។ លោក គង់ ចាន់ធីណា បានប្តេជ្ញាថា លោកខិតខំកៀរគររកជំនួយឧបត្ថម្ភពីក្រុមហ៊ុន ដៃគូសហការ និងសប្បុរសជននានារៀបចំការប្រកួតទ្រង់ទ្រាយធំ ដើម្បីពង្រឹងសមត្ថភាពកីឡាករសម្រាប់ត្រៀមចូលរួមការប្រកួតលក្ខណៈអន្តរជាតិនាពេលខាងមុខ។
សម្រាប់ការរៀបចំការប្រកួតលើកដំបូងនេះមានកីឡាករកីឡាការិនីជិត៦០នាក់ចូលរួម ដោយពួកគេប្រកួតប្រជែងលើវិញ្ញាសាតែមួយប៉ុណ្ណោះ គឺការបង្ហាញស្នៀតកាច់ការពារខ្លួន។ នៅចុងឆ្នាំ២០១៩នេះ សហព័ន្ធខ្មែរកីឡាហាប់គីដូនឹងរៀបចំការប្រកួតមួយ ដែលមានវិញ្ញាសាចន្លោះពី៤ទៅ៥វិញ្ញាសា៕
Tag:
ហាប់គីដូ
គង់ ចាន់ធីណា
© រក្សាសិទ្ធិដោយ thmeythmey.com