ជាតិ
លោក រៀល ខេមរិន្ទ្រ៖ បើបក្សសង្គ្រោះជាតិរំលាយហើយ! ហេតុអ្វីថាខ្ញុំ ក្បត់បក្ស? រូបពីហ្វេសប៊ុកលោក រៀល ខេមរិន្ទ្រ
× ភ្នំពេញ៖ គណបក្សខ្មែរអភិរក្សនិយមរបស់លោក រៀល ខេមរិន្ទ្រ អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ ទើបត្រូវបានក្រសួងមហាផ្ទៃ សម្រេចទទួលចុះឈ្មោះបក្សក្នុងបញ្ជី កាលពីថ្ងៃ១៨ កញ្ញា នាពេលថ្មីៗនេះ។ គោលបំណងនៃការបង្កើតបក្សចូលរួមនយោបាយនេះ ត្រូវបានលោក រៀល ខេមរិន្ទ្រ អះអាងថា លោកចង់ចូលរួមដោះស្រាយបញ្ហាសង្គម តាមរយៈគោលនយោបាយបែបសន្តិភាពរបស់ខ្លួន។
សម្រាប់លោក រៀល ខេមរិន្ទ្រ ការបង្កើតបក្សថ្មីនេះ មិនមែនដើម្បីដើរតួរជំនួសអតីតគណបក្សសង្គ្រោះជាតិនោះទេ ពោលគឺលោកចង់ប្រើប្រាស់នយោបាយបែបទន់ភ្លន់ ដើម្បីចូលរួមដោះស្រាយបញ្ហាជាតិ ដែលលោកយល់ឃើញថា វាប្រសើរជាងការរិះគន់វាយប្រហារនយោបាយគ្នាទៅវិញទៅមក។
ដើម្បីជ្រាបព័ត៌មានលម្អិត សូមលោក-អ្នកនាងស្ដាប់កិច្ចសម្ភាសរវាងលោក រំដួល ចិត្រា អ្នកសារព័ត៌មានថ្មីៗ និងលោក រៀល ខេមរិន្ទ្រ ប្រធានគណបក្សខ្មែរអភិរក្សនិយម ដូចតទៅ៖
នៅពេលសួរថា តើលោក សម្រេចចិត្តបង្កើតបក្សនេះ កំពុងបង្ហាញទង្វើក្បត់បក្សមែនទេ? លោក រៀល ខេមរិន្ទ្រ បដិសេធភ្លាមថា លោកមិនបានក្បត់បក្សទេ ព្រោះលោកចង់បន្តសកម្មភាពនយោបាយខ្លួន។ ត្រង់ចំណុចនេះអតីតមន្ត្រីជាន់ខ្ពស់បក្សប្រឆាំងរូបនេះ បានសង្កត់ធ្ងន់ដូច្នេះថា៖«មិនអាចមាននរណា អាចនិយាយបានថា ខ្ញុំក្បត់បក្សបានទេ។ ហេតុអ្វីបានជាខ្ញុំនិយាយបែបនេះ? ព្រោះថាខ្ញុំតើមានបក្សឯណា ដែលនឹងត្រូវក្បត់? ព្រោះថាគណបក្សសង្គ្រោះជាតិ ត្រូវបានសាលដីការំលាយបាត់រួចទៅហើយ។ អ៊ីចឹងនៅពេលខ្ញុំសម្រេចសុំសិទ្ធិធ្វើនយោបាយ និងបង្កើតគណបក្សនោះ គឺជារឿងថ្មីមួយទៀត ដោយមិនអាចថាខ្ញុំក្បត់បក្សបានទេ ព្រោះថាច្បាប់ គឺជាច្បាប់»។
ត្រង់ចំណុចនេះលោក រៀល ខេមរិន្ទ្រ អះអាងថា ការបង្កើតបក្សថ្មី មិនមែនជាទង្វើ«អាត្មានិយម»នោះទេ ព្រោះវាជាសិទ្ធិរបស់លោក ក្នុងការសម្រេចចិត្តបន្តជីវភាពនយោបាយ។ «ការបង្កើតគណបក្សនយោបាយមិនមែនជារឿងអាត្មានិយម ប៉ុន្តែជារឿងដោះស្រាយបញ្ហាជាតិ»។ នេះជាការបញ្ជាក់របស់អតីតមន្ត្រីជាន់ខ្ពស់បក្សប្រឆាំង៕
Tag:
រៀល ខេមរិន្ទ
CNRP
នយោបាយ
© រក្សាសិទ្ធិដោយ thmeythmey.com