ពីនេះ ពីនោះ
ព័ត៍មានសុខភាព
ចង់ស្រកទម្ងន់ឆាប់រហ័សមិនប៉ះពាល់សុខភាពមែនទេ? កុំរំលងអត្ថបទនេះ
× ភាពតានតឹង ការគេងមិនគ្រប់ និងទទួលទានអាហារគ្មានសុខភាពល្អមិនត្រឹមតែជះឥទ្ធិពលចំពោះសុខភាពរាងកាយប៉ុណ្ណោះទេ ប៉ុន្តែក៏ធ្វើឱ្យកើនទម្ងន់ផងដែរ។ ប៉ុន្តែកុំបារម្ភ! ក្រៅពីការធ្វើលំហាត់ប្រាណហើយនោះ ការជ្រើសរើសអាហារត្រឹមត្រូវមកទទួលទានក៏ជួយឲ្យស្រកទម្ងន់គួរឱ្យកត់សម្គាល់។ ថាតើអាហារទាំងនោះមានអ្វីខ្លះទៅ?
ថ្ងៃនេះយើង នឹងបង្ហាញពីអាហារ រួមទាំងដែលជួយដុតបំផ្លាញជាតិខ្លាញ់ ក៏ដូចជាបង្កើនការដុតរំលាយអាហារក្នុងរាងកាយ ៖
១. ផ្កាខាត់ណាខៀវ
ជាប្រភពដ៏ប្រសើរនៃជាតិកាល់ស្យូមដែលជួយពន្លឿនការដុតរំលាយអាហារក្នុងរាងកាយ។ វាក៏មានផ្ទុកសម្បូរទៅដោយជាតិសរសៃ វីតាមីន C វីតាមីន K និងវីតាមីន A ល្អចំពោះការសម្រកទម្ងន់គួរឱ្យកត់សម្គាល់។
២. ផ្លែបឺរ
មានផ្ទុកសម្បូរទៅដោយជាតិខ្លាញ់សុខភាពល្អ monounsaturated ប្រូតេអ៊ីន ជាតិសរសៃ និងសារធាតុចិញ្ចឹមដែលផ្ដល់អត្ថប្រយោជន៍ចាំបាច់ជាច្រើនពិសេសកំឡុងពេលអ្នកព្យាយាមសម្រកទម្ងន់។ ផ្លែបឺរក៏ជាប្រភពដ៏ល្អនៃអាស៊ីតខ្លាញ់ oleic ដែលជួយធ្វើឱ្យឆាប់ឆ្អែតផងដែរ។
៣. គ្រាប់ធញ្ញជាតិ
ជាប្រភពដ៏ប្រសើរនៃជាតិខ្លាញ់សុខភាពល្អ ជាតិសរសៃ ព្រមទាំងអាស៊ីតខ្លាញ់អូមេហ្គា ៣ ខ្ពស់ដែលជួយក្នុងការសម្រកទម្ងន់បានយ៉ាងប្រសើរ។ វាជួយទប់ស្កាត់ចំណង់អាហារ និងជួយឲ្យឆ្អែតបានយូរ។ ដូច្នេះកុំភ្លេចបន្ថែមគ្រាប់ធញ្ញជាតិមួយក្ដាប់ដៃពេញក្នុងរបបអាហារប្រចាំថ្ងៃរបស់អ្នក។
៤. ទឹកដូង
ទឹកដូងមានផ្ទុកបរិមាណជាតិខ្លាញ់ទាបបំផុត ដូច្នេះទើបវាជាជម្រើសនៃភេសជ្ជៈដ៏ប្រសើរសម្រាប់អ្នកចង់ស្រកទម្ងន់។ វាក៏ជួយកាត់បន្ថយចំណង់អាហារ និងធ្វើឱ្យអ្នកមានអារម្មណ៍ឆ្អែតបានយូរផងដែរ។
៥. ម្ទេសប្លោក
ម្ទេសប្លោកជាប្រភពដ៏ប្រសើរនៃជាតិសរសៃនិងជាតិទឹកដែលធ្វើឱ្យអ្នកមានអារម្មណ៍ឆ្អែតបានយូរបន្ទាប់ពីទទួលទាន។ លើសពីនេះទៅទៀតបន្លែនេះថែមទាំងមានប្រសិទ្ធភាពធ្វើឱ្យប្រព័ន្ធរំលាយអាហារកាន់តែមានភាពសកម្មជាងមុនទៀតផង។
៦. ប្រេងអូលីវ
ជម្រើសនៃអាហារមួយប្រភេទទៀតដែលអ្នកគួរដាក់បញ្ចូលក្នុងរបបអាហារប្រចាំថ្ងៃដើម្បីស្រកទម្ងន់នោះ គឺប្រេងអូលីវ ហើយប្រេងនេះក៏ប្រសើរសម្រាប់សុខភាពរាងកាយទាំងមូលផងដែរ។ អ្នកអាចបន្ថែមវាក្នុងអាហារសាលាដនិងទឹកជ្រលក់ជាដើម៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com