អ្នកនាំពាក្យ បកស្រាយពីមូលហេតុ នាំឲ្យបាក់ដីឬច្រាំង នៅជាប់មាត់ទន្លេ

ជាតិ

សង្គមជាតិ

អ្នកនាំពាក្យ បកស្រាយពីមូលហេតុ នាំឲ្យបាក់ដីឬច្រាំង នៅជាប់មាត់ទន្លេ

04, Sep 2019 , 10:19 pm

រូបភាព

រូបភាពពីក្រសូងធនធានទឹក និងឧតុនិយម

ដោយ:

ភ្នំពេញ៖ ឆ្នាំនេះ កម្ពុជាទទួលរងនូវបាតុភូតជាច្រើន ដែលជាហេតុធ្វើឲ្យបណ្តាខេត្តនានាមានភ្លៀងធ្លាក់ និងធ្វើឲ្យទឹកទន្លេមេគង្គមានការហក់ឡើងខ្ពស់ផងដែរ ដែលបណ្តាលឲ្យខេត្តដែលនៅជាប់ទន្លេមេគង្គងាយនឹងរងការបាក់ដី។ ជាពិសេសខេត្តកំពង់ចាម ត្បូងឃ្មុំ និង កណ្តាល បានរងការបាក់ដី បណ្តាលឲ្យប៉ះពាល់ដល់ផ្ទះសម្បែងរបស់ពលរដ្ឋជាច្រើនខ្នង និងផ្លូវថ្នល់។

ទាក់ទងនឹងខេត្តដែលរងការបាក់ដីនេះ លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម បានបញ្ជាក់ថា នៅតាមបណ្តាខេត្តដែលនៅជាប់ទន្លេមេគង្គ គឺងាយនឹងទទូលនូវការបាក់ដីជាងគេ និងនាំឲ្យខូចខាតហេដ្ឋារចនាសម្ព័ន្ធ និងផ្ទះសម្បែង។ លោក ចាន់ យុត្ថា បញ្ជាក់ថា ករណីបាក់ដីតែងតែកើតមានរយៈពេលពីរដងក្នុងមួយឆ្នាំគឺនៅពេលទឹកឡើង និងទឹកស្រក។ លោកបញ្ជាក់ពីមូលហេតុពីរយ៉ាងដែលនាំឲ្យមានការបាក់ច្រាំងទន្លេ គឺ មូលហេតុទីមួយ បណ្តាលមកពី ខ្វះការស្តារទឹកទន្លេឲ្យបានស្អាតល្អ ទើបធ្វើឲ្យមានដីល្បាប់ បង្កើតបានជាកោះមួយនៅកណ្តាលទន្លេ នៅពេលដែលទឹកឡើង ធ្វើឲ្យទឹករុញច្រាន ទៅច្រាំងទន្លេ ហើយ មូលហេតុទីពីរ នៅពេលរដូវវស្សាមកដល់ ធ្វើឲ្យបឹងបូរដែលនៅជាប់ទន្លេនាំយកដីល្បាប់ និងដីភក់ ហូរចូលទន្លេ។ នៅពេលទឹកស្រកនៅចុងរដូវវស្សា ធ្វើឲ្យច្រាំងនៅទន្លេបៀមទឹក ដែលធ្វើឲ្យច្រាំងរងការបាក់ផងដែរ។

អ្នកនាំពាក្យរូបនេះបានបញ្ជាក់ថា នៅពេលទឹកស្រក គឺជាពេលដែលធ្វើឲ្យច្រាំងទន្លេរងការបាក់ដីខ្លាំងជាងពេលដែលទឹកឡើង។ ត្រង់ចំណុចនេះ លោក ចាន់ យុត្ថា អះអាងថា៖«នៅរដូវវស្សាមានភ្លៀងជោគជាំ អ៊ីចឹងធ្វើឲ្យបឹងបូរដែលនៅសងខាងទន្លេមានទឹកជន់លិច ពេលដែលមានភ្លៀងមក ដីល្បាប់នៅក្នុងទន្លេ មានសភាពជ្រាយដែលមានរ៉េស៊ីស្តង់ខ្សោយ។ ទន្ទឹមនឹងនេះ នៅពេលដែលទឹកចាប់ផ្តើមស្រក ទឹកដែលនៅក្នុងបឹងបួ ក៏ចាប់ផ្តើមជ្រាបទៅតាមទន្លេដែរ។ នៅរដូវវស្សា ជាពេលដែលទឹកឡើង និងទឹកស្រក ធ្វើឲ្យច្រាំងទន្លេបៀមទឹកជាប្រចាំ ដូច្នេះនៅពេលដែលទឹកស្រកទៅវិញដូចជាការទាញយកច្រាំងទៅជាមួយផងដែរទើបធ្វើឲ្យមានការបាក់ច្រាំងដូច្នេះ»។

ទោះជាមានការបាក់ច្រាំងនៅខេត្តកណ្តាល ត្បូងឃ្មុំ និងកំពង់ចាម កាលពីប៉ុន្មានថ្ងៃមុននេះក៏ដោយ ក៏មិនប៉ះពាល់ធ្ងន់ធ្ងរដល់ផ្ទះសម្បែងរបស់ពលរដ្ឋនោះទេ អ្វីដែលប៉ះពាល់ធ្ងន់ធ្ងរនោះគឺផ្លូវជាតិដែលស្ថិតនៅក្នុងឃុំរកាកោង ស្រុកមុខកំពូល ខេត្តកណ្តាល កំពុងរងការខូចខាតខ្លាំង ដោយសារការបាក់ច្រាំងកាលពីថ្ងៃទី២ ខែកញ្ញា។ នេះបើតាមការបញ្ជាក់ពីលោក ចាន់ យុត្ថា ដែលបានប្រាប់សារព័ត៌មានថ្មីៗតាមទូរសព្ទ។

បើតាមអ្នកនាំពាក្យរូបនេះ នៅពេលខាងមុខនេះ កម្ពុជា នឹងទទួលរងឥទ្ធិពល ឡានីណា» ដែល ធ្វើឲ្យមានភ្លៀងធ្លាក់កាន់តែខ្លាំង និងបណ្តាលឲ្យមានបាតុភូតនានាអាចនឹងកើតមាននៅកម្ពុជាផងដែរ។ លោកបញ្ជាក់ទៀតថា នៅរដូវវស្សាឆ្នាំនេះ គឺមានសភាពយឺតជាងឆ្នាំកន្លងទៅ។ លោកអះអាងថា៖«ឆ្នាំនេះកម្ពុជាបានទទួលរងឥទ្ធិពល «អែលនីណូ» ដែលធ្វើឲ្យរារាំងដល់រដូវវស្សា»។

អ្នកនាំពាក្យរូបនេះបានប្រាប់ថា ក្រសួងបានព្យាករថា នៅថ្ងៃទី០៧ ខែកញ្ញាខាងមុខ ទន្លេមេគង្គដែលនៅខេត្តស្ទឹងត្រែង ក្រចេះ កំពង់ចាម និងត្បូងឃ្មុំ អាចនឹងបន្តហក់ឡើងរហូតដល់កម្រិតប្រុងប្រយ័ត្ន និងបន្តការបាក់ច្រាំងនៅកន្លែងផ្សេងទៀតផងដែរ។ ទន្ទឹមនឹងគ្នាផងដែរ ក្រសួងក៏បានរៀបចំកម្លាំង ដើម្បីទប់ស្កាត់ និងសា្តរកន្លែងដែលរងការខូចខាតពីការបាក់ច្រាំងឲ្យទាន់ពេលវេលា និងជម្លៀសប្រជាជនទៅកន្លែងទីដែលមានសុវត្ថិភាពផងដែរ៕