ជាតិ
សេដ្ឋកិច្ច
លោក សុខ ទូច៖ ការងារសហក្រសួង បើខុសទម្លាក់លើគ្នា តែបើត្រូវវិញ ដណ្តើមគុណសម្បត្តិ
×![]()
ភ្នំពេញ៖ មន្ត្រីស្រុកខ្មែរ តែងតែខ្វះការទទួលខុសត្រូវ និងទម្លាក់កំហុសឱ្យគ្នានៅពេលមានបញ្ហា ប៉ុន្តែចូលចិត្តចេញមុខមាត់ នៅពេលមានគុណសម្បត្តិ។ នេះជាការមើលឃើញរបស់លោក សុខ ទូច ប្រធានរាជបណ្ឌិត្យសភា ដែលនិយាយពីចំណុចនេះ នៅក្នុងសន្និសីទកាសែតស្តីពី«មីក្រូហិរញ្ញវត្ថុ និងផលប៉ះពាល់» នៅព្រឹកថ្ងៃទី២៩ សីហានេះ។
មុននិយាយពីចំណុចអវិជ្ជមាននៃការទទួលខុសត្រូវរបស់មន្ត្រីខ្មែរនេះ លោក សុខ ទូច បានលើកឡើងពីការស្រាវជ្រាវរបស់ខ្លួនលើកិច្ចការហិរញ្ញវត្ថុនោះ គឺត្រូវផ្អែកលើទឡ្ហីករណ៍ចំនួន៤ ដើម្បីជាធាតុផ្សំក្នុងការវាយតម្លៃ និងបញ្ជូនរបាយការណ៍រដ្ឋាភិបាល ពិនិត្យនឹងសម្រេចលើបញ្ហាសេវាកម្មឥណទាននេះ។ ប្រភពព័ត៌មានទាំង៤ ដែលលោក សុខ ទូច យកធ្វើជាតឹកតាងនោះ គឺទាក់ទងនឹងទ្រឹស្តី ឬប្រភពនៃដើមទុនឥណទាន, ស្រាវជ្រាវទៅលើស្ថាប័នពាក់ព័ន្ធ, សិក្សាទៅលើគ្រឹះស្ថានមីក្រូហិរញ្ញវត្ថុទាំងអស់ ដែលបានចុះបញ្ជី ឬមិនចុះបញ្ជី និងការសិក្សាទៅលើប្រជាជន ឬអ្នកទទួលបានសេវាកម្មឥណទាន។
ទាក់ទងនឹងចំណុចស្រាវជ្រាវលើស្ថាប័នពាក់ព័ន្ធនេះ លោក សុខ ទូច បានកត់សម្គាល់ឃើញថា មន្ត្រីនៅកម្ពុជាភាគច្រើន តែងតែងខ្វះការទទួលខុសត្រូវ ហើយទម្លាក់កំហុកដាក់គ្នាទៅវិញទៅមក។ ប៉ុន្តែបើសិនជាករណីមានគុណសម្បត្តិវិញ លោក សុខ ទូច បានសង្កេតឃើញថា មន្ត្រីទាំងនោះភាគច្រើន នាំគ្នាយកមុខមាត់ ដើម្បីបង្ហាញថា អ្វីដែលកើតឡើងនេះ គឺកើតចេញពីការខិតខំប្រឹងប្រែងរបស់ខ្លួន។
ថ្លែងនៅក្នុងសន្និសីទកាសែតស្តីពី«មីក្រូហិរញ្ញវត្ថុ និងផលប៉ះពាល់» នៅព្រឹកថ្ងៃទី២៩ សីហានេះ ប្រធានរាជបណ្ឌិត្យសភា បាននិយាយដូច្នេះថា៖«ចំណុចទី២ យើងស្រាវជ្រាវលើស្ថាប័នពាក់ព័ន្ធ ពីព្រោះនៅស្រុកយើងតែងតែទម្លាក់(បញ្ហា)លើគ្នា ខ្វះការទទួលខុសត្រូវ ព្រោះយើងបង្កើតសហក្រសួង។ ខ្ញុំគ្រាន់តែឧទាហរណ៍ទេ គ្រាន់តែផ្នែកកសិកម្ម មានក្រសួងអភិវឌ្ឍជនបទ , ក្រសួងកសិកម្ម , ក្រសួងធនធានទឹក អ៊ីចឹង(ក្រសួង) ទាំងបីនេះ ឱ្យតែខុស គឺអត់ដែលមានការទទួលខុសត្រូវរៀងខ្លួនទេ គឺចាប់ផ្ដើមទម្លាក់(បញ្ហា) ថារឿងនេះអញ្ចេះ រឿងនោះអញ្ចោះ ។ នៅពេលមានគុណសម្បត្តិ គឺមក(ចំណុច)ពីនេះ មកពីនោះ»។
កន្លងមករដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានលើកឡើងពីបញ្ហាជាន់ការងាររវាងក្រសួងកសិកម្ម និងក្រសួងធនធានទឹក និងឧតុនិយម កាលពីថ្ងៃទី៩ សីហា ថា ផ្នែកមួយចំនួននៅក្នុងការងារកសិកម្មនេះ វាមានភាពស្រដៀងគ្នា ដែលលោកក៏ពិបាកនឹងអនុវត្តដែរ ។ ថ្លែងក្នុងកម្មវិធីមហាសន្និបាត និងបោះឆ្នោតអាណត្តិទី៣របស់សហព័ន្ធស្រូវអង្ករកម្ពុជា លោក វេង សាខុន បាននិយាយដូច្នេះថា៖«ខ្ញុំឥឡូវនេះ លែងហ៊ានទៅដល់វាលស្រែហើយ ឱ្យតែដល់វាលស្រែហ្នឹង គឺជាកន្លែងប្រយុទ្ធរបស់គេ (ក្រសួងធនធានទឹក) ថាខ្ញុំទៅលូកលាន់ការងាររបស់គេ មិនអាចទៅមើលស្រូវបានទេឥឡូវនេះ គឺថាវាយប្រហារតែម្ដង ហាក់ដូចជាមិនត្រូវគ្នា»។
ត្រង់ចំណុចនេះអ្នកវិភាគ មើលឃើញថា សម្តីរបស់លោក វេង សាខុន បង្ហាញពីភាពអវិជ្ជមាន ឬការមិនយល់ចិត្តគ្នា ក្នុងកិច្ចសហការរបស់អន្តរក្រសួង។ លោក មាស នី បាននិយាយថា ការសហការនៃអន្តរក្រសួងកន្លងមកនេះ វាមិនបានផ្ដល់ផលវិជ្ជមានភ្លាមៗដល់ពលរដ្ឋនោះទេ ពោលគឺទាល់តែមានសម្តីបញ្ជាផ្ទាល់សម្ដេចនាយករដ្ឋមន្ត្រី ហ៊ុន សែន។
អ្នកតាមដានស្ថានការណ៍សង្គម ក៏ស្នើឱ្យរដ្ឋាភិបាលពិចារណាកែទម្រង់ឡើងវិញ ក្នុងការបង្រួមក្រសួងពាក់ព័ន្ធនានាមកសល់ត្រឹមតែ១៦ ទៅ ១៨ អង្គភាពបានហើយ ដើម្បីប្រសិទ្ធភាពនៃការអនុវត្តការងារតាមគោលនយោបាយរដ្ឋាភិបាល។ ក្នុងនោះក្រសួងពាក់ព័ន្ធ ដែលអ្នកទាំងពីរមើលឃើញថា គួរតែច្របាច់បញ្ចូលគ្នាតែមួយនោះ រួមមានក្រសួងកសិកម្ម រុក្ខាប្រមាញ់ និងនេសាទ , ក្រសួងធនធានទឹក, ក្រសួងអភិវឌ្ឍន៍ជនបទជាដើម។ ចំណែកក្រសួងរ៉ែ និងថាមពល ,ក្រសួងឧស្សាហកម្ម និងសិប្បកម្ម ក៏រួមបញ្ចូលគ្នាវិញដែរ៕
Tag:
សុខ ទូច
រាជបណ្ឌិត្យសភា
© រក្សាសិទ្ធិដោយ thmeythmey.com
