រដ្ឋាភិបាលឥណ្ឌូណេស៊ី ព្រមានដាក់ទោសព្រហ្មទណ្ឌធ្ងន់ធ្ងរប្រឆាំងអាជីវកម្មខុសច្បាប់ ដែលបង្កជាអ័ព្ទ

អន្តរជាតិ

រដ្ឋាភិបាលឥណ្ឌូណេស៊ី ព្រមានដាក់ទោសព្រហ្មទណ្ឌធ្ងន់ធ្ងរប្រឆាំងអាជីវកម្មខុសច្បាប់ ដែលបង្កជាអ័ព្ទ

16, Sep 2019 , 11:45 am

រូបភាព

ដោយ:

អ័ព្ទ ដែលផ្តើមចេញពីភ្លើងឆេះព្រៃនៅកោះមួយចំនួនរបស់ឥណ្ឌូណេស៊ី បានក្លាយជាចំណុចថ្នាំងថ្នាក់ជាថ្មីសម្រាប់ឥណ្ឌូណេស៊ី និងបណ្តាមិត្តជិតខាងអាស៊ាន។ ទោះបីជារដ្ឋាភិបាលក្រុងហ្សាការតា មានការប្តេជ្ញាចិត្តខ្ពស់រួមទាំងដាក់មុខមាត់ជាតិក្នុងការទប់ស្កាត់ការឆេះព្រៃយ៉ាងណាក្តី បញ្ហាបំពុលអ័ព្ទ នៅតែមិនរារាំងបាន និងថែមទាំងបង្កឲ្យមានផលលំបាកទាំងក្នុងស្រុក និងបណ្តាប្រទេសជិតខាងទៀត។

រដ្ឋាភិបាលឥណ្ឌូណេស៊ី នៅថ្ងៃទី១៤ ខែកញ្ញាបានចេញសេចក្តីថ្លែងការណ៍មួយ ដោយបានសន្យា អនុវត្តទោសព្រហ្មទណ្ឌធ្ងន់ធ្ងរប្រឆាំងនឹងក្រុមហ៊ុនទាំងឡាយណា ដែលជាប់ពាក់ព័ន្ធនឹងការដុតបំផ្លាញព្រៃឈើ ខណៈបញ្ហាបំពុលអ័ព្ទកាន់តែមានសភាពធ្ងន់ធ្ងរទៅក្នុងស្រុក និងក្នុងបណ្តាប្រទេសជិតខាងឥណ្ឌូណេស៊ី។ នេះបើយោងតាមការចុះផ្សាយរបស់សារព័ត៌មាន Strait Times។

សេចក្តីថ្លែងការណ៍របស់រដ្ឋាភិបាលឥណ្ឌូណេស៊ី ធ្វើឡើងបន្ទាប់ពី មានការផ្កែផ្កា និងចោទប្រកាន់ដាក់គ្នាទៅវិញទៅមករវាង មន្ត្រីជាន់ខ្ពស់ម៉ាឡេស៊ី និងឥណ្ឌូណេស៊ី ស្តីពីអ្នកបង្កឲ្យមានភ្លើងឆេះព្រៃ និងអ័ព្ទ។ ភាគីម៉ាឡេស៊ី បានចោទប្រកាន់ឥណ្ឌូណេស៊ី ថាបរាជ័យក្នុងការគ្រប់គ្រងការឆេះព្រៃ រាប់រយកន្លែង ដែលបង្កឲ្យកើតជាអ័ព្ទ និងបណ្តាលឲ្យសាលារៀន និងការប្រកបរបររបស់ប្រជាជនម៉ាឡេស៊ី ដែលជាប់ព្រំដែនត្រូវផ្អាកដំណើរការសិន។

អ្វីដែលគួរឲ្យកត់សម្គាល់នោះ តាមការអះអាងរបស់រដ្ឋមន្ត្រីបរិស្ថាន និងរុក្ខាប្រមាញ់ឥណ្ឌូណេស៊ី Siti Nurbaya Bakar បញ្ហាអ័ព្ទនេះ មិនមែនជាការទទួលខុសត្រូវរបស់ឥណ្ឌូណេស៊ីទាំងអស់នោះទេ ក៏ប៉ុន្តែ វា ក៏ជាការទទួលខុសត្រូវមួយចំនួនរបស់ក្រុមហ៊ុនម៉ាឡេស៊ី និងក្រុមហ៊ុនសិង្ហបុរី ដែលទទួលបានសិទ្ធិពីរដ្ឋាភិបាលឥណ្ឌូណេស៊ី ដើម្បីដំណើរអាជីវកម្មផលិតដូងប្រេង នៅក្នុងទឹកដីឥណ្ឌូណេស៊ី។

តាមពិតទៅបញ្ហាអ័ព្ទ ដែលផ្តើមចេញឡើងពីភ្លើងឆេះព្រៃនៅឥណ្ឌូណេស៊ី ដែលជាប្រភពផ្គត់ផ្គង់ដូងប្រេងធំបំផុតរបស់ពិភពលោក មិនមែនជារឿងថ្មី និងម្តងម្កាលនោះទេ។ បញ្ហានេះ បានកើតជារៀងរាល់ឆ្នាំ និងអូសបន្លាយអស់រយៈពេលច្រើនឆ្នាំមកហើយ ដោយគ្មានដំណោះស្រាយប្រសិទ្ធភាពណាមួយ ត្រូវបានអនុវត្ត។

កន្លងមក លោកប្រធានាធិបតីឥណ្ឌូណេស៊ី ចូកូ វីដូដូ ក៏បានទទួលស្គាល់ពីកម្សោយក្នុងការអនុវត្តការងារទប់ស្កាត់ភ្លើងឆេះព្រៃ ដែលលោក ចាត់ទុកបញ្ហានេះ ជាបញ្ហាមុខមាត់របស់ប្រទេស និងជាបញ្ហាចម្បងមួយ ដែលអាចប៉ះពាល់ដល់សេដ្ឋកិច្ចជាតិទៀតផង។ ដោយសារតែបញ្ហានេះដែរ ប្រមុខដឹកនាំប្រទេសសិង្ហបុរី និងម៉ាឡេស៊ី ក៏បានមានរឿងប្រទាំងប្រទើសការទូតជាមួយនឹងឥណ្ឌូណេស៊ីផងដែរ៕