ជាតិ
អាជ្ញាធរ ផ្អាកការសាងសង់របស់ក្រុមហ៊ុនចិនមួយនៅទួលគោក ក្រោមហេតុផលថា គ្មានច្បាប់
× ក្រុមហ៊ុន Discover New City (DNC) ដែលកំពុងសាងសង់គម្រោង DNC Mall ក្នុងខណ្ឌទួលគោក ត្រូវបានអាជ្ញាធរ ផ្អាកការដ្ឋានសាងសង់ ក្រោយរកឃើញថាគ្មានច្បាប់ឬលិខិតអនុញ្ញាត។
លោក ឯក ឃុនដឿន អភិបាលខណ្ឌទួលគោក ប្រាប់សារព័ត៌មានថ្មីៗ តាមទូរស័ព្ទនៅថ្ងៃទី២៨សីហានេះថា៖«ការដ្ឋាន DNC បានផ្អាកការសាងសង់ប្រមាណជាង៣អាទិត្យហើយ ដោយសារមិនមានច្បាប់អនុញ្ញាត ឥឡូវរង់ចាំលិខិតអនុញ្ញាតពីខាងក្រសួងរៀបចំដែនដី ទើបអាចបន្តការសាងសង់បន្តទៀតបាន»។
មានលេចឮព័ត៌មានថា មានការផ្ដល់លុយនិងរថយន្តដល់អាជ្ញាធរ ដើម្បីបានសាង់សងអគារនេះ។ អភិបាលខណ្ឌទួលគោក អះអាងថា ក្រុមហ៊ុន DNC ពិតជាធ្លាប់ប្រគល់រថយន្តកូរ៉េ១គ្រឿងពិតមែន គឺសម្រាប់បម្រើប្រយោជន៍សាធារណៈនៅក្នុងខណ្ឌ។ ប៉ុន្តែ លោក បដិសេធថា ករណីលុយគឺមិនមានទេ។
ទន្ទឹមនេះ អភិបាលខណ្ឌ អំពាវនាវឲ្យអ្នកវិនិយោគទាំងអស់មុន នឹងសាងសង់អគារអាចសិក្សាពីច្បាប់សុំការអនុញ្ញាតពីខាងអាជ្ញាធរបន្ថែមបាន ហើយអាជ្ញាធរនឹងខិតខំដោះស្រាយជូនអ្នកវិនិយោគនិងពលរដ្ឋ។
ម្ចាស់ក្រុមហ៊ុន Discover New City (DNC) មានឈ្មោះ LIAO JUNNA ភេទស្រី បើកការដ្ឋានសាងសង់ DNC Mall លើផ្ទៃដីទំហំជាង៦០០០ម៉ែត្រការ៉េ ដែលស្ថិតនៅផ្លូវលេខ៣១៥ សង្កាត់បឹងកក់២ ខណ្ឌទួលគោក រាជធានីភ្នំពេញ៕
Tag:
រាជធានីភ្នំពេញ
ការដ្ឋានសាងសង់
DNC
© រក្សាសិទ្ធិដោយ thmeythmey.com