បាក់ឌុបឆ្នាំ២០១៩៖ សំខាន់គឺសប្បាយចិត្ត ទោះបាននិទ្ទេសអ្វីក៏ដោយ!

ភ្នំពេញ៖ ទោះបីបាននិទ្ទេសផ្សេងៗគ្នាក្នុងការប្រឡងសញ្ញាបត្រមធ្យមសិក្សាទុតិយភូមិក៏ដោយ ក៏បេក្ខជននីមួយៗ នៅតែមានអារម្មណ៍សប្បាយចិត្តដូចគ្នា។ យុវតី ដាមាន សិស្សនិទ្ទេស C ដែលប្រឡងនៅមណ្ឌលវិទ្យាល័យព្រះស៊ីសុវត្ថិ បានប្រាប់សារព័ត៌មានថ្មីៗថា៖ «ខ្ញុំមានអារម្មណ៍រំភើប សប្បាយនិយាយមិនចេញ។ ហើយខ្ញុំតេប្រាប់ប៉ាខ្ញុំមុនគេ ប៉ាខ្ញុំសប្បាយចិត្តពេញមួយផ្ទះ»។ សម្រាប់យុវជន ស៊ូតូ វិញ មកពីសាលា ICS ក៏បានបង្ហាញអារម្មណ៍សប្បាយចិត្តដែរ។ យុវជននិទ្ទេស E រូបនេះ បញ្ជាក់ថា៖ «ឥតខ្វល់ ឲ្យតែជាប់។ ខ្ញុំសប្បាយចិត្តខ្លាំង មុនមកស្ដាប់លទ្ធផល គឺភ័យចង់សន្លប់»។

សូមអញ្ជើញទស្សនាកិច្ចសម្ភាសន៍រវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey.com និងបេក្ខជនប្រឡងជាប់សញ្ញាបត្រមធ្យមសិក្សាទុតិយភូមិដូចតទៅ៖

សូមបញ្ជាក់ថា លទ្ធផលប្រឡងបាក់ឌុបនាឆ្នាំ២០១៩នេះ មានបេក្ខជនប្រឡងជាប់ចំនួន ៧៩ ០៥២នាក់ ត្រូវជា ៦៨.៦២ភាគរយ។ ក្នុងចំណោមបេក្ខជនទាំង ៧៩ ០៥២នាក់ បេក្ខជនប្រឡងជាប់និទ្ទេស A មានចំនួន ៤៤៣នាក់ និទ្ទេស B មានចំនួន ២ ៤៣០នាក់ និទ្ទេស C មានចំនួន ៥ ៨៤៧នាក់។ ចំណែកឯនិទ្ទេស D មានចំនួន ១៤ ១០០នាក់ និងនិទ្ទេស E មានចំនួន ៥៦ ២៣២ នាក់៕