អន្តរជាតិ
UN ជំរុញក្រុមប្រយុទ្ធនៅអាហ្វហ្គានីស្ថានចរចាដោយផ្ទាល់ ដើម្បីស្វែងរកសន្តិភាព រូបភាព AFP
× ប្រេសិតអង្គការសហប្រជាជាតិ លោក Tadamichi Yamamoto នៅថ្ងៃទី១០ ខែកញ្ញា បានជំរុញឲ្យភាគីប្រយុទ្ធទាំងអស់នៅអាហ្វហ្គានីស្ថាន បើកការចរចាដោយផ្ទាល់ ដើម្បីបញ្ចប់សង្គ្រាមរាំរៃនៅក្នុងប្រទេស។ ការអំពាវនាវនេះ ធ្វើឡើងបន្ទាប់ពីប្រធានាធិបតី ដូណាល់ ត្រាំ ប្រកាសលុបចោលជំនួបចរចាជាមួយក្រុមឧទ្ទាមតាលីបង់ដែលគ្រោងធ្វើនៅសប្ដាហ៍នេះ។
បន្ទាប់ពីប្រធានាធិបតីអាមេរិក ដូណាល់ ត្រាំ បានប្រកាសថាកិច្ចចរចាសន្តិភាពជាមួយក្រុមតាលីបង់បានស្លាប់រួចមក ភាពតានតឹងនៅក្នុងតំបន់បានត្រលប់មករកភាពក្តៅគគុកឡើងវិញ។ ក្រុមតាលីបង់ដែលចរចាជាមួយអាមេរិកជាច្រើនជុំ បានប្រកាសបន្តសកម្មភាពរបស់ខ្លួន និងគំរាមក្រុងវ៉ាស៊ីនតោនត្រង់ៗថា យោធាអាមេរិក នឹងបន្តបង្ហូរឈាមរបស់ខ្លួនទៀត។
តាមការចុះផ្សាយរបស់ទីភ្នាក់ងារសារព័ត៌មាន AFP តំណាងរបស់អង្គការសហប្រជាជាតិ (UN) លោក Tadamichi Yamamoto បាននិយាយថា អំពើហិង្សាកំពុងគំរាមកំហែងដល់ការបោះឆ្នោតប្រធានាធិបតីនៅអាហ្វហ្គានីស្ថាននាថ្ងៃទី២៨ ខែកញ្ញា។ និយាយនៅឯកិច្ចពិភាក្សារបស់ក្រុមប្រឹក្សាសន្តិសុខ ប្រេសិតអង្គការសហប្រជាជាតិរូបនេះ បានលើកឡើងថា ព្រឹត្តិការណ៍ក្នុងរយៈពេលថ្មីៗនេះ តម្រូវឲ្យមានការដោះស្រាយបញ្ហានយោបាយជាបន្ទាន់ជាងពេលណាៗទាំងអស់។
ក្នុងនេះន័យលោកចង់បញ្ជាក់ថា ជម្លោះប្រដាប់អាវុធ អាចដោះស្រាយបានដោយការសន្ទនាដោយផ្ទាល់ជាមួយគ្នាតែប៉ុណ្ណោះ។ ម្យ៉ាងទៀតកិច្ចចរចាដោយផ្ទាល់គឺវាសំខាន់ណាស់ ដូច្នេះរដ្ឋាភិបាលអាហ្វហ្គានីស្ថាន និងក្រុមតាលីបង់ ត្រូវតែមានជំនួបក្នុងពេលឆាប់ៗនេះ។
ការប្រកាសលែងចរចារបស់អាមេរិក ធ្វើឲ្យក្ដីសង្ឃឹមរកសន្តិភាពបាត់បង់។ ប៉ុន្តែការិយាល័យប្រធានាធិបតីអាហ្វហ្គានីស្ថាន សាទរចំពោះការលុបចោល និងគោរពដល់កិច្ចខិតខំប្រឹងប្រែងរបស់សម្ព័ន្ធមិត្តរបស់ខ្លួន បន្ទាប់ពីលោក ត្រាំ លុបចោលការចរចាជាមួយក្រុមតាលីបង់ នៅCamp David ក្រៅទីក្រុងវ៉ាស៊ីនតោន។
សូមបញ្ជាក់ថា លោកប្រធានាធិបតី ត្រាំ មានគំរោងដកទ័ពអាមេរិកចេញពីអាហ្វហ្គានីស្ថាន ដើម្បីកុំឲ្យមានការចំណាយលើថវិការជាតិច្រើនពេក។ ប៉ុន្តែអាហ្វហ្គានីស្ថានបារម្ភថា ការដកទ័ពរបស់អាមេរិកគឺលឿនពេក ខណៈពេលបញ្ហាក្នុងតំបន់កំពុងតែមានភាពតានតឹង។ ការចរចាជាមួយក្រុមតាលីបង់ ជាផ្នែកមួយនៃគម្រោងរបស់អាមេរិក មុនចាប់ផ្ដើមដកទ័ព ប៉ុន្តែការវាយប្រហារអត្តឃាតថ្មីៗ ធ្វើឲ្យលោក ត្រាំ ប្រកាសបញ្ចប់ការចរចាតែម្ដង៕
Tag:
អាហ្វហ្គានីស្ថាន
© រក្សាសិទ្ធិដោយ thmeythmey.com