យុវវ័យណាត់គ្នាទៅធ្វើបុណ្យ ដើម្បីសន្សំកុសលទាន់ខ្លួននៅក្មេង

ជាតិ

បុណ្យភ្ជុំបិណ្ឌ

យុវវ័យណាត់គ្នាទៅធ្វើបុណ្យ ដើម្បីសន្សំកុសលទាន់ខ្លួននៅក្មេង

27, Sep 2019 , 3:59 pm

រូបភាព

ដោយ: ប៉ូ សាគុន

ភ្នំពេញ៖ សិស្សវិទ្យាល័យអាយុក្រោម២០ឆ្នាំមួយចំនួន បានណាត់គ្នាទៅធ្វើបុណ្យនៅវត្តក្នុងវដូវភ្ជុំបិណ្ឌនេះ ដើម្បីសន្សំបុណ្យកុសលទាន់ខ្លួននៅក្មេង។ ការធ្វើបុណ្យរួមគ្នាសម្រាប់សិស្សវិទ្យាល័យនេះ ពួកគេក៏មានបំណងរឹតចំណងមិត្តភាពរវាងគ្នានិងគ្នាឱ្យកាន់តែល្អប្រសើរឡើងដែរ។

ម៉ូតូកង់បីប្រភេទឥណ្ឌាមួយគ្រឿងបានបើកចូលក្នុងវត្តទួលទំពូង នាម៉ោងប្រមាណ៩ព្រឹក ដោយមានផ្ទុកយុវវ័យអាយុប្រមាណ១៦ឆ្នាំចំនួន៥រូប ដែលពាក់អាវសរខោខ្មៅដូចៗគ្នានៅលើនោះ។ ចុះពីលើម៉ូតូកង់បី យុវជនខ្លះទាញយកសាដកមកកាន់ ហើយខ្លះទៀតលើកមីមួយកេសចេញពីម៉ូតូយកមកឱបជាប់នឹងខ្លួន។

ដៃឆ្វេងកាន់សាដក ហើយដៃស្ដាំលើកទូរសព្ទឡើងដើម្បីទាក់ទងទៅមិត្តដទៃទៀត ដែលមិនទាន់មកដល់វត្ត នោះគឺយុវជន ឆាយ ហួត ដែលមានវ័យ១៦ឆ្នាំ។ រៀនថ្នាក់ទី១១យុវសិស្សដែលមានសម្បុរសរាងខ្ពស់សង្ហារូបនេះ ជាអ្នកផ្ដើមគំនិតក្នុងការប្រមូលមិត្តភក្តិរួមថ្នាក់មកធ្វើបុណ្យជុំគ្នានៅវត្តទួលទំពូងនេះ ជាមួយមិត្តមួយរូបទៀត។

កាលពីឆ្នាំមុន ហួត បានទៅធ្វើបុណ្យក្នុងវត្តជាមួយម្ដាយឪពុក។ ដោយឡែកឆ្នាំនេះយុវជនដែលពាក់អាវសដៃវែងរូបនេះ មកធ្វើបុណ្យជាមួយមិត្តរួមថ្នាក់ ដើម្បីសន្សំបុណ្យទាន់ខ្លួននៅក្មេង។ លោក ហួត បញ្ជាក់បន្ថែម៖«ខ្ញុំប្រមូលប្រាក់ពីមិត្តជិត១០រូប បានប្រាក់ប្រហែល២០ម៉ឺនរៀល។ ខ្ញុំទិញសាដកនិងមីយកមកធ្វើបុណ្យនៅថ្ងៃនេះ»។

នេះជាលើកដំបូងដែលយុវជន ហួត កៀងគរមិត្តមកធ្វើបុណ្យរួមគ្នា។ ជាគម្រោង យុវជនដែលមានស្រុកកំណើតនៅរាជធានីភ្នំពេញរូបនេះ នឹងទៅធ្វើបុណ្យជុំជាមួយមិត្តភ័ក្ដិម្ដងទៀត នៅវត្តស្ទឹងមានជ័យមុនថ្ងៃភ្ជុំធំ។ យុវជន ហួត និយាយបញ្ជាក់ទាំងភ្នែកមើលទៅមិត្តដែលនៅក្បែរខ្លួន ខណៈបរិស័ទដទៃទៀតកំពុងដើរឆ្លងកាត់៖«ខ្ញុំចង់ធ្វើបុណ្យឱ្យបានច្រើនទាន់ខ្លួននៅក្មេង។ ម្យ៉ាងបុណ្យភ្ជុំបិណ្ឌគឺជាប្រពៃណីខ្មែរផង ដូច្នេះយើងគួរតែមកធ្វើបុណ្យឱ្យបានច្រើន ដើម្បីថែរក្សាប្រពៃណីផង និងដើម្បីឧទ្ទិសកុសលជូនញាតិដែលបានចែកឋានទៅផង»។

ចេញពីយុវជន ហួត ខ្ញុំបានទៅជួបសម្ភាសន៍ជាមួយយុវជនមួយរូបទៀតឈ្មោះ សាន ថាវត្តិ។ មានសម្បុរស្រអែមស្គមខ្ពស់ ថាវត្តិ កាន់សាដកនៅក្នុងដៃ កំពុងរង់ចាំមិត្តដទៃទៀតនៅជិតខ្លោងទ្វារវត្តប៉ែកខាងជើង។ ឈរនៅមុខទីធ្លាសាលាបឋមសិក្សាទួលទំពូង យុវជនវ័យ១៦ឆ្នាំរូបនេះ បានប្រមូលមិត្តរួមថ្នាក់ចំនួន១០នាក់ ដែលមាននារី៣រូបផងនោះមកធ្វើបុណ្យរួមគ្នា។

និយាយបណ្ដើរញញឹមបណ្ដើរ ថាវត្តិ ថាលោកពិតជាសប្បាយចិត្ត ពេលដែលបានមកធ្វើបុណ្យនៅវត្ត ជាពិសេសបានធ្វើបុណ្យជុំជាមួយមិត្តរួមថ្នាក់។ សិស្សថ្នាក់ទី១១រូបនេះ ចង់ឱ្យយុវជនដទៃទៀត ទៅធ្វើបុណ្យក្នុងឱកាសភ្ជុំបិណ្ឌនេះឱ្យបានច្រើន ទោះទៅធ្វើបុណ្យជាមួយមិត្ត ឬជាមួយគ្រួសារក្ដី។

«ពេលដែលខ្ញុំបានធ្វើបុណ្យខ្ញុំពិតជាមានអារម្មណ៍ថាសប្បាយចេញពីក្នុងចិត្ត។ បើនៅផ្ទះខ្ញុំមិនមានអារម្មណ៍បែបនេះទេ។ ខ្ញុំចង់ឱ្យយុវជនដទៃទៀតមកធ្វើបុណ្យទាន់ខ្លួននៅក្មេង ដើម្បីសន្សំឧបនិស្ស័យល្អ ហើយថែមទាំងបានឧទ្ទិសបុណ្យជូនដល់ជីដូនជីតារបស់យើងថែទៀតផង»។ នេះជាការពន្យល់របស់យុវជន សាន ថាវត្តិ។

ចេញពីវត្តទួលទំពូងខ្ញុំបានធ្វើដំណើរទៅវត្តមហាមន្ត្រី ដើម្បីស្វែងរកយុវជនវ័យក្មេងផ្សេងៗទៀត។ មកដល់វត្តមហាមន្ត្រីខ្ញុំបានឃើញយុវនារីវ័យក្មេងចំនួន៣រូបនិងក្មេងប្រុសមួយរូបទៀត កំពុងឈរជុំគ្នាលើកដៃសំពះទៅព្រះសង្ឃដែលកំពុងឱ្យពរដល់ពួកគេ។

ក្នុងសម្លៀកបំពាក់អាវសសំពត់ខៀវ សក់កាត់ខ្លីត្រឹមកកញ្ញា ស ស្រីណុច ទើបតែរៀនថ្នាក់ទី៨ បានណាត់មិត្តស្រីរបស់ខ្លួនមកធ្វើបុណ្យនៅក្នុងវត្តមហាមន្ត្រី។ មានវ័យត្រឹម១៥ឆ្នាំ យុវនារីរូបនេះ មកធ្វើបុណ្យរួមជាមួយមិត្តដើម្បីបង្កើតអនុស្សាវរីយ៍រួមគ្នា។ នេះជាលើកទីមួយ ដែល ស្រីណុច មកធ្វើបុណ្យរួមជាមួយមិត្ត ហើយនៅថ្ងៃបន្ទាប់នាងមានគម្រោងទៅវត្តនៅឧត្ដុង្គ។

ស្រីណុច ញញឹមទៅរកមិត្តដែលនៅក្បែរខ្លួនមុនឆ្លើយបញ្ជាក់ ទាំងដែលដៃទាំងពីរកាន់ផ្កាឈូកពណ៌ស៖«ខ្ញុំមកវត្តធ្វើបុណ្យ គឺជាឱកាសល្អក្នុងការបង្កើតអនុស្សាវរីយ៍ជាមួយមិត្តរបស់ខ្ញុំ នៅមុនពេលដែលយើងបែកគ្នា ព្រោះឆ្នាំក្រោយខ្ញុំមិនដឹងថាបានរៀនជាមួយគ្នាទៀតឬក៏អត់ទេ»។

ដៃកាន់ចានស្រាក់ពណ៌ខៀវកញ្ញា ចាន់ ឆស៊ីម ដែលមានអាយុ១៥ឆ្នាំដែរនោះ គឺជាមិត្តរបស់កញ្ញា ស្រីណុច។ ការរឹតចំណងមិត្តភាពតាមរយៈការធ្វើបុណ្យគឺជារឿងមួយ ប៉ុន្តែអ្វីដែលសំខាន់សម្រាប់ ឆស៊ីម គឺនាងចង់ទម្លាប់ខ្លួនពីក្មេង ក្នុងការប្រមូលមិត្តមកធ្វើបុណ្យរួមគ្នា ដើម្បីឧទ្ទិសកុសលជូនដូនតាដែលបានបាក់បែកចែកឋានទៅនោះ។

«យើងនៅក្មេង ហើយយើងណាត់គ្នាមកធ្វើបុណ្យឧទ្ទិសកុសលជូនដូនតា គឺជារឿងល្អដែលយុវវ័យដូចជាខ្ញុំគួរធ្វើ។ ហើយម្ដាយឪពុករបស់យើង ក៏គាត់សប្បាយចិត្តដែរ ពេលគាត់ឃើញកូនចេះមានគំនិតធ្វើបុណ្យបែបនេះ។ វាល្អជាងយកពេលនេះទៅធ្វើអ្វីផ្សេង ឬទៅដើរផ្លូវខុស ដូចជាទៅជក់គ្រឿងញៀនជាដើមនោះ»។ នេះជាការពន្យល់បន្ថែមរបស់កញ្ញា ចាន់ ឆស៊ីម៕