ជាតិ
បទយកការណ៍ / បទសម្ភាសន៍
បទសម្ភាសន៍
២៥ខេត្ត/រាជធានី
ផ្ទះនៅជិតវត្ត ជំរុញឲ្យតារាចម្រៀង តន់ ច័ន្ទសីម៉ា ចេះស្មូត!
× ភ្នំពេញ៖ ជាតារាចម្រៀងបែបសម័យម្នាក់ កញ្ញា តន់ ច័ន្ទសីម៉ា ក៏អាចស្មូតកំណាព្យជាច្រើនបទបានដែរ។ តារាចម្រៀង តន់ ច័ន្ទសីម៉ា ដែលមានទេពកោសល្យចេះស្មូត តាំងពីអាយុ១៤ឆ្នាំ ពន្យល់យ៉ាងដូច្នេះ៖«ដោយសារតែផ្ទះនៅជិតវត្តស្រាប់ អីចឹងនៅពេលមានភ្ជុំបិណ្ឌម្ដងៗ តែងតែមានការសូត្រស្មូត នៅពេលជិតភ្លឺ ដែលគេបោះបាយបិណ្ឌ អីចឹងហើយនាងខ្ញុំតែងស្ដាប់បាន ឮ ហើយក៏មានអារម្មណ៍សូត្រ(ស្មូត) លេងតាម»។ ក្រៅពីក្តីស្រឡាញ់ មានទេព្យកោសល្យ សីម៉ា ដែលមានស្រុកកំណើតនៅក្រុងដូនកែវ ក៏ទទួលបានការបង្ហាត់ប្រៀនបន្ថែមពីប្រធានមន្ទីរវប្បធម៌ និងវិចិត្រសិល្បៈ ខេត្តតាកែវ ផងដែរ។ អាជីពជាតារាចម្រៀងសម័យវ័យ២២ឆ្នាំ តែ តន់ ច័ន្ទសីម៉ា កាន់តែខំរៀនស្មូតបន្ថែមទៀត។
ដើម្បីជ្រាបព័ត៌មានលម្អិត សូមអញ្ជើញទស្សនាបទសម្ភាសរវាងកញ្ញា អ៊ុត រស្មី អ្នកសារព័ត៌មានអេឡិចត្រូនិកថ្មីៗ និងតារាចម្រៀងកញ្ញា តន់ ច័ន្ទសីម៉ា ដូចតទៅ៖
កញ្ញា ច័ន្ទសីម៉ា បានឲ្យដឹងទៀតថា ពេលរដូវភ្ជុំបិណ្ឌម្ដងៗ កញ្ញាតែងទៅបោះបាយបិណ្ឌ ហើយតែងតែស្ដាប់ឮការស្មូតនៅតាមវត្ត ដែលជាកត្តាធ្វើឲ្យកញ្ញាមានចំណង់ចំណូលចិត្តរៀនសូត្រស្មូតតាម។ ដោយសារតែមានចំណូលចិត្តខាងស្មូតនេះ បានធ្វើឲ្យ សីម៉ា ក្លាយជាអ្នកស្មូត នៅពេលមានកម្មវិធីបុណ្យទាននៅផ្ទះម្ដងៗ។ «មានអារម្មណ៍ថា ដូចរាងប្លែកម្យ៉ាង ព្រោះដោយសារពីមុនមកយើងអត់ដែលមានជំនាញខាងហ្នឹងទេ តែគិតថា មិនថាជំនាញអ្វីក៏ដោយ ឲ្យតែយើងចាប់បាន យើងស្រលាញ់ គឺយើងធ្វើវាដោយសប្បាយចិត្ត»។ នេះជាការបញ្ជាក់ពីអារម្មណ៍របស់ សីម៉ា ដែលខ្លួនបានស្មូតនូវក្នុងកម្មវិធីបុណ្យលើកដំបូង ខណៈដែលបច្ចុប្បន្ន តារាចម្រៀងសម័យរូបនេះ ចេះស្មូតបទសុវណ្ណសាម, ទំនួញនាងមេទ្រី, ទំនួញប្រែត និងពុទ្ធបាទប្រាំឋានជាដើម។
តាមរយះបទពិសោធការស្មូតតាមរោងបុណ្យនេះ និងមានការជំរុញបន្ថែមពីក្រុមគ្រួសារ បានធ្វើឲ្យ សីម៉ា មានភាពក្លាហាន ហ៊ានបញ្ចេញសមត្ថភាពចូលរួមប្រកួតកម្មវិធីស្មូតកំណាព្យ រហូតជាប់លេខមួយក្នុងការស្មូតកំណាព្យប្រចាំខេត្តតាកែវ។ បើទោះពេលនេះ សីម៉ា ជាតារាចម្រៀងបែបសម័យក៏ពិតមែន តែកញ្ញាមិនមានបំណងបោះបង់ការស្មូតកំណព្យឡើយ ពោលគឺកញ្ញា តន់ ច័ន្ទសីម៉ា នៅតែខិតខំសិក្សាពីការស្មូតកំណាព្យនេះបន្ថែមទៀត៕
© រក្សាសិទ្ធិដោយ thmeythmey.com