ជាតិ
នយោបាយជាតិ
ធ្វើដូចម្តេចឲ្យបានអាយុវែង? នាយករដ្ឋមន្ត្រីវ័យ៩៤ឆ្នាំ ប្រាប់ថា «កុំញាំច្រើនពេក!» លោកនាយករដ្ឋមន្ត្រី ម៉ាឡេស៊ី មហាធៀ មហាម៉ាត់ នាកិច្ចពិភាក្សាពិសេសជាមួយយុវជនខ្មែរនៅសាកលវិទ្យាល័យភូមិន្ទភ្នំពេញ កាលពីថ្ងៃទី២ ខែកញ្ញា ឆ្នាំ២០១៩
× គ្មានក្បួនអាថ៌កំបាំងទាក់ទងនឹងការថែរក្សាសុខភាពនោះឡើយសម្រាប់នាយករដ្ឋមន្ត្រីកំពុងកាន់តំណែងដែលមានអាយុច្រើនជាងគេលើពិភពលោក។ វ័យ៩៤ឆ្នាំ លោក មហាធៀ មហាម៉ាត់ បានអះអាងប្រាប់ក្រុមនិស្សិត និងអ្នកចូលរួមខ្មែរ នាកិច្ចសន្ទនាពិសេសនៅសាកលវិទ្យាល័យភូមិន្ទភ្នំពេញថា លោកតែងតែហាមខ្លួនឯង កុំឲ្យញ៉ាំចំណីអាហារច្រើនពេក ដែលបណ្តាលឲ្យធាត់ ព្រោះនាំឲ្យមានបញ្ហាសម្រាប់សុខភាព។
«វាគ្មានអាថ៌កំបាំងអ្វីឡើយ។ វាជារឿងមួយដែលសាមញ្ញបំផុត»។ នេះជាការឆ្លើយតបរបស់លោក មហាធៀ មហាម៉ាត់ ទៅនឹងសំណួររបស់អ្នកសម្របសម្រួលនៅចុងបញ្ចប់កម្មវិធី។ និយាយបណ្ដើរញញឹមបណ្ដើរ លោក លើកឡើងថា ដើម្បីមានអាយុវែង អ្នកទាំងអស់គ្នា ត្រូវតែប្រយ័ត្នប្រយែងខ្ពស់ចំពោះរបៀបរបរនៃញ៉ាំអាហារប្រចាំថ្ងៃ។
ទើបឈានចូលវ័យ ៩៤ឆ្នាំ កាលពីថ្មីៗនេះ លោកនាយករដ្ឋមន្ត្រីម៉ាឡេស៊ី ពន្យល់ទៀតថា ដោយហេតុតែ បច្ចុប្បន្ន ចំណីអាហារមាននៅគ្រប់ទីកន្លែង ហើយថែមទាំងមានរសជាតិឆ្ងាញ់ៗទៀតនោះ មនុស្ស ចូលចិត្តបរិភោគច្រើន។ នៅពេលមនុស្សញ៉ាំអាហារច្រើនពេក ក្រពះពួកគេ នឹងរីកធំឡើងៗ ហើយបើសកម្មភាពបែបនេះចេះតែបន្តរយៈពេលយូរ អ្នកទាំងនោះនឹងធាត់។
ដោយមានបទពិសោធន៍ផ្នែកវេជ្ជសាស្ត្រ មុនឈានជើងចូលឆាកនយោបាយ លោកបណ្ឌិត មហាធៀ សង្កត់ធ្ងន់ថា៖ «នៅពេលអ្នកធាត់ បេះដូងអ្នក ធ្វើការធ្ងន់ជាងមុនដើម្បីច្របាច់ឈាម។ ថ្លើមអ្នក ក៏ធ្វើការធ្ងន់ជាងមុនដែរ ដូចគ្នាសម្រាប់ សរីរាង្គផ្សេងៗទៀត ។ ដំបូងឡើយ វាអាចដំណើរការដល់ ១០០ឆ្នាំ ប៉ុន្តែ ដោយសារ សរីរាង្គទាំងនោះធ្វើការជ្រុលហួសហេតុពេក អាយុកាលពួកវា សល់ត្រឹមតែ ៥០ឆ្នាំប៉ុណ្ណោះ។ ដូច្នេះ កុំបណ្តោយខ្លួនឲ្យធាត់ឲ្យសោះ»។
សូមបញ្ជាក់ថា ការលើកឡើងរបស់លោក មហាធៀ បែបនេះ ធ្វើឡើងក្នុងកិច្ចសន្ទនាពិសេសស្តីពី «ការរក្សាតុល្យភាពទំនាក់ទំនងជាមួយប្រទេសមហាអំណាចនៅក្នុងបរិបទអាស៊ាន» (Balancing Relations with the Superpowers in the context of ASEAN)» ដែលរៀបចំនៅសាកលវិទ្យាល័យភូមិន្ទភ្នំពេញ នារសៀលថ្ងៃទី២ ខែកញ្ញា៕
© រក្សាសិទ្ធិដោយ thmeythmey.com