ONE Championship
កីឡាជាតិ
ជាតិ
សហព័ន្ធកីឡាយុទ្ធគុនចម្រុះកម្ពុជាបើកវគ្គបណ្ដុះបណ្ដាលអាជ្ញាកណ្ដាល និងចៅក្រម ឆាប់ៗនេះ
×
អត្ថបទ៖ ស៊ីធី
លោក កែ ប៊ិនសូរស្មី អនុប្រធានសហព័ន្ធកីឡាយុទ្ធគុនចម្រុះកម្ពុជា ប្រកាសថាសហព័ន្ធនឹងបើកវគ្គបណ្ដុះបណ្ដាលអាជ្ញាកណ្ដាល និងចៅក្រមលើកដំបូងនាពេលឆាប់ៗនេះ ពោលគឺប្រហែលជានៅចុងខែកញ្ញានេះ ដោយមានរយៈពេល៣ថ្ងៃ។
អនុប្រធានសហព័ន្ធកីឡាយុទ្ធគុនចម្រុះកម្ពុជាបានឲ្យដឹងថា ៖«អ្នកចូលរួម ឬ សិក្ខាកាមនឹងទទួលបានការរៀនសូត្រពីទ្រឹស្ដីផ្ដោតលើច្បាប់ទម្លាប់នៃការប្រកួតត្រឹមត្រូវ ឬ មិនត្រូវ, វគ្គអនុវត្តផ្ទាល់, របៀបដាក់ពិន្ទុ និង របៀបញែកកីឡាករឲ្យមានសុវត្ថិភាព រួមទាំងមេរៀនជាច្រើនទៀត»។
នេះជាការបោះជំហានពីមួយដំណាក់ទៅដំណាក់កាលទៀតដើម្បីស្របតាមគោលការណ៍អភិវឌ្ឍន៍ក្បាច់គុនចម្រុះនៅកម្ពុជា។ ពេលសិក្ខាកាម, អាជ្ញាកណ្ដាល ឬ ចៅក្រម ទទួលបានវគ្គបណ្ដុះបណ្ដាលខាងលើ វាជាការត្រៀមខ្លួនមួយសម្រាប់សហព័ន្ធកីឡាយុទ្ធគុនចម្រុះកម្ពុជា និង ដៃគូពាក់ព័ន្ធក្នុងគោលបំណងឈានទៅរៀបចំការប្រកួតព្រឹត្តិការណ៍គុនចម្រុះឡើងវិញនៅក្នុងស្រុក។
វគ្គបណ្ដុះបណ្ដាលនេះត្រូវបានគេរំពឹងថាមាន អាជ្ញាកណ្ដាល និង ចៅក្រមចំនួន ១០ រូបចូលរួម។ នេះជាការរៀបចំដែលមានការគ្រោងទុកពីសហព័ន្ធកីឡាយុទ្ធគុនចម្រុះកម្ពុជា។ លោក អនុប្រធានសហព័ន្ធបានគូសបញ្ជាក់ថា ការបង្កើតធនធានកីឡាករពិតជាសំខាន់ខ្លាំងណាស់ ប៉ុន្តែ ការបណ្ដុះបណ្ដាលចំណេះដឹងសម្រាប់គ្រូបង្វឹក និង ក្លិបបន្ថែមទៀតឲ្យទៅដល់កម្រិតល្អក៏ជារឿងមិនអាចខ្វះបានដែរ ហើយវាជាមូលដ្ឋានគ្រឹះឈានទៅរៀបចំការប្រកួតMMA នៅក្នុងស្រុក ដែលត្រូវការអាជ្ញាកណ្ដាល និង ចៅក្រមមានចំណេះជំនាញគ្រប់គ្រាន់។ ពួកគេជាបានដើរតួយ៉ាងសំខាន់ដើម្បីអភិវឌ្ឍគុនចម្រុះនៅកម្ពុជា។
វគ្គបណ្ដុះបណ្ដាលខាងលើមានគ្រូឧទ្ទេស ហ៊ុន ច័ន្ទរាជ្យ ដែលជាអគ្គលេខាធិការសហព័ន្ធកីឡាយុទ្ធគុនចម្រុះកម្ពុជា និងម្ចាស់ក្លិប Cambodian Top Team អមដោយកីឡាករគុនចម្រុះ ពីររូបផ្សេងទៀតដែលជួយក្នុងការប្រកួតអនុវត្តន៍ផ្ទាល់។
គួរដឹងដែរថា សហព័ន្ធកីឡាយុទ្ធគុនចម្រុះកម្ពុជាត្រូវបានបង្កើតឡើងកាលខែតុលាឆ្នាំ ២០១៨ ក្នុងនោះមានសមាជិកប្រតិបត្តិចំនួន៩រូបដូចជា ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាជាប្រធាន, លោកម៉ក់ សំអុល និង លោក កែ ប៊ិនសូរស្មី ជាអនុប្រធាន ខណៈលោក ហ៊ុន ច័ន្ទរាជ្យ ជាអគ្គលេខាធិការ។ ចំណែកកញ្ញា ឈិន រីយ៉ា ជាអគ្គលេខាធិការរង, លោក អន សុវុឌ្ឍីយ៉ា ជាអគ្គហិរញ្ញិក, កញ្ញា សេង សុខសេរី ជាអគ្គហិរញ្ញិករង និង ២រូបទៀតមានលោក ធន សកល និង លោក គង់ ចាន់ទីណា។ ក្រោយពីការរៀបចំរចនាសម្ព័ន្ធស្រេចបាច់សហព័ន្ធក្មេងខ្ចីមួយបានធ្វើសកម្មភាពជាច្រើនដូចជាបង្កើតវិបសាយផ្ទាល់ខ្លួនដើម្បីទទួលចុះឈ្មោះកីឡាករនិងគ្រូបង្វឹកទាំងក្នុងនិងក្រៅស្រុកជាហូរហែ។ មួយទៀតសហព័ន្ធបានបង្កើតទំនាក់ទំនងល្អជាមួយក្លិប និង គ្រូបង្វឹកនៅក្រៅប្រទេសមានដូចជាអាមេរិក កាណាដា អូស្ត្រាលី និង បារាំងជាដើម៕
កុំភ្លេចតាមដាន កម្មវិធីកក្រើកមិនធ្លាប់មានគម្រប់១០០លើកនៃការរៀបចំការប្រកួតរបស់ស្ថា
ប័ន ONE Championship ត្រូវបានដាក់ឈ្មោះថា ONE: CENTURY។ ONE CENTURY នឹងរៀបចំឡើងនៅថ្ងៃទី ១៣ តុលា ខាងមុខនឹងផ្សាយបន្តផ្ទាល់ចាប់ពីម៉ោង ៩ យប់តទៅ (ម៉ោងកម្ពុជា) តាមរយៈ https://www.facebook.com/ONEChampionship/ , ONE Super App និង YouTube: https://www.youtube.com/user/OneFCMMA។
© រក្សាសិទ្ធិដោយ thmeythmey.com