ជាតិ
សុខភាព
សាធារណរដ្ឋឆែកមានគម្រោងបង្កើតមន្ទីរពេទ្យទំនើបនៅកម្ពុជា លោក Marek Librickey នាជំនួបជាមួយលោកប្រាក់ សុខុន កាលពីថ្ងៃទី១៨ ខែកញ្ញា។ រូបថត ក្រសួងការបរទេស
× សាធារណរដ្ឋឆែក កំបុងសិក្សាលើគម្រោងបង្កើតមន្ទីរពេទ្យទំនើបមួយនៅកម្ពុជា។ នេះបើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ក្រោយជំនួបរវាងលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស ជាមួយលោក Marek Libricky ឯកអគ្គរដ្ឋទូតឆែកប្រចាំកម្ពុជា ដែលមាននិវេសនដ្ឋាននៅក្រុងបាងកក។
ក្នុងជំនួបដែលប្រព្រឹត្តទៅកាលពីថ្ងៃទី១៨ ខែកញ្ញា កន្លងមក នៅទីស្តីក្រសួងការបរទេស លោក ប្រាក់ សុខុន និងលោក Marek Librickey បានគូសបញ្ជាក់ពីទំនាក់ទំនងការទូតតាំងពីទសវត្សរ៍៥០ និងកិច្ចសហប្រតិបត្តិការអភិវឌ្ឍ រវាងប្រទេសទាំងពីរ។
គម្រោងសហប្រតិបត្តិការជាច្រើនវិស័យ ត្រូវបានលើកឡើង ដែលក្នុងនោះ មានវិស័យសុខាភិបាលផងដែរ។ ភាគីឆែក បង្ហាញពីឆន្ទះរបស់ខ្លួនក្នុងការចូលរួមលើកកម្ពស់ការថែទាំសុខភាពប្រជាពលរដ្ឋខ្មែរ តាមរយៈគម្រោងបង្កើតមន្ទីរពេទ្យទំនើបដ៏មានគុណភាពមួយនៅកម្ពុជា។
ទោះបីជាយ៉ាងណាក៏ដោយ ភាគីទាំងពីរមិនទាន់បង្ហាញពីគម្រោងលម្អិតនោះឡើយ។ ក្រៅពីវិស័យសុខាភិបាល កម្ពុជា និងឆែក ក៏មានមានគម្រោងកិច្ចប្រតិបត្តិជាច្រើនទៀតលើវិស័យ កសិកម្ម ការពារជាតិ អាកាសចរណ៍ បរិស្ថាន ទឹកស្អាត និងទេសចរណ៍បៃតង។ កន្លងមក ឆែកបានលុបចោលបំណុល ដែលកម្ពុជាជំពាក់ ហើយបានបង្វែរបំណុលមួយចំនួនទៅជាជំនួយសម្រាប់ការអភិវឌ្ឍ។
ចំពោះកិច្ចប្រតិបត្តិការកម្ពុជា-ឆែកលើវិស័យកសិកម្ម ផ្ដោតលើការវេចខ្ចប់ និងម៉ាស៊ីនកិនស្រូវសម្រាប់ផលិតអង្ករ បម្រើឲ្យការនាំចេញ។ ចំណែកវិស័យថាមពលវិញ កម្ពុជាបានទិញថាមពលពីឡាវ ២,៩០០មេហ្គាវ៉ាត់ ភាគីប្រទេសឆែកអាចសិក្សាពីការសាងសង់ខ្សែបណ្ដាញអគ្គិសនី ពីប្រទេសឡាវ មកកម្ពុជា និងពិនិត្យលទ្ធភាពវិនិយោគលើថាមពលកកើតថ្មី។ វិស័យទេសចរណ៍បៃតង ជាវិស័យដែលអាចទាក់ទាញភ្ញៀវពីទ្វីបអឺរ៉ុប និងអាមេរិក៕
© រក្សាសិទ្ធិដោយ thmeythmey.com