អន្តរជាតិ
កូរ៉េខាងជើង បន្តកែរដ្ឋធម្មនុញ្ញឲ្យលោក គីម ជុងអ៊ុន ក្លាយជាប្រមុខរដ្ឋពេញលក្ខណៈ មេដឹកនាំកំពូលកូរ៉េខាងជើង គីម ជុងអ៊ុន ។ រូបថត KCNA
× សភាកូរ៉េខាងជើង នៅថ្ងៃទី២៩ ខែសីហា បានបន្តធ្វើវិសោធនកម្មរដ្ឋធម្មនុញ្ញរបស់ខ្លួន ដែលបានពង្រឹងអំណាចមេដឹកនាំកូរ៉េខាងជើង គីម ជុងអ៊ុន កាន់តែណែនពេញដៃថែមទៀត។ នាកិច្ចប្រជុំលើកទីពីរក្នុងឆ្នាំ២០១៩ សភាកូរ៉េខាងជើង បានប្រគល់កិច្ចការនានាដែលជាភារកិច្ចសម្រាប់ប្រមុខរដ្ឋទៅឲ្យលោក គីម ជុងអ៊ុន ។ វិសោធនកម្មលើកនេះ នឹងធ្វើឲ្យលោក គីម មានឋានៈស្មើមុខស្មើមាត់ដូចប្រមុខរដ្ឋប្រទេសដទៃទៀត។
សភាកូរ៉េខាងជើង បើកកិច្ចប្រជុំពេញអង្គលើកទីពីរនៃអាណត្តិទី១៤ របស់ខ្លួននៅថ្ងៃទី២៩ ខែសីហា។ ទីភ្នាក់ងារព័ត៌មានរដ្ឋកូរ៉េខាងជើង (KCNA) ផ្សាយថា វិសោធនកម្មនិងការបំពេញបន្ថែមរដ្ឋធម្មនុញ្ញសង្គមនិយមរបស់ប្រទេស ជារបៀបវារៈសំខាន់។ ការកែប្រែលើកនេះ ក៏បានផ្ដល់អំណាចរដ្ឋច្រើនថែមទៀតទៅឲ្យប្រមុខដឹកនាំវ័យក្មេងលោក គីម ជុងអ៊ុន ដែលគ្រប់គ្រងកូរ៉េខាងជើងគ្រប់វិស័យ គ្រប់រឿងទៅហើយនោះ។
អ្វីដែលត្រូវបន្ថែមទៅក្នុងរដ្ឋធម្មនុញ្ញកូរ៉េខាងជើង គឺឋានៈរបស់ប្រធានគណៈកម្មការកិច្ចការរដ្ឋ ដែលកាន់កាប់ដោយលោក គីម ។ នាកិច្ចប្រជុំខែមេសាកន្លងទៅ ដោយសារតំណែងប្រធានគណៈកម្មការកិច្ចការរដ្ឋ លោក គីម ត្រូវបានផ្ដល់ឋានៈជាប្រមុខរដ្ឋរបស់កូរ៉េខាងជើង។ កាលពីមុន តំណែងប្រមុខរដ្ឋនេះ ត្រូវបានកាន់កាប់ដោយប្រធានសភាកូរ៉េខាងជើង។ លើសពីនោះ លោក គីម ក៏ជាអគ្គមេបញ្ជាការកងទ័ពប្រជាជនកូរ៉េផងដែរ។
សម្រាប់ជំនួបខែសីហានេះ ប្រធានសភាកូរ៉េខាងជើង ឆេ យ៉ុងហេ (Choe Ryong-hae) ប្រកាសថា ប្រធានគណៈកម្មការកិច្ចការរដ្ឋ គឺជាមេដឹកនាំកំពូលរបស់បក្ស រដ្ឋ និងកងទ័ពកូរ៉េខាងជើងដែលត្រូវបានជ្រើសរើសដោយឆន្ទៈ និងការចង់បានរបស់ប្រជាជនកូរ៉េទាំងអស់។ ក្នុងបញ្ញត្តិថ្មីនេះ លោក គីម ដែលជាប្រធានគណៈកម្មការទើបបង្កើតនៅឆ្នាំ២០១៦ មានអំណាចចេញបញ្ជា ក្រិត្យ តែងតែង ឬកោះហៅអគ្គរដ្ឋទូតនៅឯបរទេស។
អ្វីគួរឲ្យចាប់អារម្មណ៍នោះ ប្រធានគណៈកម្មការកិច្ចការរដ្ឋ ត្រូវជ្រើសរើសដោយសភា ប៉ុន្តែមិនមែនជាសមាជិកសភាឡើយ។ ការប្រែរដ្ឋធម្មនុញ្ញជាបន្តបន្ទាប់ ជាមិនធ្លាប់មានឡើយនៅកូរ៉េខាងជើង។ ប៉ុន្តែលោក គីម បានកែប្រែច្បាប់កំពូលនេះជាច្រើនលើក ដើម្បីគ្រប់គ្រងលើកិច្ចការទាំងអម្បាលម៉ានក្នុងប្រទេស។ ការក្លាយជាប្រមុខរដ្ឋកូរ៉េខាងជើងនេះ ត្រូវបានគេមើលឃើញថា ជាការផ្លាស់ប្ដូរមុខមាត់កូរ៉េខាងជើង ឲ្យមានប្រព័ន្ធដឹកនាំមួយដូចប្រទេសឯទៀតដែរ។
ទោះជាក្លាយជាប្រមុខរដ្ឋ ឬក្ដាប់កិច្ចការរដ្ឋក្ដី ធាតុពិតទៅ លោក គីម នៅតែជាមេដឹកនាំកំពូលរបស់កូរ៉េខាងជើងដដែល។ ប៉ុន្តែវាអាចធ្វើឲ្យកូរ៉េខាងជើងមានប្រព័ន្ធដូចប្រទេសនានា ដែលមានការបែងចែកស្ថាប័នរដ្ឋដាច់ដោយឡែក ទោះក្រោយខ្នងមនុស្សតែម្នាក់ជាអ្នកដឹកនាំក៏ដោយចុះ។ ជាប្រមុខរដ្ឋ លោក គីម ក៏អាចទទួលបដិសណ្ឋារកិច្ចអធិកអធមដូចលោកប្រធានាធិបតីចិន ស៊ី ជិនភីង, ប្រធានាធិបតីអាមេរិក ដូណាល់ ត្រាំ ឬប្រធានាធិបតីរុស្ស៊ី វ្ល៉ាឌីមៀ ពូទីន ដូច្នោះដែរ៕
Tag:
កូរ៉េខាងជើង
គីម ជុងអ៊ុន
© រក្សាសិទ្ធិដោយ thmeythmey.com