មួយក្នុងរយៈពេលប៉ុន្មានឆ្នាំចុងក្រោយនេះ វិស័យអចលនទ្រព្យកម្ពុជា បានស្គាល់ពីសន្ទុះកំណើនយ៉ាងឆាប់រហ័ស និងខ្លាំងក្លាបំផុត ដែលការវិនិយោគធំៗ មិនមែនស្ថិតនៅតែក្នុងទីក្រុងភ្នំពេញប៉ុណ្ណោះទេ ប៉ុន្តែរីកដុះដាលនៅតាមទីប្រជុំជន ខេត្ត និងក្រុងសំខាន់ៗ តាមជាយដែន និងតំបន់ជាប់មាត់សមុទ្រផងដែរ ក្នុងនោះមាន ក្រុងព្រះសីហនុ ប៉ោយប៉ែតនិងបាវិតជាដើម។ បណ្តាខេត្ត-ក្រុងទាំងនេះ គឺសុទ្ធតែមានការសាងសង់ច្រើន និងមានតម្រូវការទិញ-ជួលកើនឡើងជាលំដាប់ ដែលធ្វើឲ្យតម្លៃអចលនទ្រព្យ បន្តកើនឡើងខ្ពស់គួរឲ្យកត់សម្គាល់។
មូលហេតុដ៏ចម្បងមួយ ដែលជំរុញដល់កំណើន នៃវិស័យអចលនទ្រព្យនេះ គឺការវិនិយោគផ្ទាល់ពីបរទេស ជាពិសេសវិនិយោគិនចិន។
ប៉ុន្តែរយៈពេល ២ ឆ្នាំកន្លងទៅ នៅពេលដែលប្រទេសចិន បានអនុវត្តគោលនយោបាយ ថ្មីដែលរឹតត្បិតការហូរចេញក្រៅ នៃការវិនិយោគដែលនាំយកលុយចេញពីប្រទេសចិន ទៅក្រៅប្រទេសនោះ គេមើលឃើញថា គោលនយោបាយនេះ អាចធ្វើឲ្យប៉ះពាល់ដល់ចរន្តវិនិយោគរបស់វិនិយោគិនចិននៅក្រៅប្រទេស ក្នុងនោះក៏មានប្រទេសប្រទេសកម្ពុជាផងដែរ។ អ្នកជំនាញអចលនទ្រព្យមួយចំនួន មានការព្រួយបារម្ភអំពីផលប៉ះពាល់ ដោយសារតែគោលនយោបាយថ្មីរបស់ចិននេះ។
លោកបណ្ឌិត គីម ហ៊ាង ដែលជានាយកប្រតិបត្តិរបស់ក្រុមហ៊ុន Keller Williams Cambodia បានប្រាប់កាសែតខ្មែរថាមស៍ថា ការរឹតបណ្តឹងគោលនយោបាយរបស់ចិន បានធ្វើឲ្យមានការថយចុះ នៃការទិញខុនដូពីសំណាក់ជនជាតិចិននៅកម្ពុជា។ លោកមើលឃើញថា លំហូរចូលនៃជនជាតិចិន និងវិនិយោគពីប្រទេសចិនបានជំរុញតម្លៃដី ឲ្យកើនឡើងខ្ពស់ខ្លាំងក្នុងពេលកន្លងមក។
ការវិនិយោគផ្ទាល់ពីប្រទេសចិន នៅកម្ពុជាមានទំហំ ៤០% នៃទុនវិនិយោគបរទេសសរុប។ ដូច្នេះការដែលប្រទេសចិន ចេញគោលនយោបាយថ្មីនេះ អាចធ្វើឲ្យវិស័យអចលទ្រព្យរងនៅផលប៉ះពាល់ផ្នែកណាមួយ (តិច ឬច្រើន) ដោយសារតែប្រទេសកម្ពុជា ត្រូវថយចុះប្រភពទ្រងទ្រង់មួយយ៉ាងសំខាន់ ដើម្បីធ្វើឲ្យសេដ្ឋកិច្ច និងវិស័យអចលនទ្រព្យមានកំណើនឡើង។
ទោះយ៉ាងណា ការផ្លាស់ប្តូរគោលនយោបាយរបស់ចិន ប្រហែលអាចជាចំណុចល្អមួយសម្រាប់ទីផ្សារកម្ពុជា។ អ្នកជំនាញបានមើលឃើញពីចំណុចវិជ្ជមានរយៈពេលវែង សម្រាប់វិស័យអចលនទ្រព្យក្នុងស្រុក។ បណ្ឌិត គីម ហ៊ាង បញ្ជាក់ថា គោលនយោបាយថ្មីនេះ អាចធ្វើឲ្យវិស័យអចលនទ្រព្យនៅកម្ពុជាមានលំនឹង ដោយហេតុថាយើង មិនគួរពឹងផ្អែកលើការវិនិយោគពីប្រទេសតែមួយខ្លាំងពេក។ មានន័យថា កម្ពុជាត្រូវធ្វើឲ្យមានតុល្យភាព នៃការវិនិយោគពីបរទេស ដែលនឹងផ្តល់ផលល្អសម្រាប់ទីផ្សារកម្ពុជាទាំងមូល នៅពេលអនាគត។
លោក Paul Ellender អ្នកគ្រប់គ្រងក្រុមហ៊ុន Freer Properties ក៏មើលឃើញពីផលប៉ះពាល់នៃគោលនយោបាយរបស់ចិននេះដែរ។ លោកបារម្ភថា ដោយសារតែប្រទេសចិន គឺជាអ្នកវិនិយោគធំជាងគេនៅកម្ពុជា ហើយប្រសិនចិនជួបបញ្ហាណាមួយនោះ វានឹងជះឥទ្ធិពលកម្រិតណាមួយ ដល់ប្រទេសកម្ពុជា ដោយសារតែកម្ពុជា មិនទាន់បានធ្វើពិពិធកម្មសេដ្ឋកិច្ចឲ្យបានរឹងមាំនៅឡើយ។
ប្រហែលជាផ្នែកខ្លះ អាចនឹងទទួលរងផលប៉ះពាល់។ ទោះយ៉ាងណា ការវិនិយោគរបស់ចិននឹងនៅតែបន្តទៅមុខ ដោយសារកម្ពុជា ជាប្រទេសដែលគាំទ្រដល់យុទ្ធសាស្ត្រសេដ្ឋកិច្ច គោលនយោបាយ ផ្លូវមួយខ្សែក្រវ៉ាត់មួយរបស់ចិន។ នេះជាអះអាងរបស់លោក Paul។
ទោះយ៉ាងណា លោក ឃាង ពុទ្ធី ប្រធានសមាគមអចលនទ្រព្យកម្ពុជា មើលឃើញថា ការផ្លាស់ប្តូរគោលនយោបាយរបស់ចិន អាចផលប៉ះពាល់លើទីផ្សារកម្ពុជាតិចតួចប៉ុណ្ណោះ ប្រសិនបើមាន។ លោកបញ្ជាក់ថា៖ «មិនទាន់ឃើញមានសញ្ញាណាមួយ ដែលបង្ហាញថាកំណើនសេដ្ឋកិច្ចកំពុងធ្លាក់ចុះទេ ប៉ុន្តែមានគម្រោងជាច្រើន កំពុងចូលមកជាបន្តបន្ទាប់»។
លោកជឿជាក់ថា វិនិយោគិនបរទេស និងអ្នកជំនួញ ជាពិសេសមកពីប្រទេសចិន នឹងបន្តហូរចូលមកកម្ពុជាថែមទៀត៕
អត្តបទពាណិជ្ជកម្ម