ជាតិ
សង្គមជាតិ
ម្ចាស់សណ្ឋាគារ GREAT DUKE ព្រមបើកប្រាក់ខែ ក្រោយបុគ្គលិកធ្វើកូដកម្ម
× ភ្នំពេញ៖ ម្ចាស់សណ្ឋាគារ ដឺ ហ្ក្រេត ឌ្យូក ភ្នំពេញ (THE GREAT DUKE PHNOM PENH) យល់ព្រមបើកប្រាក់ឈ្មួលប្រចាំខែសីហាដល់បុគ្គលិកហើយ បន្ទាប់ពីពួកគេប្រមូលផ្ដុំគ្នា តវ៉ាមុខច្រកចូលសណ្ឋាគារ កាលពីថ្ងៃទី៣កញ្ញា ឆ្នាំ២០១៩។
លោក ទូច កុសល ប្រធានសហជីពកម្មករនិយោជិតវិស័យទេសចរណ៍នៅសណ្ឋាគារ ដឺ ហ្គ្រេតឌ្យូក នេះ បាននិយាយប្រាប់សារព័ត៌មានThmeyThemy តាមទូរសព្ទថា បុគ្គលិកជិត២០០នាក់ បានប្រមូលផ្ដុំគ្នាតវ៉ាសុំបើកប្រាក់ឈ្នួលឱ្យទៀងទាត់ និងរៀបចំពិធីជប់លៀងប្រចាំឆ្នាំដល់ពួកគេទៀតផង។ លោក កុសល បានបញ្ជាក់ដូច្នេះថា៖«បញ្ហានេះត្រូវបានដោះស្រាយ ដោយមានតំណាងភាគីនិយោជក និយោជិត និងក្រសួងការងារ បានសម្របសម្រួលគ្នា ដោយនិយោជក(ម្ចាស់សណ្ឋាគារ) ព្រមបើកប្រាក់ខែឱ្យបុគ្គលិកដែលមានតួនាទីទាប និងប្រាក់ខែតិច គឺបើកឱ្យនៅថ្ងៃទី៤កញ្ញានេះ និងបុគ្គលិកដែលមានតួនាទីខ្ពស់ និងប្រាក់ខែច្រើន គឺបើកឱ្យនៅថ្ងៃទី៥កញ្ញា។ លើសពីនេះ ម្ចាស់សណ្ឋាគារបានយល់ព្រមធ្វើពិធីជប់លៀងប្រចាំឆ្នាំជូនបុគ្គលិកផងដែរ»។
បើតាមលោក ទូច កុសល ថៅកែសណ្ឋាគារ ដឺ ហ្គ្រេតឌ្យូក នេះ នឹងរៀបចំពិធីជប់លៀងបុគ្គលិកប្រចាំឆ្នាំ២០១៩ នៅថ្ងៃទី១០ ខែតុលា ខាងមុខ។
សណ្ឋាគារ សណ្ឋាគារ ដឺ ហ្គ្រេតឌ្យូក ស្ថិតតាមបណ្ដោយផ្លូវមុនីរ៉េត ក្បែរភ្លើងស្តុបផ្សារដើមគ ជាអតីតសណ្ឋាគារ Intercontinental ។ សណ្ឋាគារនេះ បានប្ដូរឈ្មោះ នៅថ្ងៃទី១ មករា ឆ្នាំ២០១៨ ក្រោយពេលបានផ្លាស់ប្ដូរថៅកែ។ ប៉ុន្តែបុគ្គលិកសណ្ឋាគារនេះភាគច្រើន មានអតីតភាពការងារយូរឆ្នាំ តាំងពីនៅជាសណ្ឋាគារ Intercontinental មកម្ល៉េះ។ នេះបើតាមលោក ទូច កុសល ដែលបន្ថែមថា បុគ្គលិកសណ្ឋាគារ ដឺ ហ្គ្រេតឌ្យូក មានជាង ២០៥នាក់ ហើយថៅកែខកខានបើកប្រាក់ឈ្នួលឲ្យពួកគេច្រើនថ្ងៃហើយ។
លោក ឆុង រតនា ជាបុគ្គលិកផ្នែកអាហារកិច្ច នៅសណ្ឋាគារ សណ្ឋាគារ ដឺ ហ្គ្រេតឌ្យូក នេះ បានលើកឡើងថា ការធ្វើកូដកម្មតវ៉ាសុំបើកប្រាក់ពីថៅកែសណ្ឋាគារនេះ ជាច្រើនដងមកហើយ ពោលគឺមិនមែនតែម្តងទេ។ លោកបាននិយាយដូច្នេះ៖ «យើងធ្វើកូដកម្មសុំបើកប្រាក់២-៣ដងមកហើយ ក្នុងរយៈពេល៣ខែចុងក្រោយនេះ គ្រាន់តែពួកយើងធ្វើនៅក្នុងសណ្ឋាគារ មិនមែនទ្រង់ទ្រាយធំ និងចំហដូចលើកនេះ។ ៣ខែចុងក្រោយនេះ ប្រាក់ខែដែលថៅកែត្រូវបើកឱ្យបុគ្គលិកកន្លះម្តង គឺមិនដែលទៀងទាត់នោះទេ លុះត្រាតែយើងតវ៉ាសុំបើកប្រាក់ខែ បានគេបើកឱ្យ។ លើសពីនេះការពន្យារពេលបើកប្រាក់ខែ ក៏គ្មានជូនដំណឹងឱ្យបុគ្គលិកបានដឹងដែរ»។
តាមបើ លោក ឆុង រតនា ការធ្វើកូដកម្មតវ៉ាសុំបើកប្រាក់ខែ នៅខាងក្រៅសណ្ឋាគារនេះ ដោយសារបុគ្គលិកក្នុងសណ្ឋាគារទាំងអស់ឯកភាពគ្នា និងមើលឃើញថា ម្ចាស់សណ្ឋាគារ គ្មានបំណងនឹងបើកប្រាក់ខែឱ្យកម្មករ ទើបធ្វើការតវ៉ាឡើង ដើម្បីមានការអន្តរាគមន៍ពីភាគីពាក់ព័ន្ធ៕
© រក្សាសិទ្ធិដោយ thmeythmey.com