អ្នកជំនាញនិងមន្ត្រី បារម្ភពីការបាត់បង់កម្លាំងពលកម្មក្នុងវិស័យកសិកម្មនៅស្វាយរៀង

ជាតិ

សេដ្ឋកិច្ច

អ្នកជំនាញនិងមន្ត្រី បារម្ភពីការបាត់បង់កម្លាំងពលកម្មក្នុងវិស័យកសិកម្មនៅស្វាយរៀង

03, Sep 2019 , 7:19 pm

រូបភាព

ដោយ: អ៊ូ សុខមាន (OU Sokmean)

ស្វាយរៀង៖ កម្លាំងពលកម្មក្នុងវិស័យកសិកម្មនៅខេត្តស្វាយរៀង កំពុងប្រឈមនឹងការបាត់បង់ ដោយសារតែបច្ចុប្បន្ន អ្នកដែលធ្វើការងារកសិកម្មបានធ្លាក់ចុះ ហើយអ្នកដែលនៅធ្វើកសិកម្ម គឺសុទ្ធតែពលរដ្ឋដែលមានអាយុចាប់ពី៥០ឆ្នាំឡើងទៅ។ នេះជាការលើកឡើងរបស់ អ្នកស្រី ពៅ ធីតា អនុប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តស្វាយរៀង។ អ្នកស្រីបានអះអាង ថា ភាគច្រើននៃអ្នកធ្វើកសិកម្មនៅខេត្តស្វាយរៀង គឺជាពលរដ្ឋដែលមានវ័យចំណាស់។ ដោយឡែក អ្នកដែលមានកម្លាំងពេញលេញទាំងប្រុស-ស្រី គឺចេញទៅធ្វើការងារសំណង់ រោងចក្រ និងការងារផ្សេងៗ នៅក្រុងបាវិត និងរាជធានីភ្នំពេញ ។

បើតាមអនុប្រធានកសិកម្មខេត្តរូបនេះ ខេត្តស្វាយរៀង មានប្រជាពលរដ្ឋប្រមាណ៨៥ភាគរយ ជាអ្នកប្រកបមុខរបរធ្វើស្រែចម្ការ ក្នុងនោះ មានស្ត្រីវ័យចាប់ពី៤០ឆ្នាំឡើង ជាស្ត្រីនៅចាំផ្ទះ មើលថែទាំកូនចៅ។ នៅពេលដែលអាជ្ញាធរអញ្ជើញប្រជាពលរដ្ឋទៅប្រជុំម្ដងៗ កម្រឃើញមានបុរស និងយុវជនទៅចូលរួមណាស់។ ភាគច្រើននៃអ្នកចូលរួមគឺជាស្ត្រីដែលមានវ័យចំណាស់ស្ទើរតែ៩៩ភាគរយ។

អ្នកស្រី ពៅ ធីតា អនុប្រធានមន្ទីរកសិកម្ម រុក្ខាប្រមាញ់ និងនេសាទ

អ្នកស្រីបាននិយាយដូច្នេះថា៖«នេះជាបញ្ហា ដែលគួរឱ្យព្រួយបារម្ភខ្លាំង ចំពោះកម្លាំងពលកម្មនៅក្នុងវិស័យកសិកម្មនៅខេត្តស្វាយរៀងទាំងមូល ដែលនៅថ្ងៃខាងមុខ អាចនឹងមិនមានអ្នកធ្វើកសិកម្មតែម្តង ព្រោះគ្មានអ្នកធ្វើ។ ម្យ៉ាងវិញទៀតក៏រួមផ្សំនឹងកត្តាភូមិសាស្ត្រផងដែរ ព្រោះខេត្តមួយនេះ ដីមិនសូវមានជីវជាតិ និងមិនសូវអំណោយផលសម្រាប់ដំណាំកសិកម្មស្រែចម្ការប៉ុន្មាននោះឡើយ។ បច្ចុប្បន្នបញ្ហានេះ មិនមែនមានន័យថា កសិករបោះបង់ចោលការងារកសិកម្មទាំងអស់នោះទេ។ មានគ្រួសារខ្លះ ក្រៅពីការងារក្នុងវិស័យឧស្សាហកម្ម ពួកគេបានវិលត្រឡប់មកធ្វើការងារស្រែចម្ការតាមរដូវកាលវិញផងដែរ។ គ្រួសារខ្លះ ចំណាកស្រុក រកការងារធ្វើគ្រាន់តែជាការងារបន្ទាប់បន្សំនៅពេលទំនេរ ក្រៅពីការងារស្រែចម្ការប៉ុណ្ណោះ និងមានគ្រួសារមួយចំនួនបានសម្រេចបោះបង់ការងារកសិកម្មចោលទាំងស្រុង»។

អ្នកស្រីបានបន្តថា មន្ទីរកសិកម្មខេត្តស្វាយរៀង កំពុងគិតគូរកវិធីសាស្ត្រដើម្បីជួយកសិករ និងទាក់ទាញយុវជន ឱ្យងាកមកធ្វើកសិកម្មក្នុងស្រុកវិញ ដើម្បីលើកស្ទួយជីវភាពគ្រួសារ និងនិរន្តរភាពនៅក្នុងសហគមន៍ ក៏ដូចជានិរន្តភាពនៃវិស័យកសិកម្មគ្រប់រដូវកាលក្នុងខេត្តស្វាយរៀងនេះផងដែរ។

ជាមួយគ្នានេះ អ្នកស្រី ហុង ស្រីស្រស់ នាយកប្រតិបត្តិសហគមន៍កសិកម្មផ្គត់ផ្គង់ផលិតផលស្វាយរៀង (សាក់) បាននិយាយថា ស្ថិតនៅក្នុងស្ថានភាពបច្ចុប្បន្នដែលកំពុងខ្វះកម្លាំងពលកម្មក្នុងវិស័យកសិកម្មនេះ គឺមានតែចូលរួមជាមួយសហគមន៍ទេ ដែលអាចជួយកសិករ និងទាក់ទាញយុវជនឱ្យងាកមកធ្វើការងារកសិកម្មបាន ព្រោះសហគមន៍ជាអ្នកធានាបាននូវតម្លៃកសិផល ហើយការងារកសិកម្ម អាចរកចំណូលបានច្រើនជាងការងារនៅក្នុងវិស័យឧស្សាហកម្មមួយចំនួន ពិសេសគឺបានរស់នៅជួបជុំគ្រួសារ។

អ្នកស្រី ហុង ស្រីស្រស់ នាយកប្រតិបត្តិនៃសហគមន៍កសិកម្មផ្គត់ផ្គង់កសិផលស្វាយរៀង(សាក់)

«មូលហេតុដែលធ្វើឱ្យយុវជនបោះបង់ចោល ឬមិនចង់ធ្វើការងារកសិកម្ម ដោយសារតែដំណាំដែលដាំបាន មានតម្លៃទាបនៅលើទីផ្សារ មិនអាចប្រកួតប្រជែងបានជាមួយបន្លែដែលនាំចូលពីប្រទេសវៀតណាម ទើបយុវជនសម្រេចបោះបង់ការងារកសិកម្មស្ទើរតែទាំងស្រុង និងជ្រើសយកការងារនៅក្នុងវិស័យឧស្សាហកម្មទៅវិញ»។ នេះជាលើកឡើងរបស់អ្នកស្រី ហុង ស្រីស្រស់។ បើតាមនាយកប្រតិបតិ្តរូបនេះ ក្នុងសហគមន៍សាក់ មានកសិករដែលជាអ្នកផលិតបន្លែសរីរាង្គ និងសុវត្តិភាព មាន៣២៧គ្រួសារប៉ុណ្ណោះនៅទូទាំងខេត្តស្វាយរៀង។ ចំនួនអ្នកផលិតនេះ គឺនៅតិចតួចនៅឡើយ ក្នុងការផលិតបន្លែសម្រាប់នាំទៅទីផ្សារនៅរាជធានីភ្នំពេញ និងផ្គត់ផ្គង់តម្រូវការក្នុងខេត្តស្វាយរៀង។

ក្នុងមួយខែៗ សហគមន៍កសិកម្មផ្គត់ផ្គង់ផលិតផលស្វាយរៀង ផ្គត់ផ្គង់បន្លែសរីរាង្គ និងសុវត្ថិភាព បានពី៩ទៅ១០តោន។ ការងារកសិកម្មបន្លែសរីរាង្គនិងសុវត្ថិភាពនេះ ជាមធ្យមពលរដ្ឋអាចរកចំណូលបាន ពី១០ ទៅ ២០ម៉ឺនរៀល ក្នុងរយ:ពេលពីរថ្ងៃ ដែលអាស្រ័យទៅតាមទំហំដីដែលពួកគេដាំដុះ។ នេះបើតាម អ្នកស្រី ហុង ស្រីស្រស់ ដដែល៕