រដ្ឋាភិបាល បង្ហាញឆន្ទៈធ្វើឲ្យកម្ពុជា «លែងមានផ្សែងបារី»

ជាតិ

សង្គមជាតិ

រដ្ឋាភិបាល បង្ហាញឆន្ទៈធ្វើឲ្យកម្ពុជា «លែងមានផ្សែងបារី»

26, Aug 2019 , 4:37 pm

រូបភាព

ដោយ: ថ្មីៗ

រដ្ឋាភិបាលកម្ពុជា មានទិសដៅដាក់ចេញកម្មវិធីសុខភាព នៅឆ្នាំ២០២៥ ដើម្បី «បញ្ចប់ជំងឺគ្រុនចាញ់នៅកម្ពុជា» និង មានមហិច្ឆតាកែប្រែកម្ពុជាឲ្យក្លាយទៅជាប្រទេសមួយដែល «មិនមានផ្សែងបារី»។ សម្តេចនាយករដ្ឋមន្ត្រី ហ៊ុន សែន លើកឡើងដូច្នេះ ក្នុងជំនួបជាមួយលោកវេជ្ជបណ្ឌិត Takeshi Kasai នាយកអង្គការសុខភាពពិភពលោក (WHO) របស់អង្គការសហប្រជាជាតិប្រចាំតំបន់អាស៊ីប៉ាស៊ីហ្វិក កាលពីព្រឹកថ្ងៃទី២៦ ខែសីហា ឆ្នាំ២០១៩ នៅវិមានសន្តិភាព។

នៅចំពោះមុខសម្តេចនាយករដ្ឋមន្ត្រី លោកវេជ្ជបណ្ឌិត Takeshi Kasai សរសើរថា «ប្រជាពលរដ្ឋកម្ពុជា មានអាយុវែងជាងកាលពីទសវត្សរ៍មុនៗ»។ ប៉ុន្តែទន្ទឹមនេះ លោកវេជ្ជបណ្ឌិត បានលើកឡើងថា បច្ចុប្បន្ន [កម្ពុជា] កំពុងតែស្ថិតក្នុងអន្តរកាលមួយ ដែលឆ្លងកាត់ពីការដោះស្រាយបញ្ហាជំងឺរាតត្បាតបែបបុរាណ មកជំងឺបែបសម័យ ហើយប្រជាពលរដ្ឋ បានកើតជំងឺផ្សេងៗ ដូចជា ជំងឺទឹកនោមផ្អែម និង ជំងឺលើសឈាម ជាដើម។ លោក បន្ថែមថា លើសពីនេះ ជំងឺដែលពិបាកព្យាបាលជាងមុន មានដូចជា ជំងឺប៉េស្តជ្រូក រួមទាំងជំងឺដទៃទៀត។

ជំនួបរវាងសម្តេច ហ៊ុន សែន និង លោកវេជ្ជបណ្ឌិត Takeshi Kasai

យ៉ាងណា លោកវេជ្ជបណ្ឌិត ក៏ដូចជាអង្គការសុខភាពពិភពលោក នៅតែមានជំនឿលើកម្ពុជា ក្នុងការដោះស្រាយបញ្ហានេះ ជាមួយនឹងគោលដៅអភិវឌ្ឍន៍ជាតិដោយចីរភាព។ សំណេរលើទំព័រហ្វេសប៊ុករបស់សម្តេចនាយករដ្ឋមន្ត្រី បានសរសេរពីសម្តីរបស់លោកវេជ្ជបណ្ឌិតដូច្នេះថា៖«កម្ពុជា នឹងអាចឆ្លងផុត និងទទួលបានជោគជ័យលើជំងឺ ក្នុងអន្តរកាលនេះ»។

សម្តេចនាយករដ្ឋមន្ត្រី ប្រាប់លោកវេជ្ជបណ្ឌិតវិញថា កម្ពុជា បានទប់ស្កាត់ និងទទួលបានជោគជ័យពាក់ព័ន្ធនឹងបញ្ហាជំងឺបែបប្រពៃណី ដូចជា ជំងឺស្វិតដៃជើង ជំងឺកញ្ជ្រិល ជំងឺតេតាណូស ជំងឺសារ និង ជំងឺគ្រុនផ្ដាសាយបក្សី ជាដើម ហើយ កម្ពុជា ថែមទាំងទទួលបានជោគជ័យក្នុងការទប់ស្កាត់ជំងឺអេដស៍។

ប្រមុខរដ្ឋាភិបាល អះអាងថា ពាក់ព័ន្ធនឹងជំងឺសម័យថ្មី កម្ពុជា កំពុងសហការជាមួយអង្គការសុខភាពពិភពលោក និង បណ្ដាប្រទេសដទៃទៀត ដើម្បីដាក់ចេញវិធានការទប់ស្កាត់ និង ការពារកុំឲ្យរីករាលដាលដល់ប្រជាពលរដ្ឋកម្ពុជា ក៏ដូចជា ប្រជាពលរដ្ឋនៃប្រទេសដទៃ៕