FIFA
កីឡាជាតិ
ជាតិ
លោក Felix៖ ទម្រង់លេងលើទីលាន និងសកម្មភាពខាងក្រៅ ជាអាទិភាពរបស់កីឡាករ លោក Felix Dalmas និយាយក្នុងសន្និសីទសារព័ត៌មានមុនប្រកួតជាមួយហុងកុង, រូបភាពពី PP SEA Games 2023
× ភ្នំពេញ៖ ទម្រង់លេងល្អរបស់កីឡាករ គឺជារឿងមួយ ប៉ុន្តែសកម្មភាពខាងក្រៅរបស់ពួកគេ ក៏ជារឿងសំខាន់ដែរ ក្នុងការជាប់ជម្រើសជាតិ។ នេះជាការលើកឡើងរបស់លោក Felix Dalmas គ្រូបង្វឹកក្រុមជម្រើសជាតិកម្ពុជា។
វត្តមានកីឡាករ២៥រូប បានបង្ហាញជាផ្លូវការហើយ បន្ទាប់ពីគ្រូបង្វឹកកម្ពុជា បានសម្រេចចិត្តយ៉ាងតឹងរឹង។ សម្រាប់លោក Felix Dalmas ទម្រង់លេងលើទីលាន និងសកម្មភាពខាងក្រៅ ជាអាទិភាពរបស់កីឡាករក្នុងការជាប់ជម្រើសជាតិ។
ក្នុងន័យនេះលោក Felix Dalmas គ្រូបង្វឹកក្រុមជម្រើសជាតិកម្ពុជា បាននិយាយថា កីឡាករមានសមត្ថភាពខ្លាំងតែមួយមុខ វាមិនគ្រប់គ្រាន់ក្នុងការជួយឱ្យពួកគេជាប់ជម្រើសជាតិនោះទេ ពោលគឺទាមទារឱ្យពួកគេត្រូវមានអាកប្បកិរិយា និងចរិកលក្ខណៈថ្លៃថ្នូរ ដែលជាធាតុផ្សំដ៏សំខាន់នៅក្រៅទីលានផងដែរ។ បើតាមលោក Felix កីឡាករជម្រើសជាតិ គឺតំណាងឱ្យជាតិ ដូច្នេះក្រៅពីលេងនៅលើទីលានជាមួយគោលការណ៍ Fair Play ពួកគេត្រូវមានអាកប្បកិរិយា ឥរិយាបទ និងទំនាក់ទំនងល្អជាមួយកីឡាករដទៃទៀតផង។
«យើងបានពិចារណារាល់កីឡាករទាំងអស់ក្នុងការប្រកួតលីគរបស់យើង ហើយសម្រាប់ការពិចារណា គឺយើងមើលទាំងទម្រង់លេងលើទីលាន និងសកម្មភាពខាងក្រៅផងដែរ»។ នេះជាការលើកឡើងរបស់លោក Felix Dalmas ពេលឆ្លើយនឹងសំនួររបស់អ្នកសារព័ត៌មាន ដែលចោទសួរពាក់ព័ន្ធការជ្រើសរើសកីឡាករជម្រើសជាតិ ដើម្បីត្រៀមប្រកួតជាមួយក្រុមហុងកុងនាវគ្គជម្រុះ FIFA World Cup Qatar 2022 ជុំទី២ជើងទី១នៅថ្ងៃទី៥ ខែកញ្ញា ឆ្នាំ២០១៩ នាពហុកីឡដ្ឋានជាតិ។
ការជ្រើសរើសកីឡាករជម្រើសជាតិនេះ វាពិតជាពិបាកសម្រាប់លោក Felix Dalmas ខណៈអ្នកគាំទ្រមួយចំនួន សម្ដែងការមិនពេញចំពោះការសម្រេចរបស់លោក។ មូលហេតុដែលពួកគេមិនពេញចិត្តនោះ ដោយសារតែក្រុមជម្រើសជាតិលើកនេះ គ្មានវត្តមានកីឡាករ ចាន់ វឌ្ឍនាកា ដែលជាខ្សែប្រយុទ្ធឆ្នើមរបស់កម្ពុជា។ ពាក់ព័ន្ធវត្តមានកីឡាករ ចាន់ វឌ្ឍនាកា គ្រូបង្វឹកសញ្ជាតិអាហ្សង់ទីនរូបនេះ បាននិយាយថា វឌ្ឍនាកា ទំនងជាអាចក្លាយជាផ្នែកមួយនៃក្រុមជម្រើសជាតិ សម្រាប់ជំនួបនៅលើកក្រោយ។
«ខ្ញុំសង្កេតឃើញថា កីឡាករដែលយើងបានជ្រើសរើសបច្ចុប្បន្ន គឺពួកគេសុទ្ធសឹងជាកីឡាករមានឆន្ទៈខ្ពស់ក្នុងការលេង ខិតខំប្រឹងប្រែងហ្វឹកហាត់ និងលេងនៅលើទីលានបានល្អ។ កត្តាទាំងនេះជាមូលហេតុ ដែលជួយឲ្យ ដាវ នីម ស្ថិតក្នុងបញ្ជី២៥នាក់នៃក្រុមជម្រើសជាតិ ព្រោះរូបគេជាកីឡាករមានឆន្ទៈលេងនៅលើទីលាន និងព្យាយាមហ្វឹកហាត់»។ នេះជាការបន្ថែមរបស់លោក Felix។
គ្រូបង្វឹករូបនេះជឿជាក់ថា ការប្រកួតជាមួយហុងកុងនឹងក្លាយជាជំនួបដ៏តានតឹង និងជក់ចិត្តបំផុតសម្រាប់ទស្សនិកជន។ លោករំពឹងថា ទស្សនិកជនយ៉ាងច្រើនកុះករ នឹងមកទស្សនាការប្រកួតដ៏ជក់ចិត្តមួយនេះ ទោះបីគ្មានកីឡាករឆ្នើម(Idol)មួយចំនួនក្តី ។ សម្រាប់លោក Felix ពណ៌និងទង់ជាតិនៅលើអាវកីឡាករ វាបង្ហាញពីអត្ថន័យខ្លាំងជាងការបង្ហាញរបស់កីឡាករ ដែលជានិមិត្តរូប។
បើតាមគ្រូបង្វឹកកម្ពុជារូបនេះ កីឡាករជម្រើសជាតិទាំង២៥រូប ក៏នៅជម្រុះ២នាក់ចេញទៀតផងដែរ៕
Tag:
Felix Dalmas
FIFA World Cup Qatar 2022
© រក្សាសិទ្ធិដោយ thmeythmey.com