សៀមរាប៖ សហគមន៍នេសាទដែលរស់នៅជាប់នឹងទន្លេសាប តែងពឹងអាស្រ័យផលខ្លាំងលើផលនេសាទ។ សព្វថ្ងៃនេះដោយសារធនធានធម្មជាតិកាន់តែតិចទៅៗ ធ្វើឱ្យសហគមន៍ទាំងនោះងាកមើលឱកាសផ្សេងទៀតដើម្បីអភិវឌ្ឍន៍ជីវភាពពួកគេ។ សហគមន៍មេជ្រៃដែលមានភូមិសាស្ដ្រជាប់បឹងទន្លេសាប ក៏គិតពីបញ្ហានេះដែរ ក្នុងនោះសហគមន៍នេះកំពុងធ្វើយុទ្ធនាការអប់រំជាបន្តបន្ទាប់ទាក់ទងនឹងបញ្ហាបរិស្ថាន។ សហគមន៍មេជ្រៃយល់ថា សំរាមជារនាំងរាំងខ្ទប់មិនឱ្យទេសចរចូលមកទស្សនាភូមិលិចទឹករបស់ខ្លួន។
ព័ត៌មានពិស្ដារ សូមស្ដាប់បទយកការណ៍ដែលរៀបរៀងដោយអ្នកនាង អ៊ីសា រ៉ហានី ពីខេត្តសៀមរាបដូចតទៅ៖
សំរាមប្លាស្ទិក កំពុងក្លាយជាបញ្ហាដ៏ឈឺក្បាលសម្រាប់ពិភពលោក។ មិនដូចសំរាមដទៃទេ សំរាមប្លាស្ទិកបានធ្វើឱ្យប៉ះពាល់ធ្ងន់ធ្ងរទាំងបរិយាកាសនិងជីវចម្រុះ ហើយវាមានអាយុកាលរាប់រយឆ្នាំនៅលើភពផែនដីនេះ។ ការអប់រំឱ្យប្រជាពលរដ្ឋយល់ពីការទុកដាក់ ការវេចខ្ចប់សំរាមប្លាស្ទិកនេះ ក៏មិនមែនជារឿងងាយប៉ុន្មានដែរ។
សហគមន៍មេជ្រៃ បានចាប់ផ្តើមផែនការពីមួយជំហានទៅមួយជំហាន ក្នុងបំណងដើម្បីលុបបំបាត់សំរាម និងអប់រំឱ្យប្រជាពលរដ្ឋយល់ដឹងពីការទុកដាក់។ អ្នកភូមិយល់ថា ប្រសិនណាបរិស្ថាននៅតំបន់របស់ខ្លួនស្អាត នោះនឹងអាចទាញទេសចរកាន់តែច្រើនចូលមកកម្សាន្តក្នុងសហគមន៍ដែលមានភូមិសាស្ដ្រជាប់បឹងទន្លេសាបមួយនេះ។
មេឃុំកែវពណ៌ ស្រុកពួក ខេត្តសៀមរាប លោក សាម ឈឿយ កាលពីចុងសប្ដាហ៍កន្លងទៅបានដឹកនាំប្រជាពលរដ្ឋប្រមាណជិត៣០០នាក់ ចូលរួមក្នុងកម្មវិធីសម្អាតបរិស្ថាននៅតំបន់ជុំវិញវត្តមេជ្រៃ ដែលជាតំបន់សំខាន់មួយរបស់ឃុំកែវពណ៌។ លោកមេឃុំពន្យល់ថា កន្លងមកខាងឃុំខ្វះខាតធនធានក្នុងការកៀងគរប្រជាពលរដ្ឋចូលរួមសម្អាតបរិស្ថាននេះ ហើយថាកម្មវិធីនៅពេលនេះជាចំណុចចាប់ផ្តើមមួយដ៏ល្អដើម្បីបញ្ជ្រាបចំណេះដឹងដល់ពលរដ្ឋទៅលើបញ្ហាបរិស្ថាននេះ។ ឃុំកែវពណ៌ ក៏មានបំណងប្រែក្លាយសហគមន៍របស់ខ្លួនកា្លយជាគោលដៅអេកូទេសចរណ៍ដ៏ទាក់ទាញដូចតំបន់កំពង់ភ្លក់ តំបន់កំពង់ឃ្លាំង និងតំបន់ចុងឃ្នៀសផងដែរ។ នេះជាការលើកឡើងរបស់លោកមេឃុំ ដោយបន្តថា៖«...នេះជាលើកទីមួយ តែឃើញមានពលរដ្ឋចូលរួមច្រើនដោយសារយល់ថា ពេលបរិស្ថានស្អាត ជីវភាពរស់នៅគាត់ក៏ល្អដែរ បានខំស្ទុះស្ទេរ»។
ក្រៅពីនេះ លោក សាម ឈឿយ ទទួលស្គាល់ថា ការអប់រំពីការថែរក្សាបរិស្ថានមិនមែនជារឿងងាយស្រួលប៉ុន្មានទេ ហើយក៏មិនអាចធ្វើតែឯកឯងបានដែរ ក្នុងនោះត្រូវការការចូលរួមពីប្រជាពលរដ្ឋ និងផ្សព្វផ្សាយឱ្យបានទូលំទូលាយពីកិច្ចការទាំងនេះ ដើម្បីឱ្យសហគមន៍មួយមានបរិស្ថានស្អាត និងជាទីទស្សនារបស់ភ្ញៀវទេសចរ។
សហគមន៍មេជ្រៃ ស្ថិតនៅប៉ែកខាងលិចនៃក្រុងសៀមរាប។ ដ្បិតជាតំបន់មានផ្ទះលិចទឹកក៏ពិតមែន តែតំបន់នេះនៅមិនទាន់មានការអភិវឌ្ឍច្រើននៅឡើយបើយើងធៀបនឹងតំបន់កំពង់ឃ្លាំង កំពង់ភ្លក់ និងតំបន់ចុងឃ្នៀសជាដើម។ ភ្ញៀវទេសចរមួយចំនួន ទៅកម្សាន្តនៅតំបន់នេះនៅរដូវទឹកទន្លេសាបឡើងធំ ព្រោះងាយស្រួលធ្វើដំណើរតាមទូក រីឯក្នុងរដូវប្រាំងហេដ្ឋារចនាសម្ព័ន្ធមានភាពលំបាកបន្ដិច។
មេឃុំកែវពណ៌ លោក សាម ឈឿយ យល់ថា ដោយសារហេដ្ឋារចនាសម្ព័ន្ធនៅទីនេះមិនទាន់ល្អ ទើបធ្វើឱ្យសហគមន៍របស់លោកមិនអាចទាញប្រយោជន៍បានច្រើនពីវិស័យទេសចរណ៍។ បញ្ហាសំរាម ក៏ជាការរាំងស្ទះមួយដែរ។ នេះបើតាមការលើកឡើងរបស់លោកមេឃុំ។
លោក សុខ សន អ្នកភូមិពានតាអូរ ឃុំកែវពណ៌ ស្រុកពួក ក៏បានចូលរួមយ៉ាងសកម្មក្នុងកម្មវិធីសម្អាតបរិស្ថាននៅពេលនោះដែរ។ ជាកម្មវិធីដ៏ធំនិងមិនធ្លាប់ចូលរួមកន្លងមក បុរសវ័យខ្ទង់សែសិបឆ្នាំនិងជាអ្នកនេសាទរូបនេះរៀបរាប់ថា មានអារម្មណ៍រីករាយ។ រីករាយពេលបានធ្វើកិច្ចការដ៏ល្អសម្រាប់សហគមន៍ខ្លួន តាមរយៈការរើសសំរាមក៏ដូចជាសម្អាតបរិស្ថានដើម្បីឱ្យសហគមន៍មួយនេះ មានភាពស្រស់ស្អាត។ លោក សន តាមរយៈក្បាលមេក្រូអ្នកសារព័ត៌មាន ក៏សំណូមពរដល់ពលរដ្ឋទាំងអស់ត្រូវចូលរួមសម្អាតនិងចេះវេចខ្ចប់សំរាមតាមផ្ទះឱ្យបានត្រឹមត្រូវ។
លោក ស៊ា សុផល ប្រធានអង្គការទំពាំងស្នងឫស្សីដែលបានសម្របសម្រួលសហការជាមួយអាជ្ញាធរកែវពណ៌ក្នុងកម្មវិធីសម្អាតបរិស្ថាននៅពេលនោះបានឱ្យដឹងថា រដូវប្រាំងនៅឆ្នាំអូសបន្លាយយូរទើបលោកមានពេលវេលាសមរម្យក្នុងការរៀបចំកម្មវិធីសម្អាតនៅសហគមន៍មេជ្រៃនេះ។ លោក សុផលពន្យល់ថា មេជ្រៃក៏ស្ថិតក្នុងគម្រោងធំរបស់អង្គការលោកដែរ ដើម្បីឱ្យបរិស្ថាននៅបឹងទន្លេសាបស្អាត។ បញ្ហាបរិស្ថានជាចំណុចក្ដៅរបស់សហគមន៍នេះ ប្រសិនបើបរិស្ថានស្អាត ការរស់នៅរបស់អ្នកភូមិក៏មានសុខភាពល្អ ប្រសិនបើបរិស្ថានស្អាត តំបន់អេកូទេសចរណ៍នៅទីនេះក៏ទាក់ទាញទេសចរបានកាន់តែច្រើនបន្ថែមទៀត។
ជាអ្នកស្រឡាញ់បរិស្ថានមួយរូប លោក សុផល បានធ្វើកម្មវិធីសម្អាតបរិស្ថាននៅតាមសហគមន៍បឹងទន្លេសាបប្រមាណ៣ឆ្នាំមកហើយ។ កម្មវិធីសម្អាតបរិស្ថាននោះធ្វើមួយឆ្នាំ២ដង គឺនៅរដូវមុនទឹកឡើងម្ដង និងរដូវទឹកសម្រកម្ដង។ នារដូវទឹកសម្រក អ្នកស្រុកអង្គរជុំនិងស្រឡាញ់ការងារសង្គមរូបនេះ បានកៀងគរសហគមន៍រើសសំរាមពិសេសសំរាមប្លាស្ទិកដែលទើរជាប់នឹងដើមឈើ ដែលសំរាមទាំងនោះប៉ះពាល់ខ្លាំងដល់ប្រព័ន្ធជីវចម្រុះក្នុងទឹក។ យុទ្ធនាការនេះដែរ ក៏បានចុះអប់រំប្រជាពលរដ្ឋចេះញែកសំរាម និងការវេចខ្ចប់ឱ្យបានត្រឹមត្រូវ៕