ជាតិ
ពីនេះ ពីនោះ
×
បទ បថ្យាវត្ត
-ក្រសាកុកក្រៀលរនាលចឹកត្រី ត្រពាំងថ្មល្បីជាដែនជម្រក
សម្បូរចំណីសត្វស្លាបជុំជ្រក ទាក់ភ្នែកភ្ញៀវមកពីទីជិតឆ្ងាយ។
-ប៉ោយប៉ែតអូរជ្រៅមុនមកម្តងណាយ ជូនភ័យមុខស្វាយខ្លាចមីនតាមផ្លូវ
ពេលនេះចេញចូលបានគ្រប់រដូវ ក្រោយដីមីនត្រូវប្រែជាចម្ការ។
-មានជ័យមានជោគទាំងភោគផលា ប្រាង្គបន្ទាយឆ្មាររក្សាទឹកដី
ទាំងបន្ទាយទ័ពបន្ទាយនាងក្តី ប៉ោយប៉ែតក្រុងថ្មីដីកាន់តែថ្លៃ។
-សិរីសោភ័ណថ្មពួកម៉ាឡៃ ស្វាយចេកឡើងដៃអ្នកស្រុកធូរធា
ពីមុនធ្លាប់ល្បីជាទីវ៉ៃគ្នា ចាស់ៗច្បាស់ជាមិនទាន់ភ្លេចឡើយ។
-ធ្វើស្រែបានស្រូវផ្លូវប្រែស្រួលហើយ ផ្សារជិតបង្កើយច្រូតហើយឈ្មួញទិញ
មានច្រកចេញចូលស្រួលប្តូរទំនិញ មិនខ្លាចជូរជ្រេញរលួយខាតដើម។
-បន្ទាយមានជ័យក្រៃលូតលាស់ស្បើម អ្នកជំនួញផ្តើមចាយលានដុល្លារ
សង់ឃ្លាំងរោងចក្រផ្ទះល្វែងវីឡា បង្កើតទាំងផ្សារការងារមិនខ្វះ។
-ខេត្តដែនពាយព្យគាប់គន់ល្អល្អះ ផ្តាំភ្ញៀវក្មេងចាស់មកលេងកុំខាន
បន្ទាយមានជ័យសប្បាយក្សេមក្សាន្ត សម្រាកសម្រានបានគ្រប់រដូវ៕
© រក្សាសិទ្ធិដោយ thmeythmey.com