ជាតិ
ផ្លូវជិត៥០ខ្សែតាមបណ្តាខេត្ត ខូចខាត ដោយសារជំនន់ទន្លេមេគង្គ និងទឹកភ្លៀង កំណាត់ផ្លូវជាតិ៧៣(ឆ្លូង-ក្រចេះ) កំពុងជន់លិចខ្លាំង ដោយសារកម្ពស់ទឹកទន្លេមេគង្គ ហក់ឡើងខ្ពស់ក្នុងកម្រិត២២.៧២ម៉ែត្រ នាថ្ងៃទី៨កញ្ញា។ រូបថត ក្រសួងសាធារណការ
× ផ្លូវសរុបចំនួន៤៦ខ្សែ នៅតាមបណ្តាខេត្តជាង១០ កំពុងរងការខូចខាតដោយសារជំនន់ទឹកទន្លេមេគង្គ និងទឹកភ្លៀង។ ចំនួនផ្លូវដែលលិចទឹកនេះ គឺត្រឹមនៅថ្ងៃទី៦ កញ្ញា ឆ្នាំ២០១៩។ នេះជាការលើកឡើងរបស់លោក ស៊ុន ចាន់ថុល រដ្ឋមន្រី្តក្រសួងសាធារណការ និងដឹកជញ្ជូន នាថ្ងៃទី៨កញ្ញានេះ។
ក្នុងដំណើរចុះត្រួតពិនិត្យផ្លូវជាតិលេខ៣ ដែលកំពុងរងការខូចខាតដោយសារទឹកភ្លៀង លោក ស៊ុន ចាន់ថុល បានរៀបរាប់ប្រាប់អ្នកសារព័ត៌មានថា ខេត្តទាំង១១ដែលរងការខូចខាតដោយសារទឹកលិចមាន ខេត្តស្ទឹងត្រែង ក្រចេះ មណ្ឌលគិរី រតនគិរី កោះកុង កំពត កែប កំពង់ស្ពឺ ព្រះវិហារ កំពង់ឆ្នាំង និងខេត្តត្បូងឃ្មុំ។ លោកបានបញ្ជាក់ថា ខេត្តទាំង១១នេះ មានចម្ងាយផ្លូវដែលខូចខាតសរុប៦០គីឡូម៉ែត្រ នឹងបន្តកើនឡើងទៀតផងដែរ ។
លោកបានអះអាងថាក្រសួងបានបញ្ជាមន្ត្រីពាក់ព័ន្ធទាំងអស់ឱ្យត្រៀមគ្រឿងចក្រដើម្បីជួសជុលផ្លូវទាំងនេះឡើងវិញ បន្ទាប់ពីទឹកស្រកពេលចប់រដូវវស្សានេះ។
ផ្លូវជាតិ៧៣ដែលស្ថិតនៅក្នុងខេត្តក្រចេះបានជន់លិចចម្ងាយជាង១០គីឡូម៉ែត្រ ហើយត្រូវអាជ្ញាធរផ្អាកចរាចរណ៍បណ្តោះអាសន្ន ចំពោះយានយន្តគ្រប់ប្រភេទ តាំងពីថ្ងៃព្រឹកថ្ងៃទី៨កញ្ញានេះ។ ការលិចផ្លូវនេះ ដោយសារទឹកទន្លេមេគង្គហក់ឡើងខ្លាំងដល់កម្រិត២២.៧២ម៉ែត្រ ហើយកំពុងជន់លិចតំបន់មួយចំនួន នៅខេត្តតាមដងទន្លេមេគង្គផងដែរ៕
Tag:
ទន្លេមេគង្គ
អាកាសធាតុ
ជំនន់
© រក្សាសិទ្ធិដោយ thmeythmey.com