កីឡាអន្តរជាតិ
អន្តរជាតិ
មនុស្ស២នាក់ជាប់គុក៥ខែ និង១៤ខែដោយសារតែថតរូបសព កីឡាករ Sala
× បុគ្គលិកពីរនាក់ដែលបម្រើការនៅក្រុមហ៊ុនកាម៉េរាសុវត្ថិភាពមួយរបស់អង់គ្លេស ត្រូវបានកាត់ទោសឲ្យជាប់ពន្ធនាគារ កាលពីថ្ងៃចន្ទ ដោយសារតែពួកគេបានថតរូបដែលបង្ហាញឲ្យឃើញពីក្រាហ្វិកនៃបំណែកសាកសពរបស់កីឡាករអាហ្សង់ទីន Emiliano Sala ដែលបានស្លាប់ដោយធ្លាក់យន្តហោះ កាលពីខែមករា កន្លងមក។
Sala អាយុ២៨ឆ្នាំ បានហោះហើរពីក្រុង Nantes ប្រទេសបារាំង ឆ្ពោះទៅក្រុង Cardiff ប្រទេសវេសល៍ ហើយក្រោយយន្តហោះ បានបាត់ខ្លួននៅតំបន់ព្រែក English Channel។ យោងតាមការផ្សាយរបស់ Reuters ក្រោយការរកឃើញសាកសព ស្ត្រីឈ្មោះ Sherry Bray អាយុ៤៨ឆ្នាំ និងបុរស Christopher Ashford អាយុ៦២ឆ្នាំ បាននាំគ្នាថតរូបបំណែកសពរបស់ Sala ហើយក្រោយមកល្បីសុះសាយពេញបណ្តាញសង្គម។
លោក Anthony Johns ដែលបម្រើការនៅសេវាកម្មអយ្យការផ្នែកឧក្រិដ្ឋកម្មរបស់ចក្រភពអង់គ្លេស បានគូសបញ្ជាក់ថា ទង្វើរបស់ជនទាំងពីរនោះ បង្កភាពសោកសៅ និងការឈឺចាប់កាន់តែខ្លាំងសម្រាប់គ្រួសារ និងមិត្តភក្តិរបស់ Sala។
អ្នកជំនាញច្បាប់រូបនេះ បានលើកឡើងថា នេះជាទង្វើដែលមិនអាចទទួលយកបាន និងខុសច្បាប់។ Bray ត្រូវបានតុលាការ Swindon Crown Court ដាក់ពន្ធនាគារ១៤ខែ រីឯ Ashford ត្រូវជាប់ចំនួន៥ខែ ទៅតាមកម្រិតទោសរបស់ពួកគេ៕
© រក្សាសិទ្ធិដោយ thmeythmey.com