អាជ្ញាធរខេត្តព្រះសីហនុ បញ្ជាឱ្យកម្ទេចសំណង់៤ទីតាំង ខណៈ១០កន្លែងទៀត ត្រូវរុះរើ

ជាតិ

អាជ្ញាធរខេត្តព្រះសីហនុ បញ្ជាឱ្យកម្ទេចសំណង់៤ទីតាំង ខណៈ១០កន្លែងទៀត ត្រូវរុះរើ

04, Sep 2019 , 7:59 am

រូបភាព

ដោយ: ឡាយ សុភាវតី

ភ្នំពេញ៖ សំណង់អគារចំនួន៤ទីតាំងក្នុងខេត្តព្រះសីហនុ ត្រូវបានវាយកម្ទេចចោល ខណៈទីតាំង១០កន្លែងទៀត រុះរើចេញ។ ការបញ្ជាឱ្យកម្ទេច និងរុះរើនេះ ធ្វើឡើងក្រោយពីអាជ្ញាធររកឃើញថា សំណង់អគារទាំងនោះ សាងសង់ដោយគ្មានស្ដង់ដា និងអាចបង្កហានិភ័យជាយថាហេតុកើតឡើង។

លោក ឃៀង ភារម្យ អ្នកនាំពាក្យខេត្តព្រះសីហនុ បានប្រាប់សារព័ត៌មានថ្មីៗថា មន្ត្រីជំនាញ និងអាជ្ញាធរខេត្ត បានចុះពិនិត្យលើគុណភាពសំណង់៥០០កន្លែង ដោយរកឃើញទីតាំងចំនួន១៤ បានសាងសង់ខុសបច្ចេកទេស និងគ្មានស្ដង់ដា ដែលតម្រូវឱ្យកម្ទេច និងរុះរើចញ។ «១៤ទីតាំងបានរកឃើញថាខុសបច្ចេកទេសនិងមានហានិភ័យខ្ពស់ ។ហើយឥឡូវទីតាំងសំណង់៤កន្លែងកំពុងវៃកម្ទេចចោល ក្នុងចំណោម៥០០ទីតាំងដែលកម្លាំងជំនាញបានចុះពិនិត្យ។ ទីតាំងដែលនៅសល់ អាជ្ញាធរកំពុងជំរុញឲ្យម្ចាស់ដីឬម្ចាស់សំណង់រុះរើជាបន្ទាន់»។ នេះបើតាមលោក ឃៀង ភារម្យ។

កិច្ចប្រជុំរវាងម្ចាស់ដីនិងម្ចាស់សំណង់ ជាមួយលោក គួច ចំរើន

ចំពោះទំហំការសាងសង់នៃទីតាំងទាំង១៤ ដែលកំណត់តាមស្ដង់ដាសាងសង់នោះ លោក ភារម្យ មិនដឹងច្បាស់ទេ ព្រោះវាជាសមត្ថកិច្ចកម្លាំងជំនាញខាងគណៈកម្មការត្រួតពិនិត្យគុណភាពសំណង់នៃក្រសួង និងមន្ទីររៀបចំដែនដី។

ជុំវិញបញ្ហានេះសារព័ត៌មានថ្មីៗ មិនអាចទាក់ទងសុំព័ត៌មានបន្ថែមពីខាងក្រសួងរៀបចំដែនដីបាននៅឡើយទេ ។

កាលពីថ្ងៃទី២ កញ្ញា លោក ឡៅ ទិព្វសីហា រដ្ឋលេខាធិការក្រសួងរៀបចំដែនដី និងលោក គួច ចំរើន អភិបាលខេត្តព្រះសីហនុ បានជួបជាមួយម្ចាស់ដីនិងម្ចាស់សំណងទាំង១៤ទីតាំង ដើម្បីប្រាប់ឱ្យរុះរើសឱ្យបានឆាប់ តាមការណែនាំរបស់រដ្ឋបាលខេត្ត។

អត្ថបទទាក់ទង

សម្តេច ស ខេង បញ្ជាឲ្យអភិបាលរាជធានី-ខេត្ត ចុះពិនិត្យគុណភាពសំណង់ក្នុងដែនសមត្ថកិច្ចខ្លួន

សម្តេច ស ខេង កំពុងស៊ើបអង្កេតរកអ្នកពាក់ព័ន្ធលើករណីរលំអាគារនៅព្រះសីហនុ

កន្លងមកសម្តេច ស ខេង រដ្ឋមន្ត្រីក្រសួងមហាផ្ទៃ បានបញ្ជាឱ្យអភិបាលរាជធានី-ខេត្ត ដឹកនាំមន្ត្រីជំនាញពិនិត្យរាល់ការដ្ឋានសំណង់ នៅក្នុងដែនសមត្ថកិច្ចខ្លួន ដើម្បីទប់ស្កាត់បញ្ហាសំណង់ខុសបច្ចេកទេស និងគ្មានការអនុញ្ញាតត្រឹមត្រូវ។ មូលហេតុដែលប្រមុខក្រសួងមហាផ្ទៃ ដាក់ចេញបញ្ជាបែបនេះ ធ្វើឡើងក្រោយពីសម្ដេចសង្កេតឃើញមានសំណង់អគារខ្លះ សាងសង់គ្មានលិខិតអនុញ្ញាត និងខុសបច្ចេកទេស ដែលវាអាចបង្កឲ្យមានគ្រោះមហន្តរាយ ឬហានិភ័យផ្សេងៗ និងប៉ះពាល់ដល់សោភ័ណភាព សណ្តាប់ធ្នាប់ទីសាធារណៈ។

គួរបញ្ជាក់ថា កាលពីថ្ងៃទី២២ ខែមិថុនា ឆ្នាំ២០១៩ មានករណីបាក់រលំអគារកម្ពស់៧ជាន់ នៅក្រុងព្រះសីហនុ ដែលបណ្ដាលឱ្យមនុស្ស២៨នាក់ស្លាប់ និងរងរបួស២៦នាក់៕