កីឡាអន្តរជាតិ
អន្តរជាតិ
កីឡាករកូរ៉េខាងជើង Kwang Song ទៅលេងឲ្យ U-23 Juventus
× ខ្សែប្រយុទ្ធ Han Kwang Song អាចក្លាយជាកីឡាករដំបូងបង្អស់របស់កូរ៉េខាងជើង ដែលរកគ្រាប់បាល់បញ្ចូលទីក្នុងក្របខណ្ឌ Serie A បន្ទាប់ពីរូបគេបានផ្លាស់ពី Cagliari ទៅ Juventus ក្នុងលក្ខខណ្ឌខ្ចីជើង។ ឱកាសបង្ហាញវត្តមាននៅក្របខណ្ឌកំពូលអ៊ីតាលី ត្រូវពឹងផ្អែកទាំងស្រុងលើសមត្ថភាពរបស់កីឡាកររូបនេះនៅឈុត U23 របស់សេះបង្កង់ជាមុនសិន។
Kwang Song បានផ្ទេរទៅកាន់សេះបង្កង់ Juventus ដោយជោគជ័យនៅថ្ងៃទី៣ ខែកញ្ញា ពោលគឺនៅថ្ងៃចុងក្រោយនៃទីផ្សារដោះដូរកីឡាករនៅតំបន់អឺរ៉ុបបិទទ្វារ។ យ៉ាងណាក៏ដោយ ប្រព័ន្ធផ្សព្វផ្សាយអ៊ីតាលីអះអាងថា ខ្សែប្រយុទ្ធវ័យក្មេងរូបនេះ នឹងត្រូវបញ្ចូលទៅក្នុងក្រុមអាយុក្រោម ២៣ឆ្នាំ របស់ក្រុម Juventus ដែលសព្វថ្ងៃកំពុងលេងក្នុងក្របខណ្ឌលីគលំដាប់ទីបីអ៊ីតាលី Serie C។
ខ្សែប្រយុទ្ធសញ្ជាតិកូរ៉េខាងជើង វ័យ២០ឆ្នាំខាងលើ បានទៅចូលរួមជាមួយ Cagliari ក្នុងឆ្នាំ ២០១៧ ដោយបានបង្ហាញខ្លួនជាលើកដំបូងក្នុងលីគ Serie A ទល់នឹង Palermo។ សម្រាប់គ្រាប់បាល់ដំបូងរបស់គេនៅទឹកដីអ៊ីតាលី គឺក្នុងការប្រកួតដែល Cagliari ចាញ់ Torino ៣-២ កាលពីខែមេសា ឆ្នាំដដែលនោះ។
ក្នុងឆ្នាំដដែល Kwang Song ក៏ត្រូវ Cagliari អនុញ្ញាតឲ្យ Perugia ខ្ចីទៅលេងនៅក្របខណ្ឌ Serie B ចំនួនពីររដូវកាល (២០១៧/១៨ និង ២០១៨/១៩) ដោយបង្ហាញខ្លួនសរុប ៣៦លើក និងស៊ុតបញ្ចូលទីបាន ១១គ្រាប់។
អ្វីដែលធ្វើឲ្យក្លិបនៅអឺរ៉ុបចាប់រម្មណ៍លើ Kwang Song នោះ គឺបន្ទាប់ពីរូបគេបានបង្ហាញភាពលេចធ្លោខ្លាំងក្នុងព្រឹត្តិការណ៍អាស៊ីក្រោមអាយុក្រោម១៦ (Asian under-16 Championship) ឆ្នាំ២០១៤ នៅថៃ ជាមួយនឹងការរកគ្រាប់បាល់បញ្ចូលទីស្ទើរគ្រប់ការប្រកួតទាំងអស់។ អតីតកីឡាករយុវជនក្រុម Chobyong នេះ ក៏បានជួយកូរ៉េខាងជើងតាមរយៈការរកគ្រាប់បាល់នាំមុខ ក្នុងជ័យជម្នះ ២-១ លើកូរ៉េខាងត្បូង ក្នុងជំនួបវគ្គផ្តាច់ព្រ័ត្រ ដើម្បីលើកពាន Asian under-16 Championship នេះផងដែរ។
Kwang Song ដែលជាប់ជម្រើសជាតិកូរ៉េខាងជើងឈុតធំនៅឆ្នាំ២០១៧ ទើបតែបានបង្ហាញខ្លួន៥លើកប៉ុណ្ណោះ និងមិនទាន់រកគ្រាប់បាល់បាននៅឡើងដេរ៕
Tag:
Juventus
Han Kwang Song
កូរ៉េខាងជើង
© រក្សាសិទ្ធិដោយ thmeythmey.com