ផ្សិត រោមសត្វ ជាតិជ័រ សណ្តែកដី ពពួកសត្វមានសំបក សុទ្ធតែត្រូវបានគេដឹងថា ជាមូលហេតុនាំឲ្យមានប្រតិកម្មអាលែកហ្ស៊ីលើមនុស្សមួយចំនួន។ តើអ្នកមានដឹងទេថា មនុស្សយើងក៏អាចមានប្រតិកម្មអាលែកហ្ស៊ីនឹងពន្លឺព្រះអាទិត្យដែរ? បើសិនជាអ្នកសង្ស័យថាខ្លួនឯងកំពុងតែមានបញ្ហាប្រតិកម្មអាលែកហ្ស៊ីនឹងពន្លឺព្រះអាទិត្យមែន អ្នកកំពុងតែអានអត្ថបទត្រូវហើយ។ ប្រតិកម្មអាលែកហ្ស៊ីនឹងព្រះអាទិត្យអាចមានលក្ខណៈរបស់វាច្រើន ហើយទំរង់ដែលកើតឡើងញឹកញាប់បំផុតនោះគឺ Polymorphic Light Eruption ឬហៅថាការពុលពន្លឺព្រះអាទិត្យ។ អ្នកខ្លះមានប្រតិកម្មនេះពីកំណើត តែខ្លះទៀតលុះត្រាតែមានកត្តាអ្វីជំរុញដូចជា ការប្រើថ្នាំ ឬប៉ះពាល់នឹងប្រភេទរុក្ខជាតិអ្វីមួយ ឬមានជំងឺស្បែកណាផ្សេងមួយទៀត។
អាការៈ និងរោគសញ្ញា
កន្លែងដែលស្បែកប៉ះពាល់នឹងពន្លឺព្រះអាទិត្យសុទ្ធតែអាចបង្កជាអាការៈរបស់វាបានទាំងអស់ តែអាការៈទាំងនេះមានការប្រែប្រួលពីមនុស្សម្នាក់ទៅម្នាក់ទៀត។ យ៉ាងណាមិញ ភាគច្រើននៃអាការៈប្រតិកម្មអាលែកហ្ស៊ីនឹងពន្លឺព្រះអាទិត្យនោះមានដូចជា៖
• ស្បែកឡើងក្រហម
• ឈឺ ឬរមាស់
• ឡើងជាកណ្តាប់ៗលើស្បែក
• ពងបែក
អាការៈទាំងនេះទំនងជាកើតឡើងក្នុងរយៈពេលពីរបីនាទីឬច្រើនម៉ោងក្រោយពីប៉ះពាល់ពន្លឺព្រះអាទិត្យដោយផ្ទាល់។ ពេលខ្លះ អាការៈទាំងនេះមានលក្ខណៈតិចតួច ហើយក៏បាត់ទៅវិញដោយខ្លួនឯងដែរ។ ករណីខ្លះក៏ធ្ងន់ធ្ងររហូតដល់ត្រូវការព្យាបាលជាមួយគ្រូពេទ្យថែមទៀតផង។
ការព្យាបាល
ដូចបានបញ្ជាក់ពីខាងលើអ៊ីចឹងថា ប្រតិកម្មអាលែកហ្ស៊ីនឹងពន្លឺព្រះអាទិត្យគឺមានច្រើនប្រភេទ ហើយអាការៈក៏មានច្រើនទៅតាមគ្នាដែរ ដូច្នេះការព្យាបាលក៏ត្រូវធ្វើតាមលក្ខណៈខុសៗគ្នាដែរ។ ករណីតិចតួច ច្រើនតែមិនបាច់ព្យាបាលអ្វីទេ ព្រោះវានឹងជាទៅវិញដោយខ្លួនឯងក្រោយពីការពារការប៉ះពាល់នឹងពន្លឺព្រះអាទិត្យពីរបីថ្ងៃ។ ករណីធ្ងន់ធ្ងរ គឺអាចរំខានដល់ការរស់នៅប្រចាំថ្ងៃបាន ហើយពេលខ្លះត្រូវការព្យាបាលដោយការលេបថ្នាំប្រភេទ Steroids ផងដែរ។
ការបង្ការ
វាមិនខុសគ្នានឹងការប្រតិកម្មអាលែកហ្ស៊ីផ្សេងៗឡើយ ប្រតិកម្មនឹងពន្លឺព្រះអាទិត្យអាចបង្ការបានយ៉ាងល្អតាមរយៈការចៀសវាងការប៉ះពាល់នឹងពន្លឺព្រះអាទិត្យតែម្តង។ ប៉ុន្តែតាមរយៈការធ្វើរឿងខាងក្រោមនេះក៏ជួយការពារអ្នកពីប្រតិកម្មអាលែកហ្ស៊ីនឹងព្រះអាទិត្យបានដែរ៖
• លាបឡេការពារកម្តៅព្រះអាទិត្យ
• ស្លៀកសម្លៀកបំពាក់ជិតៗខ្លួន
• ពាក់វ៉ែនតាការពារកម្តៅព្រះអាទិត្យ ពាក់មួកមានឆាងម៉ាងជុំវិញ ប្រើកន្សែងរុំករ និងប្រើឆត្រគ្រប់ពេលចេញទៅខាងក្រៅ
• ចូរនៅក្នុងផ្ទះជានិច្ចគ្រប់ពេលមានពន្លឺព្រះអាទិត្យក្តៅខ្លាំង ជាពិសេសចន្លោះម៉ោង ១០ព្រឹករហូតដល់ ៤រសៀល៕
ត្រួតពិនិត្យដោយ www.health.com.kh