ជាតិ
បទយកការណ៍ / បទសម្ភាសន៍
កញ្ញា សាន ដានិច៖ផលិតករភាពយន្តជំនាន់ក្រោយមានសមត្ថភាពហើយ តែនៅខ្វះឱកាស និងការគាំទ្រ
× ភ្នំពេញ៖ កញ្ញា សាន ដានិច ជាផលិតករភាពយន្តវ័យក្មេងមួយរូប ដែលស្នាដៃភាពយន្តខ្លីលើកដំបូងរបស់នាង កំពុងទទួលបានការកោតស្ងប់ស្ងែងទាំងនៅក្នុងមហោស្រពភាពយន្តជាតិ និងអន្តរជាតិ។ ភាពយន្តខ្លីដែលមានចំណងជើងថា «មួយលានឆ្នាំ» ក្រោមដំណើរការសរសេរសាច់រឿង និងដឹកនាំការផលិតដោយផ្ទាល់ពី ផលិតករជើងថ្មីរូបនេះ បានឈ្នះពានរង្វាន់ជាបន្តបន្ទាប់ ត្រឹមតែជាង១ឆ្នាំប៉ុណ្ណោះ។ ដ្បិតតែទើបតែបានដើរលើវិថីភាពយន្តប្រមាណ បួន-ប្រាំឆ្នាំមែន ប៉ុន្តែដានិចមើលឃើញថា ផលិតករភាពយន្តវ័យក្មេងជំនាន់នេះ មានសមត្ថភាពពូកែៗច្រើន ប៉ុន្តែពួកគាត់នៅខ្វះការគាំត្រ និងឱកាសបញ្ចេញគំនិត និងស្នាដៃទាំងនោះ។ កញ្ញា សាន ដានិច បញ្ជាក់ដូច្នេះ៖«ខ្ញុំគិតថាមានហើយអ្នកដឹកនាំរឿង អ្នកសរសេររឿងក្មេងៗជំនាន់ក្រោយនេះ ខ្ញុំជឿថាគាត់មានរឿងប្លែកៗច្រើន មានអីដែលគាត់ចង់បញ្ចេញច្រើន គ្រាន់តែពួកគាត់មិនទាន់មានឱកាស និងខ្វះការគាំទ្រ។ អ៊ីចឹងវាពិបាក»។
ដើម្បីជ្រាបលម្អិត សូមអញ្ជើញស្តាប់កិច្ចសម្ភាសរវាង កញ្ញា ខន ចំប៉ា នៃសារព័ត៌មានថ្មីៗ និងកញ្ញា សាន ដានិច ដូចតទៅ៖
ភាពយន្តខ្លី«មួយលានឆ្នាំ» ឬ «A MILLION YEARS» ទើបតែទទួលបានពាន់រង្វាន់ ARTE Short Film Award ក្នុងការប្រកួតប្រជែងជាលក្ខណៈអន្តរជាតិ នៅឯមហោស្រព Kurzfilm Festival Hamburg ប្រទេសអាល្លឺម៉ង់ កាលពីពេលថ្មីៗនេះ។ «មួយលានឆ្នាំ» ជាភាពយន្តបែបសហសម័យដែលរៀបរាប់ពីអារម្មណ៍ មិនធ្លាប់និយាយ ឬបញ្ចេញមកខាងក្រៅរបស់យុវតីខ្មែរម្នាក់។ កញ្ញា សាន ដានិច ជាផលិតករភាពយន្តនេះ បានលើកឡើងថា ការទទួលបានពាននេះ គឺជារឿងដែលមិននឹកស្មានដល់សម្រាប់កញ្ញា ក្នុងនាមផលិតករភាពយន្តជើងថ្មី ហើយក៏ជាស្នាដៃភាពយន្តលើកដំបូងរបស់ខ្លួនផងនោះ។ រយៈពេលជាង១ឆ្នាំ កញ្ញា សាន ដានិច បានយកភាពយន្តខ្លីរបស់ខ្លួន ទៅចាក់បញ្ចាំងនៅតាមមហោស្រពថ្នាក់ជាតិ និងថ្នាក់អន្តរជាតិ ជាង១០ប្រទេសរួចទៅហើយ។
កញ្ញា សាន ដានិច បានប្រឡូកចូលក្នុងវិស័យភាពយន្តប្រមាណ បួន-ប្រាំឆ្នាំមកហើយ។ ដ្បិតតែក្នុងរយៈពេលខ្លី ប៉ុន្តែដានិចមើលឃើញថា ផលិតករភាពយន្តជំនាន់ថ្មីនេះ មានសមត្ថភាពពូកែៗច្រើន ប៉ុន្តែពួកគាត់នៅខ្វះការគាំទ្រ និងឱកាសបញ្ចេញគំនិត និងស្នាដៃទាំងនោះ។ ផលិតករវ័យក្មេង ចង់ឃើញរដ្ឋាភិបាល និងស្ថាប័នពាក់ព័ន្ធ រៀបចំឲ្យមានការប្រកួតប្រជែង និងការផ្តល់ពានរង្វាន់តាមផ្នែកនានានៅក្នុងការផលិតភាពយន្តនេះ ឲ្យមានភាពសម្បូរបែបជាងនេះទៀត។ សម្រាប់កញ្ញា ដានិច ធ្វើដូច្នេះ មិនត្រឹមតែជាការសកម្មភាពដែលជំរុញឲ្យមានការផលិតកុនកាន់តែច្រើនប៉ុណ្ណោះទេ ប៉ុន្តែជារូបភាពមួយដែលជំរុញទឹកចិត្តដល់ផលិតករវ័យក្មេង ក៏ដូចជាអ្នកពាក់ព័ន្ធនឹងវិស័យភាពយន្តនេះផងដែរ។
ទោះជាយ៉ាងនេះក្តី កញ្ញា សាន ដានិច ក៏មើលឃើញភាពវិជ្ជមាន នៅក្នុងវិស័យភាពយន្តនេះដែរ ដែលនឹងរីកចម្រើនទៅមុខ ប៉ុន្តែនៅក្នុងល្បឿនមួយដែលយឺត។ តាមកញ្ញា ដានិច ដើម្បីឲ្យវិស័យភាពយន្តមានសំទុះរីកចម្រើនលឿន ទាមទារឲ្យមានការចូលរួមគាំទ្រពីគ្រប់ភាគី ទាំងរដ្ឋាភិបាល ទស្សនិកជន និងផលិតភាពយន្ត ចម្រុះរសជាតិឲ្យបានកាន់តែច្រើន៕
Tag:
សាន ដានិច
ភាពយន្តខ្លី
ភាពយន្ត
កុន
© រក្សាសិទ្ធិដោយ thmeythmey.com