អន្តរជាតិ
សកម្មជនសិទ្ធិមនុស្សហុងកុង Joshua Wong ប្រដូចហុងកុងជាទីក្រុង «បែរឡាំង» សម័យសង្គ្រាមត្រជាក់ សកម្មជនប្រជាធិបតេយ្យ Joshua Wong (AFP)
× ដោយប្រៀបធៀបការតស៊ូរបស់បាតុករនៅហុងកុងនឹងតួនាទីនៃរដ្ឋធានី បែរឡាំង អំឡុងសម័យសង្គ្រាមត្រជាក់ សកម្មជនប្រជាធិបតេយ្យ Joshua Wong បាននិយាយថា បច្ចុប្បន្ន ទីក្រុងកំណើតលោក បានប្រែក្លាយកំពែងការពាររវាងពិភពលោកសេរី និងប្រទេសចិនផ្តាច់ការ។
មានវត្តមានក្នុងព្រឹត្តិការណ៍នៅសភាអាល្លឺម៉ង់ ដើម្បីសាទរសកម្មជនសិទ្ធិមនុស្សជុំវិញពិភពលោកក្នុងទីក្រុងបែរឡាំង ទឹកដីអាល្លឺម៉ង់ យុវជន Joshua Wong បានសន្យាថា ការធ្វើបាតុកម្ម នឹងមិនប្រែជាស្ងប់ស្ងាត់ ក្រោយការសម្រេចចិត្តទម្លាក់ចោលសំណើច្បាប់បត្យាប័នដ៏ចម្រូងចម្រាសពីសំណាក់រដ្ឋាភិបាលហុងកុងនោះឡើយ។
ឈរលើដំបូលអគារសភាអាល្លឺម៉ង់ដែលអាចមើលឃើញដុំថ្មសេសសល់ខ្លះពីជញ្ជាំងបែរឡាំងដែលជាច្រើនទសវត្សរ៍បានខណ្ឌចែករវាងអាល្លឺម៉ង់កម្មុយនីស្ត និងអាល្លឺម៉ង់សេរី សកម្មជនប្រជាធិបតេយ្យវ័យ ២១ឆ្នាំរូបនេះ បញ្ជាក់បែបនេះថា៖«ប្រសិនបើយើងស្ថិតក្នុងសម័យសង្គ្រាមត្រជាក់ថ្មីមែននោះ ហុងកុង គឺជាក្រុងបែរឡាំងថ្មី»។
តាមការចុះផ្សាយរបស់ទីភ្នាក់ងារព័ត៌មាន Reuters យុវជនដ៏មានឥទ្ធិពលប្រចាំទីក្រុងហុងកុងរូបនេះ បានសង្កត់ធ្ងន់ថា៖«យើងទទូចឲ្យពិភពលោកសេរីឈររួមគ្នាជាមួយយើង ក្នុងការប្រឆាំងនឹងរបបផ្តាច់ការចិន»។ ទន្ទឹមនេះ យុវជន Wong ចាត់ទុកមេដឹកនាំចិន ស៊ី ជិនភីងថា «ពុំមែនជាប្រធានាធិបតីឡើយ តែជាអធិរាជ[ចិន]»។
កាលពីសប្តាហ៍មុន មេដឹកនាំហុងកុង លោកស្រី ការី ឡាំ បានធ្វើសម្បទានមួយដើម្បីព្យាយាមបញ្ចប់ការធ្វើបាតុកម្ម ដែលក្នុងនោះមាន ការទម្លាក់ចោលសេចក្តីព្រាងច្បាប់បត្យាប័នជាផ្លូវការ ។ ប៉ុន្តែស្ថានការណ៍នៅតែមិនធូរស្រាលដដែល ខណៈក្រុមបាតុករនៅហុងកុង ប្តេជ្ញាបន្តធ្វើសកម្មភាពតវ៉ា រហូតដល់ការទាមទារទាំងអស់របស់ខ្លួនសម្រេចជោគជ័យ៕
Tag:
ចិន
ហុងកុង
Joshua Wong
© រក្សាសិទ្ធិដោយ thmeythmey.com