កីឡាអន្តរជាតិ
អន្តរជាតិ
ជម្រុះ World Cup៖ ថៃ សិង្ហបុរី និងហ្វីលីពីន សុទ្ធតែឈ្នះ
× ក្រុមកីឡាបាល់ទាត់ជម្រើសជាតិថៃ សិង្ហបុរី និងហ្វីលីពីន ជាក្រុមពីតំបន់អាស៊ានដែលអាចរកបានជ័យជម្នះជាលើកដំបូងរបស់ពួកគេរៀងៗខ្លួនក្នុងការប្រកួតវគ្គជម្រុះ FIFA World Cup 2022 ជុំទីពីរ ដែលធ្វើឡើងនៅថ្ងៃទី១០ ខែកញ្ញា ឆ្នាំ២០១៩។
បន្ទាប់ពីបានត្រឹមស្មើជាមួយវៀតណាមកាលពីប្រកួតបើកឆាកពូល G រូចមក ក្រុមជម្រើសជាតិថៃបានរកឃើញជ័យរបស់ពួកគេហើយនៅជំនួបទី២ ដោយយកឈ្នះម្ចាស់ផ្ទះឥណ្ឌូណេស៊ីដល់ទៅ ៣-០ ដែលធ្វើឡើងនៅកីឡដ្ឋាន Gelora Bung Karno ក្រោមក្រសែភ្នែកអ្នកទស្សនាចំនួន ១១៦០០នាក់។
៣គ្រាប់របស់ថៃ ធ្វើបាននៅវគ្គទីពីរទាំងអស់ ក្រោយបញ្ចប់ទៅសូន្យស្មើនៅវគ្គទី១។ ខ្សែបម្រើ Supachok Sarachart អាចស៊ុតបាន២គ្រាប់ម្នាក់ឯង ពោលគឺគ្រាប់នាំមុខដំបូងនៅនាទី៥៦ និងគ្រាប់ទី៣នៅនាទី៧២ ខណៈមិត្តរួមក្រុមរបស់គេ ខ្សែការពារ Theerathorn Bunmathan រកបាន១គ្រាប់ដោយការស៊ុតពិន័យប៉េណាល់ទីនៅនាទី៦៤។
ជ័យជម្នះនេះបាននាំថៃក្រោមការដឹកនាំរបស់គ្រូបង្វឹកលោក Akira Nishino ទទួលបាន៤ពិន្ទុ ឡើងឈរកំពូលតារាងពូល G បណ្តោះអាសន្ន តាមពីក្រោយដោយអេមីរ៉ាតអារ៉ាប់រួមដែលទទួលបាន៣ពិន្ទុនៅប្រកួតដំបូង។
អេមីរ៉ាតអារ៉ាប់រួម បានវាយបកយកឈ្នះម្ចាស់ផ្ទះម៉ាឡេស៊ីក្នុងលទ្ធផល ២-១។ ខ្សែប្រយុទ្ធ Syafiq Syafiq ជាអ្នករកគ្រាប់បាល់នាំមុខឲ្យម៉ាឡេស៊ីតាំងពី១នាទីដំបូងនៃវគ្គទី១ម្លេះ មុនពេលខ្សែប្រយុទ្ធ Ali Ahmed Mabkhout រកគ្រាប់តាមស្មើវិញនៅនាទី៤៣។ Ali Ahmed Mabkhout ដដែលបានផ្តល់ការខកចិត្តឲ្យក្រុមម្ចាស់ផ្ទះតាមរយៈការស៊ុតគ្រាប់ទី២ ដែលជាគ្រាប់ជ័យជម្នះរបស់អេមីរ៉ាតអារ៉ាប់រួមសម្រាប់ការប្រកួតដំបូងរបស់ពួកគេក្នុងពូល G។
ម៉ាឡេស៊ីឈរនៅលេខរៀងទី៣ មាន៣ពិន្ទុ ខណៈវៀតណាមមាន១ពិន្ទុឈរលេខ៤ ហើយឥណ្ឌូណេស៊ីនៅបាតតារាងមានសូន្យពិន្ទុ។
សម្រាប់សិង្ហបុរីដែលជាក្រុមពីតំបន់អាស៊ានដែលនោះ ក៏កំពុងឈរនៅកំពូលតារាងពូល D ផងដែរក្រោយយកឈ្នះក្រុមភ្ញៀវប៉ាឡេស្ទីន ២-១ នាជំនួបលើកទី២របស់ពួកគេ។ ឆ្លងកាត់២ពីរប្រកួត ស្មើ១ និងឈ្នះ១ នាំឲ្យសិង្ហបុរីទទួលបាន៤ពិន្ទុ នាំមុខក្រុមលេខ២ប៉ាឡេស្ទីនដែលមាន៣ពិន្ទុ ខណៈលេខ៣យេមែនមាន២ពិន្ទុ។ អារ៉ាប៊ីសាអូឌីតដែលទើបប្រកួតមួយលើកឈរលេខ៤មាន១ពិន្ទុ ហើយអ៊ូសបេគីស្ថាននៅបាតតារាងមានសូន្យពិន្ទុ។
ក្រុមពីអាស៊ានមួយទៀត គឺហ្វីលីពីនក៏អាចរកបាន៣ពិន្ទុក្នុងជំនួបលើកទី២ផងដែរ ក្រោយបរាជ័យនៅប្រកួតបើកឆាក។ បន្ទាប់ពីចាញ់ស៊ីរី ៥-២ រួចមក ហ្វីលីពីនបានយកឈ្នះកោះហ្គាមដោយលទ្ធផល ៤-១ ដែលនាំឲ្យពួកគេឈរនៅលេខរៀងទី៣ក្នុងវគ្គជម្រុះពូល A។ ក្នុងពូល A នេះមាន៤ក្រុម លើកលែងកោះហ្គាម សុទ្ធតែមាន៣ពិន្ទុដូចគ្នា ប៉ុន្តែចិនឈរនៅកំពូលតារាងបណ្តោះអាសន្នក្រោយឈ្នះម្ចាស់ផ្ទះម៉ាល់ឌីវ ៥-០ នាជំនួបដំបូងរបស់ពួកគេ ខណៈស៊ីរីឈរលេខ២ ព្រោះចាញ់គ្រាប់ស៊ុត។
ដោយឡែកកម្ពុជា បើទោះជាបង្ហាញទម្រង់លេងដ៏គួរឲ្យភ្ញាក់ផ្អើលក្រោមការដឹកនាំរបស់អ្នកចាត់ការលោក Keisuke Honda និងលោក Felix Dalmas ជាគ្រូបង្វឹកនោះ បានរងបរាជ័យក្នុងផ្ទះខ្លួនឯងដោយចាញ់បារ៉ែន ១-០។ ឆ្លងកាត់ការប្រកួត២លើក គោព្រៃកម្ពុជារកបាន១ពិន្ទុ ឈរនៅលេខរៀងទី៤ ពូល C តែនៅលើហុងកុង ខណៈបារ៉ែននៅកំពូលតារាងមាន៤ពិន្ទុ។ អ៊ីរ៉ង់មាន៣ពិន្ទុ ពីការប្រកួតមួយលើក ហើយអ៊ីរ៉ាក់ឈរលេខ៣មាន១ពិន្ទុ៕
Tag:
World Cup
ជម្រើសជាតិ
© រក្សាសិទ្ធិដោយ thmeythmey.com