អន្តរជាតិ
សកម្មជនហុងកុង ស្នើនៅមុខសមាជិកសភាអាមេរិកឲ្យដាក់សម្ពាធលើប៉េកាំង សកម្មជនទាមទារប្រជាធិបតេយ្យ Joshua Wong ផ្តល់សក្ខីកម្មនៅមុខសមាជិកសភាអាមេរិក នៅ Capitol Hill ថ្ងៃ១៧ កញ្ញា ២០១៩ (AFP)
× សកម្មជនគាំទ្រប្រជាធិបតេយ្យនៃទីក្រុងហុងកុង បានស្នើដោយផ្ទាល់នៅមុខសមាជិកសភាអាមេរិកឲ្យដាក់សម្ពាធលើរដ្ឋាភិបាលក្រុងប៉េកាំង និងទទូចឲ្យសភាអាមេរិក អនុម័តច្បាប់ថ្មីដើម្បីគាំទ្រស្វ័យភាពក្រុងហុងកុង។ បើចូលជាធរមានមែននោះ ច្បាប់នេះនឹងតម្រូវឲ្យក្រុងវ៉ាស៊ីនតោនដាក់ទណ្ឌកម្មលើមន្ត្រីចិន ដែលទទួលខុសត្រូវលើការធ្វើឲ្យបាត់បង់លទ្ធិប្រជាធិបតេយ្យ និងសិទ្ធិមនុស្សនៅហុងកុង។
សកម្មជនទាមទារប្រជាធិតេយ្យ រួមមាន យុវជន Joshua Wong និងតារាចម្រៀងហុងកុង Denise Ho បានធ្វើដំណើរការទៅដល់រដ្ឋធានីវ៉ាស៊ីនតោន ដើម្បីផ្តល់សក្ខីកម្មចំពោះមុខគណៈកម្មការប្រតិបត្តិទទួលបន្ទុកលើប្រទេសចិននៃសភាអាមេរិក ខណៈភាពវឹកវរក្នុងក្រុងហុងកុងចូលដល់ថ្ងៃទី១០០ហើយនោះ។
អ្នកប្រវត្តិសាស្ត្រ នឹងក្រឡេកមកមើលឆ្នាំ ២០១៩ ជាចំណុចរបត់មួយ។ សកម្មជនហុងកុង Wong និយាយបែបនេះ ដោយបង្ហាញក្តីសង្ឈឹមថា ពួកគេនឹងសាទរសភាអាមេរិក ដែលឈរនៅខាងប្រជាជនហុងកុង លទ្ធិប្រជាធិបតេយ្យ និងសិទ្ធិមនុស្ស។
ផ្តល់សក្ខីកម្មនៅថ្ងៃទី១៧ កញ្ញា នៅវិមាន Capitol អាមេរិក យុវជនវ័យ ២២ឆ្នាំ Joshua Wong ដែលមេដឹកនាំម្នាក់នៃចលនាឆ័ត្រកាលពីឆ្នាំ២០១៤ បញ្ជាក់ថា ក្រុងប៉េកាំង បានប្រែក្លាយយុវជនមួយជំនាន់តែម្តងឲ្យក្លាយជាអ្នកតវ៉ាប្រឆាំងរដ្ឋាភិបាល។ ទន្ទឹមនេះ Wong ក៏បានព្រមានទៀតថា ប្រធានាធិបតីចិន ស៊ី ជិនភីង ប្រហែលចាត់វិធានការកាន់តែខ្លាំងឡើង នៅមុនខួបទី៧០ឆ្នាំនៃកំណើតប្រទេសចិន ដែលគ្រោងធ្វើឡើងនាថ្ងៃទី១ ខែតុលាខាងមុខ។
ដាក់ស្នើឡើងដោយ សមាជិកព្រឹទ្ធសភា Marco Rubio នៃរដ្ឋ Florida និងតំណាងរាស្ត្រ Christopher Smith នៃរដ្ឋ New Jersey សេចក្តីព្រាងច្បាប់ស្តីពីប្រជាធិបតេយ្យនិងសិទ្ធិមនុស្សហុងកុង នឹងតម្រូវឲ្យសហរដ្ឋអាមេរិកដាក់ទណ្ឌកម្មប្រឆាំងមន្ត្រីចិន ដែលទទួលខុសត្រូវចំពោះការបំផ្លាញសេរីភាពមូលដ្ឋានក្នុងក្រុងហុងកុង។ ការគាំទ្រក្នុងសភាទាំងពីររបស់អាមេរិក កំពុងកើនឡើងសម្រាប់សេចក្តីព្រាងច្បាប់មួយនេះ ដែលបច្ចុប្បន្នទទួលបានការគាំទ្រពីអ្នកតាក់តែងច្បាប់ចំនួន ៤៥ នាក់ ទាំងក្នុងព្រឹទ្ធសភា និងសភាតំណាងរាស្ត្រ។
ទោះជាបែបនេះក្តី រដ្ឋាភិបាលក្រុង ប៉េកាំង បានចាត់ទុកសំណើច្បាប់នេះជាភស្តុតាងនៃកិច្ចប្រឹងប្រែងពីសំណាក់កម្លាំងបរទេសក្នុងគោលដៅជ្រៀតជ្រៀកកិច្ចការរបស់ទីក្រុងហុងកុង ដែលខ្លួនចាត់ទុកជា បញ្ហាផ្ទៃក្នុង ។
តាមការចុះផ្សាយរបស់ទីភ្នាក់ងារព័ត៌មាន AFP តារាចម្រៀងហុងកុង និងជាសកម្មជន Denise Ho បានអំពាវនាវឲ្យអ្នកតាក់តែងច្បាប់អាមេរិកអនុម័តសេចក្តីព្រាងច្បាប់ ហើយនិងបាននិយាយថា៖«នេះមិនមែនជាការស្នើសុំ សម្រាប់អ្វីដែលហៅថា ការជ្រៀតជ្រែកពីបរទេសឡើយ ហើយក៏ពុំមែនសម្រាប់ឯករាជ្យភាពហុងកុងផងដែរ»។ កញ្ញា Ho សង្កត់ធ្ងន់ថា វាជាការស្នើសុំបន្ទាន់មួយសម្រាប់សិទ្ធិមនុស្សជាសកល សម្រាប់លទ្ធិប្រជាធិបតេយ្យ និងសេរីភាពក្នុងការជ្រើសរើស។
ប្រសិនបើទីក្រុងហុងកុង បាត់បង់ស្វ័យភាពមែននោះ រដ្ឋាភិបាលចិន នឹងប្រើភាពជោគជ័យមួយនេះជាយានមួយសម្រាប់ពង្រីកឥទ្ធិពលនៃរបបផ្តាច់ការខ្លួននៅបរទេស ព្រមទាំងប្រើអំណាចសេដ្ឋកិច្ចខ្លួនដើម្បីលួងលោមបណ្តាប្រទេសដទៃឲ្យអនុលោមតាមគុណតម្លៃនៃលទ្ធិកម្មុយនីស្ត។ សកម្មជន Ho ព្រមានបន្ថែមបែបនេះ៕
Tag:
សហរដ្ឋអាមេរិក
ហុងកុង
បាតុកម្ម
© រក្សាសិទ្ធិដោយ thmeythmey.com