ថៃ ទិញឧទ្ធម្ភាគចក្រប្រយុទ្ធ៨គ្រឿង តម្លៃ៣៨១លានដុល្លារពីអាមេរិក

អន្តរជាតិ

នយោបាយអន្តរជាតិ

ថៃ ទិញឧទ្ធម្ភាគចក្រប្រយុទ្ធ៨គ្រឿង តម្លៃ៣៨១លានដុល្លារពីអាមេរិក

28, Sep 2019 , 11:29 pm

រូបភាព

ដោយ:

សហរដ្ឋអាមេរិក បានលក់ឧទ្ធម្ភាគចក្រប្រយុទ្ធធុនស្រាល៨គ្រឿង និងឧបករណ៍យោធាផ្សេងទៀត ដែលស្មើនឹង ១២ពាន់បាត ឬ ៣៨១,៩លានដុល្លារដល់ប្រទេសថៃ។ នេះបើតាមសេចក្តីថ្លែងការណ៍របស់រដ្ឋាភិបាលអាមេរិក។

ក្នុងសេចក្តីថ្លែងការណ៍មួយ ដែលបានចេញផ្សាយដោយភ្នាក់ងារកិច្ចសហប្រតិបត្តិការការពារជាតិនៃក្រសួងការបរទេសអាមេរិក កាលពីថ្ងៃ២៥ កញ្ញា បញ្ជាក់ឲ្យដឹងថា ឧទ្ធម្ភាគចក្រ AH61 ដែលផលិតឡើងដោយក្រុមហ៊ុន Boeing ទាំង៨គ្រឿងនេះ នឹងជំនួសឧទ្ធម្ភាគចក្រប្រយុទ្ធ Cobra AH-1F ចាស់ ៧គ្រឿង របស់កងទ័ពភូមិន្ទថៃ។

ក្រៅពីការបញ្ជាទិញឧទ្ធម្ភាគចក្រប្រយុទ្ធនេះ កិច្ចព្រមព្រៀងតម្លៃ ៤០០លានដុល្លារនេះ ក៏រាប់បញ្ចូល ក្បាល់គ្រាប់សម្រាប់សព្វាវុធថៃ ដូចជា មីស៊ីល AGM-114 Hellfire ប្រឆាំងរថគ្រោះ ចំនួន៥០គ្រាប់, រ៉ុក្កែតស៊េរីទំនើប ២០០ដើម និងកាំភ្លើង Hydra ៧០ដើម។

តាមការចុះផ្សាយរបស់សារព័ត៌មានថៃ The Nation ដោយដកស្រង់ខ្លឹមសារពីសេចក្តីថ្លែងការណ៍នេះ កាំភ្លើងយន្តល្បឿនលឿនចំនួន១០ដើម និងកាំភ្លើងយន្តទម្ងន់ធ្ងន់ចំនួន ៤ដើម ក៏មានក្នុងកិច្ចព្រមព្រៀងលក់អាវុធនេះផងដែរ។ ហើយក៏មានផងដែរ ប្រព័ន្ធរ៉ាដាតាមដានដែនអាកាស, ប្រព័ន្ធទាក់ទង និងឧបករណ៍នាំផ្លូវសម្រាប់ឧទ្ធម្ភាគចក្រថ្មីខាងលើ និងវ៉ែនតាមើលពេលយប់ចំនួន ២០ ឈុតទៀតផង៕