ភាពយន្តខ្លី៦រឿងនឹងប្រកួតប្រជែងយកពានមហោស្រពភាពយន្តខ្លីចតុមុខ

ជាតិ

ភាពយន្តខ្លី៦រឿងនឹងប្រកួតប្រជែងយកពានមហោស្រពភាពយន្តខ្លីចតុមុខ

27, Aug 2019 , 11:50 am

រូបភាព

ដោយ: ប៉ូ សាគុន

ភ្នំពេញ៖ ភាពយន្តខ្លីចំនួន៦រឿង បានជាប់ក្នុងជម្រើសដើម្បីប្រកួតប្រជែកយកពានរង្វាន់ពីមហោស្រពភាពយន្តខ្លីចតុមុខលើកទី៨ក្នុងឆ្នាំ២០១៩នេះ។ មហោស្រពភាពយន្តចតុមុខ(CSFF) លើកទី៨នេះ រៀបចំដោយក្រុមភាពយន្តផ្កាឈូករ័ត្ន (Sunflower Film Alliance ហៅកាត់ថា SFA)។

មហោស្រពភាពយន្តខ្លីចតុមុខ (CSFF) បានជ្រើសរើសភាពយន្តខ្លីក្នុងស្រុកចំនួន១២ចំណងជើង ដែលមានភាពលេចធ្លោសម្រាប់ចាក់បញ្ចាំងក្នុងមហោស្រពឆ្នាំទី៨របស់ខ្លួន ក្នុង១២រឿងនោះ មានភាពយន្តខ្លី៦រឿង ជាប់ក្នុងជម្រើសដើម្បីប្រកួតប្រជែងយកពានរង្វាន់។

ភាពយន្តខ្លីទាំង៦រឿងដែលជាប់ក្នុងជម្រើសដើម្បីប្រកួតប្រជែកយកពានរង្វាន់រួមមាន ១“ខ្សែទ្រ” ដឹកនាំរឿងដោយ វង្ស បញ្ញាវ័ន្ត។ ទី២“ព្រោះបងស្រឡាញ់អូនជាង” ដឹកនាំរឿងដោយ ចាន់ ស៊ីណេត។ ទី៣ “ផ្ទះបាយ” ដឹកនាំរឿងដោយ ឯក សាម៉ីឌី។ ទី៤ “អ្នករាំរបាំ” ដឹកនាំរឿងដោយ សេង ធី។ ទី៥ “អ្នកលាបថ្នាំ” ដឹកនាំរឿងដោយ ស៊ិន ចន្ថា។ និងទី៦”មុនមេឃភ្លៀង” ដឹកនាំរឿងដោយ នេត ឥន្ទនរាសុទ្ធីដ្ឋេព។

សម្រាប់ជ័យលាភីយ៉ាងហោចណាស់ ត្រូវបែងចែកជា៤ប្រភេទ គឺទី១ ភាពយន្តខ្លីឆ្នើមរបស់កម្ពុជា ទី២ ភាពយន្តខ្លីឆ្នើមបន្ទាប់របស់កម្ពុជា ទី៣ រង្វាន់ទស្សនិកជនដល់ភាពយន្តខ្លីក្នុងស្រុក និងទី៤ រង្វាន់ទស្សនិកជន ដល់ភាពយន្តខ្លីអន្តរជាតិ។

ចំណែកភាពយន្តខ្លីចំនួន៦រឿងផ្សេងទៀត ដែលជាប់ក្នុងជម្រើសចាក់បញ្ចាំងក្នុងមហោស្រពភាពយន្តខ្លីចតុមុខដែរនោះ មានដូចជាទី១រឿង ”គម្រោង៖ស៊ើបអង្កេត” ដឹកនាំរឿងដោយ លី ពៅ។ ទី២រឿង ”ដំណក់ឈាម” ដឹកនាំរឿងដោយ ទេព បញ្ចរង្គ។ ទី៣រឿង “រត់គេច” ដឹកនាំរឿងដោយ អ៊ុក ច័ន្ទបូផៃ។ ទី៤រឿង “សុភមង្គល” ដឹកនាំរឿងដោយ ឌុច ផ្លែកកន្និដ្ឋា។ ទី៥រឿង “អ្នកណា” ដឹកនាំរឿងដោយ សួន គីមសេង និងទី៦រឿង “ជំងឺផ្លូវចិត្ត” ដឹកនាំរឿងដោយ សុង សៀកឡេង។

ភាពយន្តខ្លីទាំង១២រឿងនេះ នឹងចាក់បញ្ចាំងជូនសាធារណជនទស្សនាដោយមិនគិតថ្លៃនៅសាលចតុមុខតែមួយគត់ ចាប់ពីថ្ងៃទី៥ដល់ថ្ងៃទី៨កញ្ញាឆ្នាំ២០១៩ខាងមុខនេះ។

សូមបញ្ជាក់ថាកាលពីឆ្នាំ២០១៨កន្លងទៅ ភាពយន្តខ្លីដែលបានទទួលជ័យលាភីភាពយន្តខ្លីឆ្នើមគឺរឿង”ខ្យល់ខែកុម្ភៈ” ដែលដឹកនាំដោយលោក មុន្នី កណ្ណដារង្គ៕