ជាតិ
លោក ប្រាក់ សុខុន នឹងចូលរួមរំឭកខួប២០ឆ្នាំ នៃការធ្វើប្រជាមតិរបស់ប្រជាជនទីម័រខាងកើត
រូបភាពពីទំព័រហ្វេសប៊ុករបស់លោក ប្រាក់ សុខុន
×![]()
ដោយ: ឡាយ សុភាវតី
ភ្នំពេញ៖ រដ្ឋមន្រី្តការបរទេស និងសហប្រតិបត្តិការអន្តរជាតិលោក ប្រាក់ សុខុន នឹងចូលរួមពិធីរំឮកខួបលើកទី២០ នៃការធ្វើប្រជាមតិរបស់ប្រជាជនទីម័រខាងកើត នៅថ្ងៃទី២៩ និង៣០សីហា នៅទីក្រុងឌីលី។ នេះបើតាមសេចក្ដីប្រកាសព័ត៌មានរបស់ក្រសួងការបរទេស នៅថ្ងៃទី២៦សីហា ឆ្នាំ២០១៩។ 
ពិធីរំលឹកខួប២០ឆ្នាំនៃការធ្វើប្រជាមតិរបស់ប្រជាជនទីម័រខាងកើត នឹងមានការចូលរួមពីតំណាងមកពីបណ្ដាប្រទេសសមាជិកអាស៊ាន ប្រទេសនិយាយភាសាព័រទុយហ្គាល់ ប្រទេសអូស្ត្រាលី និងអង្គការសហប្រជាជាតិផងដែរ។
កម្ពុជា និងទីម័រខាងកើត បានភ្ជាប់ទំនាក់ទំនងការទូតនៅថ្ងៃទី២៩ កក្កដា ឆ្នាំ២០០២ ក្រោយពីបោះឆ្នោតប្រជាមតិទាមទារឯករាជ្យ ក្រោមការឧបត្ថម្ភរបស់អង្គការសហប្រជាជាតិ ថ្ងៃទី៣០សីហា ឆ្នាំ១៩៩៩។
ដោយសារជំនួយឧបត្ថម្ភរបស់អង្គការសហប្រជាជាតិនេះ ទើបធ្វើឱ្យឥណ្ឌូណេស៊ី បោះបង់ការគ្រប់គ្រងលើដែនអធិបតេយ្យរបស់ទីម័រ ដែលនាំឱ្យប្រទេសដែនកោះមួយនេះ ក្លាយទៅជារដ្ឋឯករាជ្យមួយ នៃតំបន់អាស៊ី នៅថ្ងៃទី២០ ឧសភា ឆ្នាំ២០០២។ បច្ចុប្បន្ននេះ ប្រទេសទីម័រខាងកើត ក៏កំពុងព្យាយាមសុំចូលជាសមាជិកទី១១ នៃអាស៊ានផងដែរ ខណៈកម្ពុជា បង្ហាញពីការគាំទ្រដល់បំណងមួយនេះ៕
Tag:
ការទូត
កម្ពុជា
ទីម័រឡេស្តេ
© រក្សាសិទ្ធិដោយ thmeythmey.com
