អន្តរជាតិ
រដ្ឋមន្ត្រីបរិស្ថានជប៉ុនថ្មី ចង់បិទរ៉េអាក់ទ័រនុយក្លេអ៊ែរទូទាំងប្រទេស Shinjiro Koizumi រដ្ឋមន្ត្រីបរិស្ថានជប៉ុនថ្មី (Bloomberg)
× ទើបទទួលបានតំណែងថ្មីក្នុងការរុះរើគណៈរដ្ឋមន្ត្រីកាលពីថ្ងៃពុធទី ១១ កញ្ញា រដ្ឋមន្ត្រីបរិស្ថានជប៉ុន ស៊ីនជីរ៉ូ កូអ៊ីស៊ូមី (Shinjiro Koizumi) មានបំណងបិទរ៉េអាក់ទ័រនុយក្លេអ៊ែរក្នុងប្រទេសជប៉ុន ដើម្បីបញ្ចៀសមហន្តរាយច្រំដែលដូចនៅ Fukushima ក្នុងឆ្នាំ២០១១ ។
«ខ្ញុំចង់សិក្សាពីវិធីសាស្ត្រ ដែលយើងនឹងកម្ទេចរ៉េអាក់ទ័រទាំងនោះចោល មិនមែនពីរបៀបរក្សាទុកពួកវាទេ»។ លោក Shunjiro Kiuzumi បានបញ្ជាក់បែបនេះ ក្នុងសន្និសីទព័ត៌មានលើកដំបូង កាលពីល្ងាចថ្ងៃទី១១ ខែកញ្ញា ក្រោយពីត្រូវតែងតាំងជារដ្ឋមន្ត្រីបរិស្ថាន ដោយនាយករដ្ឋមន្ត្រីជប៉ុន ស៊ីនហ្សូ អាបេ។ តាមការចុះផ្សាយរបស់ទីភ្នាក់ងារព័ត៌មាន Reuters ក្រសួងបរិស្ថានដែលបច្ចុប្បន្នមានលោក Koizumi ជាប្រមុខ ជាអ្នកគ្រប់គ្រងលើនិយ័តករនុយក្លេអ៊ែររបស់ជប៉ុន។
ការលើកឡើងរបស់កូនប្រុសអតីតនាយករដ្ឋមន្ត្រីជប៉ុន Junichiro Koizumi ដែលជាបុគ្គលប្រឆាំងនុយក្លេអែរដែរនោះ ទំនងជាបង្កើតភាពចម្រូងចម្រាសក្នុងគណបក្សប្រជាធិបតេយ្យសេរីរបស់លោក អាបេ (LDP)។ បក្សកាន់អំណាចនៅជប៉ុននេះ គាំទ្រការវិលត្រលប់មកវិញនូវថាមពលនុយក្លេអ៊ែរ ដោយដាក់ចេញច្បាប់សុវត្ថិភាពតឹងរ៉ឹងថ្មី ក្រោយហេតុការណ៍ដ៏រន្ធត់នៅ Fukushima ។
រ៉េអាក់ទ័រចំនួន ៣ នៅស្ថានីយ៍ Fukushima Daiichi ដំណើរការដោយក្រុមហ៊ុន Tokyo Electri Power បានដួលរលំ ក្រោយរងការប្រហារពីគ្រោះរញ្ជូយដី និងរលកស៊ូណាមិដ៏ធំសម្បើមមួយ ក្នុងខែមីនា ឆ្នាំ២០១១ ។ ការបាក់រលំនេះ បណ្តាលឲ្យធ្លាយវិទ្យុសកម្មចេញមកក្រៅយ៉ាងច្រើនសន្ធឹកសន្ធាប់ ដែលបង្ខំឲ្យមនុស្ស ១៦ម៉ឺននាក់ភៀសខ្លួន ហើយមនុស្សជាច្រើន ពុំត្រឡប់មកវិញឡើយ។
រ៉េអាក់ទ័រជាច្រើនក្នុងប្រទេសជប៉ុន ដែលមុនកើតហេតុការណ៍នៅ Fukushima ផ្គត់ផ្គង់ថាមពលអគ្គិសនី ៣០ សម្រាប់ប្រទេសនេះ កំពុងឆ្លងកាត់ដំណើរការនៃការស្នើសុំអាជ្ញាធរជាថ្មី ក្រោមស្ដង់ដារសុវត្ថិភាពថ្មីដែលដាក់ចេញ។ ហេតុផលគឺថា គ្រោះមហន្តរាយនោះបានកើតឡើងដោយសារតែចន្លោះប្រហោងនៃប្រតិបត្តិការ និងនិយ័តកម្មតឹងរ៉ឹង។
បច្ចុប្បន្ន ជប៉ុន មានរ៉េអាក់ទ័រចំនួន ៦ ដែលកំពុងប្រតិបត្តិការ ក្នុងចំណោមរ៉េអាក់ទ័រទាំង៥៤។
ឪពុករបស់លោករដ្ឋមន្ត្រីបរិស្ថានជប៉ុន Shinjiro Koizumi ដែលជានាយករដ្ឋមន្ត្រីដ៏មានប្រជាប្រិយភាព ឥឡូវចូលនិវត្តន៍ពីសភា បានរិះគន់ខ្លាំងៗលើការប្រើប្រាស់ថាមពលអាតូមិក ក្រោយវិបត្តិនុយក្លេអ៊ែរ នៅ Fukushima ៕
Tag:
ជប៉ុន
បរិស្ថាន
Shinjiro Koizumi
រ៉េអាក់ទ័រនុយក្លេអ៊ែរ
© រក្សាសិទ្ធិដោយ thmeythmey.com