F1៖ Vettel ស្គាល់ជ័យជម្នះលើកដំបូងនៅទីលានសិង្ហបុរី តែក្រុម Mercedes នាំមុខពិន្ទុដាច់

កីឡាអន្តរជាតិ

រថយន្ត

អន្តរជាតិ

23, Sep 2019 , 7:39 pm

រូបភាព

ដោយ: ទេព ពិទូរ្យ

កីឡាករ Sebastian Vettel ឈ្នះការប្រណាំងរថយន្តលំដាប់ពិភពលោក Formula One នៅឯទីលានក្នុងប្រទេសសិង្ហបុរី Singapore Grand Prix រដូវកាល ២០១៩ នៅថ្ងៃទី២២ ខែកញ្ញា ដោយប្រើថេរវេលា ១ម៉ោង ៥៨នាទី និង៣៣.៦៦៧វិនាទី។ នេះជាជ័យជម្នះលើកដំបូងរបស់ Vettel បន្ទាប់ពីអាក់ខានការឈ្នះរយៈពេល១៣ខែចុងក្រោយ។

នេះជាជ័យជម្នះដ៏ចម្រូងចម្រាសរបស់អ្នកប្រណាំសញ្ជាតិអាល្លឺម៉ង់ផងដែរ តាមរយៈការប្រជែងមិត្តរួមក្រុម Ferrari របស់ខ្លួន កីឡាករ Charles Leclerc ដែលទទួលបានលេខ២ក្នុងការប្រណាំនៅទឹកដីអាស៊ីនេះ។

Vettel ម្ចាស់ជើងឯក៤សម័យ បានធ្វើឲ្យ Charles Leclerc ដែលជាមិត្តរួមក្រុមមិនសប្បាយចិត្តឡើយ។ Leclerc អ្នកប្រណាំងសញ្ជាតិមូណាកូវ័យ២១ឆ្នាំ ស្ទើរតែឈ្នះក្នុងការប្រណាំងនេះទៅហើយ ប៉ុន្តែដោយសារ Vettel បំពាន អំឡុងរូបគេបើកចេញពីកន្លែងប្តូរកង់ (pit stop) នោះ។

ភ្លាមៗនោះ Leclerc ក៏បានប្រាប់ក្រុមការងារ Ferrari តាមវិទ្យុផងដែរថានេះជាអំពើអយុត្តិធម៌ ដែល Vettel ធ្វើបែបនេះមកលើខ្លួន។
ក្នុងការប្រណាំងនេះកីឡាករ Max Verstappen ដែលបើកបរឲ្យ Red Bull Racing Honda ទទួលបានលេខ ៣ ខណៈ Lewis Hamilton ដែលបើកបរឲ្យក្រុម Mercedes បញ្ចប់ទៅក្នុងចំណាត់ថ្នាក់ទី៤។

ឆ្លងកាត់ការប្រណាំងចំនួន១៥ទីលានរួចមក ម្ចាស់ជើងឯកចាស់ Hamilton និងជាម្ចាស់ជើងឯក F1 ៥សម័យកាល ឈរកំពូលតារាងមាន២៩៦ពិន្ទុ តាមពីក្រោយដោយ Valtteri Bottas ដៃគូក្នុងក្រុម Mercedes រកបាន២៣១ពិន្ទុ ហើយ Leclerc នៅលេខរៀងទី៣ មាន២០០ពិន្ទុ។ Verstappen អ្នកប្រណាំងសញ្ជាតិហូឡង់ឈរលេខ៤ មាន២០០ពិន្ទុ ខណៈដែល Vettel នៅលេខ៥ មាន១៩៤ពិន្ទុ។

បើទោះការប្រណាំនៅសល់៧ទីលានទៀតនោះ Hamilton អ្នកប្រណាំងរថយន្តសញ្ជាតិអង់គ្លេសវ័យ៣៤ឆ្នាំ ត្រូវបានគេជឿជាក់ថានឹងអាចរក្សាតំណែងជើងឯករបស់គេសម្រាប់រដូវកាល២០១៩នេះមិនខាន តាមរយៈការនាំមុខចំនួន៦៥ពិន្ទុ។

អ្វីដែលពិសេសនោះ គិតត្រឹមការប្រណាំងនៅទីលានទី១៥នេះ Hamilton និង Bottas មិនត្រឹមតែឈរនៅកំពូលតារាងបណ្តោះអាសន្ននោះទេ ប៉ុន្តែពួកគេទាំងពីរថែមទាំងជួយក្រុមប្រណាំង Mercedes នាំមុខគេផ្នែកគ្រឿងម៉ាស៊ីនទៀតផង។

Mercedes ទទួលបានពិន្ទុនាំមុខដាច់ ៥២៧ពិន្ទុ តាមពីក្រោយដោយគូប្រជែងចាស់ Ferrari ដែលមាន៣៩៤ពិន្ទុ។ Red Bull Racing Honda នៅលេខ៣ មាន២៨៩ពិន្ទុ៕