អន្តរជាតិ
អាមេរិក ពន្យារពេលដំឡើងពន្ធលើចិន ព្រោះចំថ្ងៃកំណើតសាធារណរដ្ឋប្រជាមានិតចិនទី៧០ ប្រធានាធិបតី ដូណាល់ ត្រាំ និងប្រធានាធិបតី ស៊ី ជិនភីងនៅកិច្ចប្រជុំG20 អូសាកា ប្រទេសជប៉ុន
× ប្រធានាធិបតីអាមេរិក ដូណាល់ ត្រាំ នៅថ្ងៃទី១១ ខែកញ្ញា បានប្រកាសថា អាមេរិកយល់ព្រមពន្យាពេលដំឡើងពន្ធលើទំនិញចិនប្រមាណ២៥០ពាន់លានដុល្លារដែលគ្រោងអនុវត្តនៅថ្ងៃទី១ ទៅថ្ងៃទី ១៥ ខែតុលាវិញ។ ការពន្យាពេលនេះ ត្រូវធ្វើឡើងតាមសំណើរស្នើសុំពីសំណាក់មន្ត្រីជាន់ខ្ពស់រដ្ឋាភិបាលចិន។
ការដំឡើងពន្ធពី២៥ភាគរយទៅ៣០ភាគរយលើទំនិញចិនចំនួន២៥០ពាន់លានដុល្លារដែលគ្រោងចាប់ផ្ដើមនៅថ្ងៃទី១ ខែតុលា ត្រូវបានលោកប្រធានាធិបតី ដូណាល់ ត្រាំ ពន្យារទៅកាន់ថ្ងៃទី១៥ ខែដដែលវិញ។ បើតាមលោក ត្រាំ ការពន្យារពេលនេះ ធ្វើឡើងតាមសំណើឧបនាយករដ្ឋមន្ត្រី Lui He ដែលជាប្រមុខការចរចារបស់ចិនក្នុងការបញ្ចប់សង្គ្រាមពាណិជ្ជកម្ម។
តាមរយៈការសរសេរនៅលើTwitter លោក ត្រាំ បានលើកឡើងថា៖ «យើងយល់ព្រមលើការពន្យាពេលយកពន្ធ ២៥០ពាន់លានដុល្លារ ហើយនេះគឺជាកាយវិការដ៏ល្អមួយ»។ ល្អត្រង់ថា លោក ត្រាំ មិនចង់ឲ្យការដំឡើងពន្ធរបស់អាមេរិក ប៉ះពាល់ការអបអរថ្ងៃគំរប់ខួបទី៧០ នៃកំណើតសាធារណរដ្ឋប្រជាមានិតចិននៅថ្ងៃទី១ ខែតុលាឡើយ។
ការអះអាងរបស់ប្រធានាធិបតីអាមេរិកបែបនេះ ក៏ធ្វើឡើងបន្ទាប់ពីចិន បានដកទំនិញអាមេរិក ១៦ប្រភេទចេញពីបញ្ជីនៃការដំឡើងពន្ធរបស់ខ្លួនរយៈពេលមួយឆ្នាំ។ ទំនិញ ១៦ប្រភេទនេះមានដូចជាផលិតផលគ្រឿងសមុទ្រ ថ្នាំប្រឆាំងនឹងជំងឺមហារីក និងថ្នាំសម្លាប់សត្វល្អិតជាដើម។ នេះបើតាមរបាយការណ៍របស់គណៈកម្មាធិការពន្ធគយ និងក្រុមប្រឹក្សារដ្ឋរបស់ចិន។
យ៉ាងណាក៏ដោយ ការទំនិញ ដែលត្រូវបានពន្យាពីការយកពន្ធទាំងនោះ គឺមិនរាប់បញ្ជូលជាមួយផលិតផលកសិកម្មឡើង ព្រោះវាអាចបំផ្លាញដល់កិច្ចព្រមព្រៀងចុងក្រោយរបស់ប្រទេសទាំងពីរបាន។ ម្យ៉ាងទៀតការពន្យាលើការយកពន្ធនេះ គឺដាក់នៅលើពន្ធ ដែលត្រូវតម្លើងចាប់ពី ២៥ភាគរយ ដល់៣០ភាគរយ។
សូមបញ្ជាក់ថាអ្នកតំណាងរបស់ចិន និងអាមេរិក នឹងមានជំនួបចរចាពាណិជ្ជកម្មជាមួយគ្នានៅទីក្រុងវ៉ាស៊ីនតោននៅដើមខែតុលាខាងមុខនេះ ដើម្បីដោះស្រាយបញ្ហាពីការយកពន្ធពីគ្នាទៅវិញទៅមកដ៏ច្រើនសន្ទឹកសន្ទាប់។ តាមពិតទៅ ចិន និងអាមេរិក ក៏ទើបតែចាប់ផ្តើមយកពន្ធពីគ្នាទៅវិញទៅមកជាលើកដំបូង ក្នុងតម្លៃជាច្រើនពាន់លានដុល្លារកាលពីថ្ងៃទី១ ខែកញ្ញា៕
Tag:
ចិន
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com