ជាតិ
ប្រតិបត្តិករទេសចរណ៍ថា រដ្ឋាភិបាលគួរលើកលែងទិដ្ឋាការ ដើម្បីដោះស្រោយបញ្ហាទេសចរនៅសៀមរាបធ្លាក់ខ្លាំង
× សៀមរាប៖ ចំនួនទេសចរក្នុងខេត្តសៀមរាបធ្លាក់ចុះខ្លាំង ធ្វើឱ្យប្រតិបត្តិករទេសចរណ៍ជាច្រើនកំពុងប្រឈម នឹងការបិទអាជីវកម្ម និងខ្លះទៀតបានបិទទ្វារទៅហើយ។ ជុំវិញបញ្ហានេះ ក្រុមប្រតិបត្តិករ បានជួបប្រជុំពិភាក្សារគ្នាជាប្រចាំ រកដំណោះស្រាយបន្ទាន់ដែលគួរតែធ្វើ ដើម្បីឱ្យទេសចរកើនឡើងវិញ។ ប្រតិបត្ដិករទេសចរណ៍យល់ថា រាជរដ្ឋាភិបាលគួរពិចារណា លើកលែងទិដ្ឋាការដល់ទេសចរ ដើម្បីដោះស្រាយបញ្ហាបន្ទាន់នេះ។
សូមស្ដាប់សំឡេងរបស់លោក កៅ ហ្វីលីព ក្នុងបទសម្ភាសជាមួយអ្នកសារព័ត៌មានក្នុងពិធីជួបជុំក្រុមប្រតិបត្តិករទេសចរណ៍ខេត្តសៀមរាប៖
ការធ្លាក់ចុះខ្លាំង នៃចំនួនភ្ញៀវទេសចរក្នុងខេត្តសៀមរាប បានកើតឡើងប្រមាណមួយឆ្នាំមកហើយ ។ ទាំងក្រសួង, ស្ថាប័នពាក់ព័ន្ធ រួមទាំងប្រតិបត្តករ សុទ្ធតែបានទទួលស្គាល់ថា នេះជាបញ្ហា ដែលត្រូវរកដំណោះស្រាយឲ្យបានលឿនបំផុត។ លោក កៅ ហ្វីលីព ប្រធានក្លិបប្រតិបត្តិករទេសចរណ៍ លើកឡើងក្នុងជំនួបបប្រតិបត្តិករទេសចរណ៍ លើកទី៤៨ កាលពីថ្ងៃទី៣០ ខែសីហា កន្លងទៅថា ទេសចរឆ្នាំនេះ ធ្លាក់ខ្លាំងគួរឱ្យកត់សម្គាល់ បើធៀបនឹងឆ្នាំមុនៗ។
ដំណោះស្រាយបញ្ហាធ្លាក់ចុះទេសចរនៅសៀមរាប អ្នកជំនាញវិស័យទេសចរណ៍រូបនេះ យល់ថារដ្ឋាភិបាលគួរពិចារណាលើកលែងទិដ្ឋាការ ដូចប្រទេសជិតខាងដែលគេបានធ្វើ។ លោក កៅ ហ្វីលីពបន្ថែម៖ «ដ្បិតវាមានការខាតបង់បន្ដិចមែន តែវាក៏នឹងទទួលបានផលប្រយោជន៍ ក្នុងកម្រិតមួយវិញដែរ ប្រសិនបើមិនចង់ឱ្យវិស័យទេសចរណ៍កម្ពុជាជួបផលលំបាកជាងនេះ»។
លោក កៅ ហ្វីលីព ពន្យល់បន្តដោយយកប្រទេសវៀតណាម និងថៃមកធ្វើជាឧទាហរណ៍។ ករណីប្រទេសថៃដែលកាលពីឆ្នាំ២០១៨ មានករណីលិចកប៉ាល់នៅកោះភូកេត ភ្លាមៗរដ្ឋាភិបាលបានចេញគោលការណ៍មិនយកទិដ្ឋាការទេសចរចិន ដូច្នេះ គេក៏ស្រូបទេសចរចិនបានច្រើន និងមានការកើនឡើងជាងពេលមុន។ សម្រាប់វៀតណាមវិញ លោក ហ្វីលីព យល់ថា តម្លៃនៃជើងហោះហើរមានតម្លៃធូរថ្លៃ បើធៀបទៅនឹងប្រទេសក្នុងតំបន់ជុំវិញ ហើយអ្នកដែលហោះហើរចូលប្រទេសនេះ ច្រើនមកពីអឺរ៉ុប និងជប៉ុន។ ថ្មីៗនេះ មានការគិតគូរពីការលើកលែងទិដ្ឋាការ ពីសហគមន៍អឺរ៉ុបទៀតផង៕
Tag:
ទេសចរណ៍
ទេសចរ
សៀមរាប
កៅ ហ្វីលីព
ទិដ្ឋាការ
© រក្សាសិទ្ធិដោយ thmeythmey.com