ភ្នំពេញ៖ វិស័យអចលនទ្រព្យនៅកម្ពុជា នូវតែស្ថិតក្នុងស្ថានភាពល្អនៅឡើយនាឆ្នាំ ២០១៩ និង២០២០ ខាងមុខ ខណៈតម្រូវការទិញផ្ទះ និងដីធ្លីរបស់ពលរដ្ឋ ដែលមានចំណូលមធ្យមបន្តកើនឡើង។ បច្ចុប្បន្ននេះ វិស័យអចលនទ្រព្យបានពង្រីកខ្លួននៅកាន់តំបន់ជុំវិញរាជភ្នំពេញជាបណ្ដើៗហើយ ជាពិសេសខេត្តកណ្ដាល ទាំងគម្រោងដីឡូតិ៍ និងផ្ទះល្វែង។ នេះជាកាលើកឡើងរបស់អ្នកជំនាញក្នុងកម្មវិធី «ព្រឹត្តិការណ៍យល់ដឹងពីវិសាលភាពអចលនទ្រព្យ» នាព្រឹកថ្ងៃទី៣ ខែកញ្ញា ឆ្នាំ២០១៩ ។
លោក Thomas O’Sullivan នាយកប្រតិបត្តិរបស់ក្រុមហ៊ុន Realestate.com.kh បាននិយាយថា ក្នុងឆ្នាំ២០២០ ខាងមុខនេះ ស្ថានភាពវិស័យអចលនទ្រព្យក្នុងប្រទេសកម្ពុជា នូវតែបន្តមានស្ថានភាពល្អ ជាពិសេសគម្រោងផ្ទះល្វែង និង ដីឡូតិ៍ជាដើម។ លោកបន្តថា គម្រោងអភិវឌ្ឍន៍សម្រាប់ពលរដ្ឋមានចំណូលមធ្យម កំពុងមានសន្ទុះខ្លាំង ដូច្នេះតំបន់ជាប់រាជធានីភ្នំពេញ គឺជាតំបន់ដែលមានសក្តានុពលខ្លាំងលើវិស័យមួយនេះ។
នាយកប្រតិបត្តិរបស់ក្រុមហ៊ុន Realestate.com.kh បាននិយាយថា ៖« នាឆ្នាំ២០២០ ខាងមុខនេះ ខ្ញុំកត់សម្គាល់ឃើញថា អ្នកវិនិយោគលើវិស័យអចលនទ្រព្យបានងាកពីការអភិវឌ្ឍសម្រាប់អ្នកមានចំណូលខ្ពស់ មកអភិវឌ្ឍន៍សម្រាប់អ្នកមានចំណូលទាប និងមធ្យមវិញ។ ជាក់ស្ដែង KH land បានងាកមកវិនិយោគលើវិស័យដីឡូតិ៍នេះ សម្រាប់អ្នកមានចំណូលទាប និងមធ្យម គឺមានចំណុចពិសេសជាច្រើនទាំង តម្លៃ និងទីតាំង»។
ដោយមើលឃើញពីសក្តានុពលជាច្រើននៃខេត្តជាប់រាជធានីភ្នំពេញ ជាពិសេសខេត្តកណ្ដាល ដែលកំពុងមានការរីកចម្រើន ទើបក្រុមហ៊ុន ខេ អេស លែន KH Land Co,.Ltd សម្រេចចិត្តវិនិយោគលើវិស័យអចលនទ្រព្យ ដែលជាគម្រោងដ៏ធំមួយសម្រាប់ពលរដ្ឋមានចំណូលមធ្យម ស្ថិតក្នុងស្រុកអង្គស្នួល ខេត្តកណ្តាល។ នេះជាការអះអាងរបស់លោក ថុន បូរ៉ា ប្រធានក្រុមហ៊ុន ខេ អេស លែន KH Land Co,.Ltd ។
លោក ថុន បូរ៉ា បានបន្ថែមថា គម្រោងថ្មីរបស់លោកមានឈ្មោះ «ក្រុងដីមាស» ដែលវិនិយោគលើផ្ទៃដីសរុបចំនួន៥០ហិកតា ស្ថិតក្នុងឃុំសំរោងលើ ស្រុកអង្គស្នួល ខេត្តកណ្តាល។ គម្រោងដីមាសនេះ មានដូចជា លំនៅដ្ឋាន កន្លែងលំហែកាយ សួនច្បារសាធារណៈ ផ្សារទំនើប ហាងកាហ្វេ និងភោជនីយដ្ឋានជាដើម ជាមួយនឹងប្រព័ន្ធហេដ្ឋារចនាសម្ព័ន្ធដែលមានស្តង់ដារ ហើយក្នុងតម្លៃសមរម្យ។
«គម្រោងយើងនេះគឺផ្ដោតទៅលើអតិថិជនដែលមានចំណូលមធ្យម ដែលស្ថិតនៅក្នុងទីតាំងដែលមានសក្តានុពលខ្លាំង មានដូចជាជាប់ផ្លូវជាតិលេខ៤ ផ្លូវជាតិលេខ ៥១ និងផ្លូវល្បឿន ហើយអ្វីដែលពិសេសនោះ គឺតំបន់នេះ ស្ថិតនៅក្នុងគម្រោងអភិវឌ្ឍន៍របស់រាជរដ្ឋាភិបាល ដែលនឹងត្រូវកាត់ចូលក្រុងខាងមុខឆាប់ៗនេះផងដែរ ព្រោះតម្លៃយើងមានចាប់ពី៨ពាន់ដុល្លារឡើងទៅ»។ នេះជាការអះអាងរបស់លោក ថុន បូរ៉ា ប្រធានក្រុមហ៊ុន ខេ អេស លែន KH Land Co,.Ltd ៕