ជាតិ
កម្ពុជា-ចិន គ្រោងបង្កើតមជ្ឈមណ្ឌលបង្កាត់ពូជឈើ តម្លៃជាង៥លានដុល្លារ នៅឆ្នាំ២០២០
រូបពីហ្វេសប៊ុក ក្រសួងកសិកម្ម រុកក្ខាប្រមាញ់ និងនេសាទ
×![]()
ភ្នំពេញ៖ កម្ពុជានិងចិន គ្រោងបង្កើតមជ្ឈមណ្ឌលបង្កាត់ពូជឈើសំខាន់ៗ និងមានតម្លៃនៅកម្ពុជា នាឆ្នាំ២០២០។ ភាគីទាំងពីរ គ្រោងចំណាយថវិកាប្រមាណ៥,៥លានដុល្លារអាមេរិក សម្រាប់សាងសង់មជ្ឈមណ្ឌលមួយនេះ ។ នេះបើតាមការចុះផ្សាយរបស់ក្រសួងកសិកម្ម រុក្ខាប្រមាញ់ និងនេសាទ។ 
លោក Zhao Shucong នាយកអង្គការលេខាធិការដ្ឋានបណ្តាញអាស៊ីប៉ាស៊ីហ្វិក សម្រាប់ការគ្រប់គ្រងព្រៃឈើដោយនិរន្តរភាព(APFNet) ដែលមានបំណងចង់សហការជាមួយកម្ពុជា បង្កើតមជ្ឈមណ្ឌលបង្កាត់ពូជឈើនេះ ដោយសារលោកមើលឃើញថា ក្រសួង និងរដ្ឋបាលព្រៃឈើកម្ពុជា បានជួយសហការអនុវត្តគម្រោងនានាកន្លងមក ដោយសម្រេចបានលទ្ធផលគួរឲ្យកត់សម្គាល់។
ថ្លែងក្នុងជំនួបពិភាក្សាការងារជាមួយ លោក វេង សាខុន រដ្ឋមន្ត្រីក្រសួងកសិកម្ម នាថ្ងៃទី២៦ សីហានេះ លោក Zhao Shucong បានបញ្ជាក់ថា៖« អង្គការAPFNet នឹងពិនិត្យលទ្ធភាពក្នុងការបន្តការគាំទ្រជំហានទីពីរ ព្រោះយល់ឃើញថា គម្រោងបានបំពេញតួនាទីយ៉ាងសំខាន់ ក្នុងការគ្រប់គ្រងនិងអភិវឌ្ឍន៍ធនធានព្រៃឈើកម្ពុជាឡើងវិញ យ៉ាងមានប្រសិទ្ធភាព»។
រដ្ឋមន្ត្រីកសិកម្ម លោក វេង សាខុន បាននិយាយថា ជំនួយរបស់រដ្ឋាភិបាលចិន ជាពិសេសអង្គការដែលកំពុងជួយឧបត្ថម្ភគាំទ្រជាបន្តបន្ទាប់ លើគម្រោងអភិវឌ្ឍន៍វិស័យព្រៃឈើកម្ពុជា គឺជាការស្តារ និងអភិវឌ្ឍន៍ព្រៃឈើជាតិឡើងវិញ។ រដ្ឋមន្ត្រីរូបនេះ បានអះអាងប្រាប់ភាគីចិនថា ក្រសួងមានរដ្ឋបាលព្រៃឈើជាសេនាធិការ ដែលបានកំណត់យកទិសដៅគ្រប់គ្រង និងស្ដារព្រៃឈើជាអាទិភាព តាមរយៈការកំណត់យកអភិក្រម «រដ្ឋ,ឯកជន,ដៃគូអភិវឌ្ឍន៍,សហគមន៍» មកអនុវត្ត។
ចាប់តាំងពីឆ្នាំ២០០៨មក ក្រសួងកសិកម្ម និងអង្គការ APFNet បានសហការគ្នាលើគម្រោងចំនួនបួន ដែលមានថវិកាជាង ៧,៨លានដុល្លារ។ គម្រោងទាំងបួននោះ រួមមាន៖ គម្រោងទី១ ស្តីពីមុខងារចម្រុះ នៃការងារស្តារព្រៃឈើ និងការគ្រប់គ្រងតំបន់ព្រៃឈើរិចរឹលនៅកម្ពុជា។ គម្រោងទី២ ស្តីពីការរៀបចំផែនការគ្រប់គ្រងព្រៃឈើ នៅតំបន់ទីជម្រាលស្ទឹងព្រែកត្នោត ផ្អែកលើផែនទេសភាព។ គម្រោងទី៣ ស្តីពីការធ្វើសមាហរ័ណកម្ម នៃការធ្វើផែនការគ្រប់គ្រងប្រព័ន្ធកូឡូស៊ីព្រៃឈើ និងគម្រោងបង្ហាញនៅមហាអនុតំបន់មេគង្គ និងគម្រោងទី៤ ស្តីពីការបង្កើតមជ្ឈមណ្ឌលបង្កាត់ពូជឈើមានតម្លៃនៅកម្ពុជា។ ក្នុងចំណោមគម្រោងទាំងនេះ នៅសល់តែគម្រោងទី៣ និងទី៤ប៉ុណ្ណោះ ដែលត្រូវចាប់ផ្ដើមអនុវត្ត នៅឆ្នាំ២០២០៕ នេះបើតាមរដ្ឋមន្ត្រីកសិកម្ម លោក វេង សាខុន៕
Tag:
កសិកម្ម
ឈើ
មជ្ឈមណ្ឌល
© រក្សាសិទ្ធិដោយ thmeythmey.com
