ICC-Preah Vihear ប្រជុំនៅសៀមរាប ផ្តោតលើលទ្ធផលជួសជុលប្រាសាទព្រះវិហារ និងកោះកែរ

ជាតិ

ICC-Preah Vihear ប្រជុំនៅសៀមរាប ផ្តោតលើលទ្ធផលជួសជុលប្រាសាទព្រះវិហារ និងកោះកែរ

19, Sep 2019 , 3:57 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ គណៈកម្មការសម្របសម្រួល អន្តរជាតិដើម្បីអភិរក្ស និងលើកតម្លៃរមណីយដ្ឋានប្រាសាទព្រះវិហារ (ICC-Preah Vihear) បានបើកកិច្ចប្រជុំបច្ចេកទេសលើកទី៥ នៅព្រឹកថ្ងៃទី១៩ ខែកញ្ញា ឆ្នាំ២០១៩ នៅអាជ្ញាធរជាតិអប្សរា ក្រោមវត្តមានលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រ។ ក្នុងនោះក៏មានការចូលរួមពីសហប្រធានភាគីចិន លោកZHOU Jiagui និងសហប្រធានភាគីឥណ្ឌា លោកស្រី Manika JAIN និងមានការចូលរួមពីប្រទេសជាសមាជិកស្ថាបនិករួមមាន បារាំង ប៊ែលហ្សិច ជប៉ុន ថៃឡង់ដ៏ សហរដ្ឋអាមេរិច ព្រមទាំង អ្នកជំនាញការជាតិ និងអន្តរជាតិលើផ្នែកអភិវឌ្ឍន៍ និងអភិរក្ស ភ្ញៀវកិត្តិយសជាតិ និងអន្តរជាតិ សរុបប្រមាណ ២៥០នាក់។

អគ្គនាយកអាជ្ញាធរជាតិព្រះវិហារ លោក គង់ ពុទ្ធិកា បានផ្តល់បទសម្ភាសដល់អ្នកសារព័ត៌មានពីរបៀបវារៈសំខាន់ៗដែលនឹងត្រូវធ្វើបទបង្ហាញក្នុងកិច្ចប្រជុំបច្ចេកទេសនេះ ដែលក្នុងនោះផ្តោតជាសំខាន់លើលទ្ធផលកិច្ចការអភិរក្សនៅរមណីយដ្ឋានប្រាសាទព្រះវិហារ និងរមណីយដ្ឋានប្រាសាទកោះកែរ។ លោកបន្ថែមថា នៅប្រាសាទព្រះវិហារ ក្រុមអ្នកជំនាញនឹងធ្វើបទបង្ហាញពីលទ្ធផលនៃការសិក្សាដើម្បីអភិរក្សជណ្ដើរខាងជើង ក្រោមមូលនិធិស្ថានទូតសហរដ្ឋអាមេរិកដើម្បីអភិរក្សបេតិកភណ្ឌវប្បធម៌ដែលគម្រោងនេះបានចាប់ផ្តើមនៅឆ្នាំ២០១៨-២០១៩។

ចំណែកនៅប្រាសាទកោះកែរ អ្នកជំនាញនឹងធ្វើបទបង្ហាញពីលទ្ធផលសិក្សាពីការរៀបចំផែនការមេអភិវឌ្ឍន៍ទេសចរណ៍ ព្រោះថាកោះកែរជារមណីយដ្ឋានទេសចរណ៍និងមិនទាន់មានផែនការអភិវឌ្ឍន៍ទេសចរណ៍នៅឡើយ។ ក្រុមអ្នកជំនាញនឹងធ្វើបទបង្ហាញដល់សមាជិកគណៈកម្មការអាយស៊ីស៊ី-ព្រះវិហារ ក៏ដូចជាដើម្បីសុំអនុសាសន៍បន្ថែមលើការងារដែលបានដាក់ចេញកន្លងមក៕