សុខភាព
អន្តរជាតិ
ការប្រើប្រាស់មុងជ្រលក់ថ្នាំជាប់លាប់ជាគន្លឹះក្នុងការប្រយុទ្ធប្រឆាំងនឹងជំងឺគ្រុនចាញ់
រូបភាព៖ AFP
×![]()
ដោយ: VOA
វ៉ាស៊ីនតោន ៖ ជំងឺគ្រុនចាញ់សម្លាប់មនុស្សជាង៤០០.០០០នាក់ ជារៀងរាល់ឆ្នាំ ប៉ុន្តែលោកវេជ្ជបណ្ឌិត Paul Krezanoski ដែលជាអ្នកជំនាញបង្ការជំងឺគ្រុនចាញ់នេះបាននិយាយថា មុងជ្រលក់ថ្នាំអាចជួយកាត់បន្ថយចំនួនមនុស្សស្លាប់បាន។ លោក វេជ្ជបណ្ឌិត Krezanoski បានថ្លែងថា៖
«ក្នុងរយៈពេល១៥ឆ្នាំមុន រហូតដល់ឆ្នាំ២០១៥ មានការប៉ាន់ស្មានថា ការឆ្លងជំងឺគ្រុនចាញ់បានថយចុះប្រមាណជាពាក់កណ្តាល ហើយ៦០%នៃការធ្លាក់ចុះនេះគឺដោយសារតែការប្រើប្រាស់មុងជ្រលក់ថ្នាំ»។
ទោះជាយ៉ាងណាក្តី អង្គការសុខភាពពិភពលោក WHO បានរបាយការណ៍ថា កិច្ចប្រឹងប្រែងដើម្បីបញ្ឈប់ការរីករាលដាលនៃជំងឺគ្រុនចាញ់ត្រូវបានជាប់គាំង តាំងពីឆ្នាំ២០១៥មក។ ការណ៍នេះធ្វើឲ្យអ្នកស្រាវជ្រាវមួយចំនួនយល់ថា មុងអាចគ្មានប្រសិទ្ធភាពដូចកាលពីមុននោះទេ។
លោកវេជ្ជបណ្ឌិត Krezanoski ចង់ដឹងថាតើមនុស្សម្នាពិតជាប្រើប្រាស់មុងជ្រលក់ថ្នាំតាមការណែនាំដែរឬទេ។ លោកបានសហការជាមួយនឹងសហគមន៍សម្រាប់បច្ចេកវិទ្យាវេជ្ជសាស្ត្រមានតម្លៃសមរម្យ ឬហៅជាភាសាអង់គ្លេសថា Consortium for Affordable Medical Technologies ក្នុងប្រទេសអ៊ូហ្គាន់ដា ដើម្បីបង្កើតឧបករណ៍ឈ្មោះ SmartNet ដែលបើប្រាស់សរសៃមុង ដើម្បីតាមដានថាតើមុងត្រូវបានគេប្រើប្រាស់ដែរឬទេ។ លោកបានស្នើឲ្យគ្រួសារក្នុងប្រទេសអ៊ូហ្គាន់ដាប្រើប្រាស់ឧបករណ៍នោះ ដូចពួកគេប្រើប្រាស់មុងធម្មតា។
លោកបាននិយាយថា៖ «អ្នកអាចយល់ហើយថា ប្រសិនបើពួកគេដឹងថា មានការតាមដានទៅលើការប្រើមុងរបស់ពួកគេ នោះពួកគេនឹងប្រើវាជាប់លាប់ ហើយនេះជាអ្វីដែលអ្នកស្រាវជ្រាវចង់បាន ប៉ុន្តែរឿងនេះមិនបានកើតឡើងអីចឹងទេ ហើយវាបានប្រាប់ខ្ញុំថា ការប្រើប្រាស់មុងមានភាពខុសគ្នាច្រើនជាងអ្វីដែលខ្ញុំធ្លាប់បានដឹងទៅទៀត»។
លោកស្រី Kate Zinszer ដែលជាអ្នកជំនាញនៃរោគរាតត្បាតនៅឯសាកលវិទ្យាល័យ Montreal បាននិយាយថា ការរកឃើញនេះជួយពន្យល់ពីការធ្លាក់ចុះមួយចំនួននៅក្នុងការប្រយុទ្ធប្រឆាំងជំងឺគ្រុនចាញ់។
លោកស្រី ZINSZER បាននិយាយថា៖
«ខ្ញុំគិតថា វាជាគំនិតច្នៃប្រឌិតមួយ។ ខ្ញុំគិតថាការវិនិយោគលើមុងនេះ សំខាន់បំផុតគឺត្រូវដឹងថាមុងទាំងនោះពិតជាត្រូវបានគេប្រើប្រាស់ពិតមែនឬទេ។ ដូច្នេះខ្ញុំគិតថា នេះជាការរីកចម្រើនមួយដ៏សំខាន់»។
លោកវេជ្ជបណ្ឌិត Krezanoski សង្ឃឹមថា នៅទីបំផុតលោកអាចបង្ហាញពីទំនាក់ទំនងរវាងរយៈពេលដែលក្មេងប្រើប្រាស់មុង និងហានិភ័យនៃការឆ្លងជំងឺគ្រុនចាញ់។
លោកវេជ្ជបណ្ឌិត KREZANOSKI បាននិយាយថា៖
«ខ្ញុំគិតថា ឧបករណ៍នេះនឹងជួយដល់សហគមន៍ប្រយុទ្ធប្រឆាំងជំងឺគ្រុនចាញ់អន្តរជាតិកំណត់បានច្បាស់ពីថវិកាវិនិយោគដែលយើងត្រូវការដើម្បីចែកចាយមុង និងជួយកំណត់ពីឥរិយាបថរបស់មនុស្សក្នុងការប្រើប្រាស់មុង និងជួយយើងឲ្យស្វែងយល់ពីវិធីល្អបំផុតក្នុងការកាត់បន្ថយជំងឺគ្រុនចាញ់នៅពេលអនាគត»។
បើតាមអង្គការសុខភាពពិភពលោក ប្រទេសចំនួន២១មានសក្តានុពលក្នុងការលុបបំបាត់ជំងឺគ្រុនចាញ់នៅត្រឹមឆ្នាំ២០២០ ហើយការប្រើប្រាស់មុងត្រឹមត្រូវអាចជាផ្នែកមួយនៃយុទ្ធសាស្ត្រនេះ៕
© រក្សាសិទ្ធិដោយ thmeythmey.com
